លោក ប៉ោ ភក្តិ និងលោក LI Xiang Ming ក្នុងជំនួបពិភាក្សានាថ្ងៃទី១២ ខែកញ្ញា។ រូបថត ក្រសួងមហាផ្ទៃ
ភ្នំពេញៈ មន្ត្រីស្ថានទូតចិនបង្ហាញជំហរ «យ៉ាងមុតមាំ» ក្នុងការបន្តពង្រឹងកិច្ចសហការលើបច្ចេកវិទ្យាឌីជីថលជាមួយក្រសួងមហាផ្ទៃកម្ពុជាតទៅមុខទៀត និងសន្យាបន្តកិច្ចខិតខំប្រឹងប្រែងក្នុងការគាំទ្រការងារបណ្ដុះបណ្ដាលវិស័យបច្ចេកវិទ្យាឌីជីថលនេះដល់មន្ត្រីកម្ពុជា។
ការបង្ហាញជំហរបែបនេះធ្វើឡើងក្នុងជំនួបនាថ្ងៃទី១២ ខែកញ្ញា រវាងលោក ប៉ោ ភក្តិ រដ្ឋលេខាធិការក្រសួងមហាផ្ទៃ និងលោក LI Xiang Ming ទីប្រឹក្សាទំនាក់ទំនងកិច្ចការនគរបាល នៃស្ថានទូតចិនប្រចាំប្រទេសកម្ពុជា នៅទីស្ដីការក្រសួងមហាផ្ទៃ រាជធានីភ្នំពេញ។
សេចក្តីប្រកាសព័ត៌មានក្រសួងមហាផ្ទៃកម្ពុជាបញ្ជាក់នាថ្ងៃទី១២ ខែកញ្ញា ថា៖ «លោក Li Xiang Ming បានថ្លែងអំណរគុណរាល់ការគាំទ្រនានាកន្លងមកជាមួយក្រុមការងារពាក់ព័ន្ធរបស់ភាគីចិន និងសង្ឃឹមថា កិច្ចសហប្រតិបត្តិការ រវាងភាគីទាំង២ នឹងនៅតែបន្តរឹងមាំ។ ក្នុងន័យនេះ លោកក៏បានបង្ហាញនូវជំហរយ៉ាងមុតមាំក្នុងការបន្តពង្រឹងកិច្ចសហការជាមួយក្រសួងមហាផ្ទៃកម្ពុជាតទៅមុខទៀត»។
លោក ប៉ោ ភក្តិ បញ្ជាក់ថា ស្របតាមយុទ្ធសាស្ត្របញ្ចកោណដំណាក់កាលទី១ ដែលដាក់ចេញដោយរាជរដ្ឋាភិបាល ការងារបច្ចេកវិទ្យាឌីជីថលមានសារៈសំខាន់ ហើយអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំដែលទើបតែត្រូវបង្កើតឡើងនឹងត្រូវការជំនួយលើកិច្ចការងារបណ្ដុះបណ្ដាលមន្ត្រីជំនាញ ក៏ដូចជាលើសម្ភារផងដែរ។
លោកបានស្នើសុំនូវកិច្ចសហប្រតិបត្តិការបន្ថែមលើកិច្ចការងារបច្ចេកវិទ្យាឌីជីថលរវាងក្រសួងមហាផ្ទៃកម្ពុជា និងក្រសួងសន្តិសុខសាធារណៈចិន។
សេចក្តីប្រកាសព័ត៌មានដដែលបញ្ជាក់ថា៖ «លោក Li Xiang Ming ក៏បានយល់ស្របអំពីសារៈសំខាន់នៃការងារឌីជីថល ជាពិសេសតួនាទី ភារកិច្ចរបស់អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ដោយលោកបានបន្តថា ក្រុមការងារពាក់ព័ន្ធនឹងបន្តកិច្ចខិតខំប្រឹងប្រែងក្នុងការគាំទ្រកិច្ចសហប្រតិបត្តិការឱ្យបានល្អប្រសើរ និងការងារបណ្ដុះបណ្ដាលដែលបានលើកឡើងឱ្យអស់ពីសមត្ថភាព»។
