មន្ត្រីស្រង់យកគំរូសំណាកស្រាថ្នាំដែលពាក់ព័ន្ធបណ្ដាលឱ្យបុរសម្នាក់ស្លាប់ បញ្ជូនទៅមន្ទីរពិសោធន៍នៅរាជធានីភ្នំពេញដើម្បីពិនិត្យរកសារធាតុពុល។ រូបថត ក.ប.ប
ភ្នំពេញៈ មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ប្រចាំខេត្តពោធិ៍សាត់ បានស្រង់យកគំរូសំណាកស្រាថ្នាំដែលពាក់ព័ន្ធបណ្ដាលឱ្យបុរសម្នាក់ស្លាប់ បញ្ជូនទៅមន្ទីរពិសោធន៍នៅរាជធានីភ្នំពេញដើម្បីពិនិត្យរកសារធាតុពុល បើទោះបីសមត្ថកិច្ចសន្និដ្ឋានបឋមថា ជាករណីស្លាប់ព្រោះខ្យល់គ។
លោក ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប បានប្រាប់ភ្នំពេញប៉ុស្តិ៍នៅថ្ងៃទី ១០ កញ្ញាថា សំណាកគំរូស្រានោះ ត្រូវបានបញ្ជូនមកមន្ទីរពិសោធន៍ធំនៃអគ្គនាយកដ្ឋាន ក.ប.ប ហើយ ហើយដោយសារតែការពិសោធត្រូវការពេលគឺមិនទាន់មានលទ្ធផលនៅឡើយទេ។
លោក បានបញ្ជាក់ថា៖ «យើងមិនទាន់ចេញលទ្ធផលទេ ចាំមើលថ្ងៃចន្ទ។ ហើយដើម្បីឆ្លើយតបនឹងករណីពុលស្រានេះ ក.ប.ប យើងកំពុងធ្វើយុទ្ធនាការដើម្បីចុះអប់រំផ្សព្វផ្សាយទៅដល់ពលរដ្ឋដែលរស់នៅ ១៨ ខេត្ត។ យើងឃើញថា ប្រជាពលរដ្ឋយើង នៅតែខ្វះការយកចិត្តទុកដាក់អ៊ីចឹង ជាពិសេសគឺករណីស្រាស ស្រាថ្នាំនេះ»។
កាលពីថ្ងៃទី ៧ ខែកញ្ញា សមត្ថកិច្ចជំនាញខេត្តពោធិ៍សាត់ បានចុះទៅដល់ កន្លែងកើតហេតុ និងធ្វើកោសល្យវិច័យ បន្ទាប់ទទួលបានការរាយការណ៍ពីប្រជាពលរដ្ឋថា មានករណីមនុស្សម្នាក់ ស្លាប់ ក្រោយជុំគ្នាផឹកស្រាថ្នាំ។ អ្នកស្លាប់ឈ្មោះ ព័ន្ធ រិទ្ធ ភេទប្រុស អាយុ ៤០ ឆ្នាំ ជនជាតិខ្មែរ មានមុខរបរជាកសិករ រស់នៅក្នុងភូមិព្នៅ ឃុំស្នាមព្រះ ស្រុកបាកាន ខេត្តពោធិ៍សាត់។
តាមរបាយការណ៍របស់អធិការនគរបាលស្រុកបាកាន ដែលភ្នំពេញប៉ុស្តិ៍ទទួលបាននៅថ្ងៃទី ១០ ខែកញ្ញា បានឱ្យដឹងថា ជនរងគ្រោះស្លាប់នៅចំណុចផ្ទះរបស់ឈ្មោះ កឹក តុញ ភេទប្រុស អាយុ៣៨ឆ្នាំ ស្ថិតនៅក្នុងភូមិព្នៅ ឃុំស្នាមព្រះ ស្រុកបាកាន ខេត្តពោធិ៍សាត់ ដែលជាទីជួបជុំគ្នាផឹកស្រា។
