.jpg)
លោក ឃួង ស្រេង អភិបាលសាលារាជធានីភ្នំពេញ។ រូបថត សាលារាជធានីភ្នំពេញ
ភ្នំពេញៈ រដ្ឋបាលរាជធានីភ្នំពេញ បានប្រកាសដាក់ឱ្យអនុវត្តសាកល្បងនូវការផ្តល់សេវារដ្ឋបាលតាមប្រព័ន្ធអនឡាញ (Online) លើវិស័យធំៗចំនួន ៤ នៅអង្គភាពច្រកចេញចូលតែ ១ រាជធានីភ្នំពេញ ដើម្បីផ្តល់សេវាសាធារណៈឱ្យបានឆាប់រហ័សដល់ប្រជាពលរដ្ឋ។ យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ កាលពីថ្ងៃទី ៦ ខែកញ្ញា ឆ្នាំ ២០២៣។
លោក ឃួង ស្រេង អភិបាលរាជធានីភ្នំពេញ បានបញ្ជាក់នៅក្នុងសេចក្តីជូនដំណឹងថា រដ្ឋបាលរាជធានីភ្នំពេញ នឹងដាក់ឱ្យអនុវត្តសាកល្បងការទទួលពាក្យស្នើសុំ និងផ្តល់សេវារដ្ឋបាលតាមប្រព័ន្ធអនឡាញ លើវិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, វិស័យកសិកម្ម រុក្ខាប្រមាញ់ និងនេសាទ វិស័យវប្បធម៌ និងវិចិត្រសិល្បៈ និងវិស័យទេសចរណ៍។
លោកថ្លែងថា៖ «ការសម្រេចដាក់ឱ្យអនុវត្តសាកល្បងតាមប្រព័ន្ធអនឡាញនេះ គឺដើម្បីវិវឌ្ឍទៅតាមយុគសម័យឌីជីថល និងសម្រេចបាននូវការផ្តល់សេវាសាធារណៈឱ្យបានឆាប់រហ័ស សន្សំសំចៃកម្រៃ និងពេលវេលាធ្វើដំណើររបស់ប្រជាពលរដ្ឋក្នុងការមកដាក់ពាក្យស្នើសុំផ្ទាល់នៅសាលារាជធានីភ្នំពេញ»។
លោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គមកម្ពុជា នៅថ្ងៃទី ៦ ខែកញ្ញា បានថ្លែងថា ការដាក់ឱ្យដំណើរផ្តល់សេវារដ្ឋបាលតាមប្រព័ន្ធអនឡាញនៅអង្គភាពច្រកចេញចូលតែ ១ រាជធានីភ្នំពេញ នឹងជួយសម្រួលពេលវេលាដល់ប្រជាពលរដ្ឋដែលរវល់ការងារ ពិសេសស្របតាមបច្ចេកវិទ្យាទំនើប ប៉ុន្តែការផ្ដល់សេវារដ្ឋបាលតាមប្រព័ន្ធអនឡាញនេះ នៅពេលណាមានបញ្ហារអាក់រអួលបច្ចេកទេសណាមួយ តើនរណាជាអ្នកបំភ្លឺជូនប្រជាពលរដ្ឋ តើជាការឆ្លើយតបបានលឿនឬអត់?។
លោក សន ជ័យ បានបញ្ជាក់ថា៖ «ហេតុនេះខ្ញុំយល់ថា រដ្ឋបាលរាជធានីភ្នំពេញ គួរតែបង្កើតឱ្យមានក្រុមតេឡេក្រាម (Telegram) មួយដែលអាចឱ្យប្រជាពលរដ្ឋធ្វើការស្វែងយល់បន្ថែម អាចសួរសំណួរ និងពិគ្រោះយោបល់ពីការដាក់ពាក្យសុំ ឬការទទួលបានសេវាសាធារណៈណាមួយបន្ថែម ទើបដំណើរការនេះមានប្រសិទ្ធភាពបាន»។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញបានបញ្ជាក់ដែរថា ការផ្តល់សេវារដ្ឋបាលតាមប្រព័ន្ធអនឡាញនេះ ប្រជាពលរដ្ឋទាំងអស់នៅតែអាចមកទំនាក់ទំនងស្នើសុំសេវាដោយផ្ទាល់បាននៅអង្គភាពច្រកចេញចូលតែ ១ សាលារាជធានីភ្នំពេញ ដែលមានទីតាំង នៅក្នុងបរិវេណសាលារាជធានីភ្នំពេញ។ ប្រជាពលរដ្ឋដែលមានបំណងចង់ដាក់ពាក្យស្នើសុំសេវារដ្ឋបាលតាមប្រព័ន្ធអនឡាញអាចចូលទៅកាន់គេហទំព័រ http://online.owso.gov.kh/. ដើម្បីបង្កើតគណនីសម្រាប់ស្នើសុំសេវារដ្ឋបាល ទាំង ៤ វិស័យនេះ ដោយភ្ជាប់ឯកសារពាក់ព័ន្ធនានាទៅតាមការណែនាំក្នុងជំហាននីមួយៗ៕
