.jpg)
សន្និសីទសារព័ត៌មានស្ដីពីពិព័រណ៍ជំនាញនៅថ្ងៃទី៦ ខែកញ្ញា ។ រូបថត Financial page
ភ្នំពេញៈកម្មវិធីពិព័រណ៍ជំនាញ និងការងារក្នុងវិស័យធនាគារ (JOBS & SKILLS SUMMIT 2023) នឹងធ្វើឡើងនៅទី២៩-៣០ ខែកញ្ញា ឆ្នាំ២០២៣ នៅសាកលវិទ្យាល័យជាតិគ្រប់គ្រងដែលនឹងមានស្ថាប័នធនាគារប្រមាណ២០ស្ថាប័នចូលរួមនិងផ្តល់ការងាររាប់ពាន់កន្លែងសម្រាប់សិស្សនិស្សិតទូទៅ។
បើតាមសន្និសីទសារព័ត៌មាននៅថ្ងៃទី៦ ខែកញ្ញា ឆ្នាំ២០២៣ កម្មវិធីពិព័រណ៍ជំនាញនិងការងារក្នុងវិស័យធនាគារនេះ ត្រូវបានរៀបចំឡើងដោយមានការសហការពីសាកលវិទ្យាល័យជាតិគ្រប់គ្រង,សមាគមធនាគារនៅកម្ពុជា,វិទ្យាស្ថានធនាគារនិងហិរញ្ញវត្ថុ (IBF)និងសាលាថេក (Salatech Pte. Ltd)ក្នុងគោលបំណងផ្តល់ឱកាសការងារនិងតួនាទីដល់និស្សិត ដើម្បីស្វែងយល់បន្ថែម រៀបចំខ្លួនទទួលបានចំណេះដឹងនិងឱកាសដើម្បីទទួលបានការងារក្នុង វិស័យធនាគារ និងហិរញ្ញវត្ថុ។
នាសន្និសីទសារព័ត៌មាននោះលោកស្រី ផល ឆាលម៍ ធានី អគ្គលេខាធិការនៃសមាគមធនាគារនៅកម្ពុជាបានថ្លែងថា សមាគមធនាគារនៅកម្ពុជាចាត់ទុកការកសាងសមត្ថភាពនិងធនធានមនុស្សនិងផ្នែកអប់រំជារបៀបវារៈចម្បងមួយក្នុងចំណោមរបៀបវារៈចម្បងផ្សេងៗទៀតរបស់សមាគម។
លោកស្រី បាបបញ្ជាក់ថា៖«សមាគមបានបង្កើតគណៈកម្មាធិការអប់រំនិងបានផ្តួចផ្តើមបង្កើតវិទ្យាស្ថានធនាគារនិងហិរញ្ញវត្ថុនេះ ដើម្បីលើកកម្ពស់ការអប់រំក្នុងវិស័យធនាគារនិងហិរញ្ញវត្ថុដើម្បីកំណើននិងនិរន្តរភាពនៃវិស័យធនាគារនៅកម្ពុជា។សមាគមធនាគារនៅកម្ពុជានឹងបន្តការគាំទ្រនូវរាល់កិច្ចការទាំងឡាយដែលផ្តល់ប្រយោជន៍ជូនទៅដល់វិស័យអប់រំ និងការអភិវឌ្ឍធនធានមនុស្ស»។
លោកស្រីបានបន្តថា វិទ្យាស្ថានធនាគារ និងហិរញ្ញវត្ថុបានអប់រំនិងបណ្តុះបណ្តាលជំនាញវិជ្ជាជីវៈសម្រាប់វិស័យធនាគារប្រមាណជាង ៤០ ០០០ នាក់ រាប់ចាប់ពីការកកើតវិទ្យាស្ថាននៅឆ្នាំ២០១៨ រហូតមកដល់ពេលបច្ចុប្បន្ន ។
ជាមួយគ្នានោះដែរ លោក ហោ ប៉េង សាកលវិទ្យាធិការនៃសាកលវិទ្យាល័យជាតិគ្រប់គ្រងក៏បានលើកឡើងដែរថា វិស័យធនាគារ និងហិរញ្ញវត្ថុមានការរីកចម្រើនខ្លាំងគួរឱ្យកត់សម្គាល់ដោយបានជំរុញឱ្យសាកលវិទ្យាល័យនេះបង្កើនកិច្ចសហប្រតិបត្តិការជាមួយស្ថាប័នរាជដ្ឋាភិបាល ស្ថាប័នឯក ដូចជាវិទ្យាស្ថានធនាគារនិងហិរញ្ញវត្ថុ (IBF) និងសមាគមធនាគារនៅកម្ពុជាជាដើមដើម្បីជំរុញឱ្យមានចំនួនធនធានមនុស្សដែលមានសមត្ថភាព និងមានស្ដង់ដា ស្របទៅនឹងតម្រូវការទីផ្សារការងារក្នុងវិស័យនេះ។
លោកបានថ្លែងថា៖«យើងខិតខំប្រឹងប្រែងបណ្តុះបណ្តាលធនធានមនុស្សរបស់ដើម្បីធ្វើយ៉ាងណាឱ្យចេញទៅ មានទីផ្សារការងារបានច្រើន ដោយបានរៀបចំកែសម្រួលកម្មវិធីសិក្សាបំពេញបន្ថែមទៅតាមសំណូមពរ និងលក្ខខណ្ឌរបស់បណ្តាក្រុមហ៊ុនហិរញ្ញវត្ថុ ឬក៏ធនាគារនាពេលបច្ចុប្បន្ននេះ»។
លោកបានបន្តថា ដោយសារកន្លងទៅមាននិស្សិតជាច្រើនចេញទៅធ្វើការដែលខុសពីជំនាញដែលខ្លួនបានរៀននៅសាកលវិទ្យា- ល័យទើបគណៈគ្រប់គ្រងសាកលវិទ្យាល័យ បានសម្រេចបង្កើតមជ្ឈមណ្ឌលការងារមួយដើម្បីភ្ជាប់ទំនាក់ទំនងរវាងនិស្សិត និងស្ថាប័នក្រុមហ៊ុននានាជំរុញឱ្យការជ្រើសការងាររបស់និស្សិតត្រូវជំនាញដែលខ្លួនបានរៀន។
ចំណែកលោក សុខ លាភ ស្ថាបនិកនៃសាលាថេក (Salatech Pte. Ltd) ដែលជាដៃគូរបស់ IBFបានឱ្យដឹងដែរថា វិស័យធនាគារនិងហិរញ្ញវត្ថុនេះផ្តល់ជូននូវឱកាសការងារនិងតួនាទីជាច្រើន ប៉ុន្តែវិស័យនេះក៏ទាមទារជំនាញនិងសមត្ថភាពផងដែរ។
លោកបានបញ្ជាក់បន្ថែមថា៖«ដូច្នេះហើយ Skill and Job Summit គឺជាឱកាសដ៏ល្អសម្រាប់និស្សិតដើម្បីស្វែងយល់បន្ថែម រៀបចំខ្លួនទទួលបានចំណេះដឹងនិងឱកាសដើម្បីទទួលបាន ការងារក្នុងវិស័យធនាគារ និងហិរញ្ញវត្ថុ ដែលជាវិស័យមួយក្នុងចំណោមវិស័យដែលមានភាពរីកចម្រើនបំផុតនៅក្នុងប្រទេសកម្ពុជា»៕