លោក នាង វុធ អធិការនគរបាលស្រុកបាកាន បានប្រាប់ភ្នំពេញប៉ុស្តិ៍បន្ថែមថា ក្រោយកើតហេតុភ្លាមៗ សមត្ថកិច្ចជំនាញ បានចុះទៅដល់កន្លែងកើតហេតុ និងបានធ្វើកោសល្យវិច័យ ដោយក្នុងនោះ ការពិនិត្យស្លាកស្នាមលើសាកសព គឺគ្មានស្លាកស្នាមអ្វីនោះទេ ហើយប្រដាប់ភេទ និងទ្វារលាមក ក៏គ្មានសញ្ញាអ្វីដែលសង្ស័យ ពាក់ព័ន្ធនឹងការពុលដែរ។
លោក បានអះអាងថា មន្ត្រីជំនាញ បានធ្វើការសន្និដ្ឋានជាបឋមក្រោយធ្វើកោសល្យវិច័យនេះថា ជនរងគ្រោះ អាចស្លាប់ដោយសារគាំងបេះដូង ឬខ្យល់គ ប៉ុន្តែដោយហេតុការណ៍ កើតឡើងភ្លាមៗ បន្ទាប់ជនរងគ្រោះបានពិសាស្រា ដូច្នេះ មន្ត្រីជំនាញនៃក.ប.ប បានសហការយកគំរូស្រាថ្នាំនោះ យកទៅពិសោធដើម្បីពិនិត្យរកសារធាតុពុល ចៀសវាងបង្កគ្រោះថ្នាក់ដល់ពលរដ្ឋដទៃទៀត ខណៈសមត្ថកិច្ច ក៏បានប្រមូល និងដកហូតស្រាទាំងនោះ ពីកន្លែងចែកចាយ ដើម្បីយកមករក្សាទុកផងដែរ។
លោក បានបញ្ជាក់ថា៖ «យើងធ្វើកោសល្យវិច័យ ហើយស្របពេលនោះ ក៏មានអ្នកផឹកស្រាជាមួយគាត់ ២ នាក់ ទៀតដែរ ដែលគាត់ មិនមានបញ្ហាអ្វីគួរឱ្យសង្ស័យ បន្ទាប់ពីបានផឹកស្រាជាមួយគ្នាមក។ យ៉ាងណា យើងបានសុំគោលការណ៍ និងស្រាវជ្រាវពីកន្លែងដែលពួកគាត់បានទិញ ដើម្បីដកហូតស្រាទាំងនោះ យកមករក្សាទុកភ្លាមៗ ដើម្បីរង់ចាំលទ្ធផលពីមន្ទីរពិសោធន៍ប៉ុន្តែលទ្ធផល យើងមិនទាន់ទទួលបាននៅឡើយទេ»។
កាលពីថ្ងៃទី ៨ ខែកញ្ញា ឆ្នាំ២ ០២៣ មន្ត្រីជំនាញ ក.ប.ប. សាខាខេត្តពោធិ៍សាត់ ដោយមានការយល់ព្រមពីព្រះរាជអាជ្ញាខេត្ត បានចុះទៅដល់ទីកន្លែងកើតហេតុ ហើយក្រោយពីមន្ត្រីជំនាញពិនិត្យបឋមរួចមក មន្ត្រីក៏បានស្រង់យកសំណាកគំរូបញ្ជូនទៅមន្ទីរពិសោធន៍ធំនៃអគ្គនាយកដ្ឋាន ក.ប.ប ដើម្បីពិនិត្យរកសារធាតុពុល។
ខេត្តពោធិ៍សាត់ជាខេត្តដែលមានករណីពុលស្រាដែលបណ្តាលឱ្យមានជនរងគ្រោះស្លាប់ច្រើន ហើយកាលពីខែមិថុនា ឆ្នាំ ២០២១ មានជនរងគ្រោះ ១៣ នាក់ស្លាប់ និងប្រមាណជិត ១០០ នាក់បានសង្គ្រោះរួចពីគ្រោះថ្នាក់បន្ទាប់ពីជុំគ្នាពិសាស្រាក្នុងពិធីបុណ្យសព ១ កន្លែង ស្ថិតស្រុកក្រគរ។ ជំងឺបណ្តាលមកពីម្ហូបអាហារនៅតែជាបញ្ហាប្រឈមសុខភាពសាធារណៈធ្ងន់ធ្ងរនៅកម្ពុជា៕
.jpg)