សេចក្តីប្រកាសព័ត៌មានបន្តថា លោក ប៉ោ ភក្តិ ក៏បានថ្លែងអំណរគុណចំពោះការឆ្លើយតបជាវិជ្ជមានពីតំណាងភាគីចិន និងចំពោះទំនាក់ទំនងល្អរវាងក្រសួងសន្តិសុខសាធារណៈចិន និងក្រសួងមហាផ្ទៃកម្ពុជា ក៏ដូចជាការយល់ចិត្តគ្នារវាងថ្នាក់ដឹកនាំគ្រប់កម្រិត រួមទាំងប្រជាជននៃប្រទេសទាំង២ផងដែរ។
លោករំឭកថា កន្លងមក ក្រោមការដឹកនាំរបស់លោក ស ខេង អតីតរដ្ឋមន្ត្រីក្រសួងមហាផ្ទៃ កិច្ចសហប្រតិបត្តិការទ្វេភាគីរវាងមហាផ្ទៃកម្ពុជា និងក្រសួងសន្តិសុខសាធារណៈចិន មានភាពរឹងមាំ និងទទួលបានភាពជោគជ័យ លទ្ធផលប្រកបដោយផ្លែផ្កា។
កាលពីថ្ងៃទី២៤ ខែសីហា រាជរដ្ឋាភិបាលបានចេញអនុក្រឹត្យបង្កើតអគ្គនាយកដ្ឋានធនធានមនុស្ស ចំណុះក្រសួងមហាផ្ទៃ ដើម្បីគ្រប់គ្រងមន្ត្រីរាជការស៊ីវិល មន្ត្រីនគរបាលជាតិ មន្ត្រីពន្ធនាគារ មន្ត្រីតាមអគ្គនាយកដ្ឋាននានា និងមន្ត្រីនៅតាមមូលដ្ឋានព្រមទាំងអភិវឌ្ឍធនធានមនុស្សផងដែរ។
អគ្គនាយកដ្ឋានធនធានមនុស្សនេះ ចែកចេញជានាយកដ្ឋានចំនួន ៤ រួមមាន នាយកដ្ឋានរដ្ឋបាលសរុប, នាយកដ្ឋានបុគ្គលិកមន្ត្រីនគរបាលជាតិ, នាយកដ្ឋានបុគ្គលិកមន្ត្រីរាជការស៊ីវិល និងមន្ត្រីពន្ធនាគារ និងនាយកដ្ឋានគោលនយោបាយ។
អនុក្រឹត្យនេះ បញ្ជាក់ថា៖ «អគ្គនាយកដ្ឋានធនធានមនុស្សមានតួនាទីធ្វើជាសេនាធិការជូនក្រសួងមហាផ្ទៃ លើការងារគ្រប់គ្រងមន្ត្រីនគរបាលជាតិ មន្ត្រីរាជការស៊ីវិល និងមន្ត្រីពន្ធនាគារ របស់អគ្គស្នងការដ្ឋាននគរបាលជាតិ និងអគ្គនាយកដ្ឋាននានាចំណុះក្រសួងមហាផ្ទៃ និងសមាជិកក្រុមប្រឹក្សា នៅរដ្ឋបាលថ្នាក់ក្រោមជាតិ ស្របតាមច្បាប់កំណត់ ព្រមទាំងអភិវឌ្ឍធនធានមនុស្ស»។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា ប្រាប់ភ្នំពេញប៉ុស្តិ៍នាថ្ងៃទី១២ ខែកញ្ញា ថា ប្រសិនបើបានកិច្ចសហប្រតិបត្តិការទៅលើគម្រោងឌីជីថលនេះ នោះគឺជាការល្អ ពីព្រោះទី១ គឺបានពង្រឹងសមត្ថភាពនៃមន្ត្រីនគរបាលកម្ពុជា ក៏ដូចជាបច្ចេកវិទ្យាក្នុងការងារគ្រប់គ្រងបច្ចេកវិទ្យាព័ត៌មានរបស់រដ្ឋ ក៏ដូចជាក្រសួងមហាផ្ទៃដែរ។
លោកបន្ថែមថា៖ «ទី២ ដើម្បីទប់ស្កាត់ការឆបោកតាមអនឡាញអីជាដើម រួមនឹងការច្រោះព័ត៌មានសំខាន់ៗផ្សេងទៀត។ ជារួម ជាគោលការណ៍ ខ្ញុំគាំទ្រទៅលើកិច្ចសហប្រតិបត្តិការនេះហើយវាមានប្រយោជន៍សម្រាប់ទាំងកិច្ចសហប្រតិបត្តិការ ទាំងប្រយោជន៍ដល់ប្រទេសកម្ពុជា»៕
