បេក្ខជនត្រូវបានត្រួតពិនិត្យពេលចូលប្រឡងបាក់ឌុបកាលពីឆ្នាំមុន។ ហុង មិនា
ភ្នំពេញៈ រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានចេញប្រកាសស្តីពីបទប្បញ្ញត្តិ និងកម្រិតវិន័យចំពោះបេក្ខជនក្នុងការប្រឡងសញ្ញាបត្រមធ្យមសិក្សាទុតិយភូមិដែលនឹងប្រព្រឹត្តទៅនៅថ្ងៃទី ៦ វិច្ឆិកាខាងមុខ ដោយក្នុងនោះបានកំណត់ទោសប្បញ្ញត្តិ និងពិន័យជាប្រាក់សម្រាប់អ្នកដែលបន្លំខ្លួនចូលប្រឡងជំនួសបេក្ខជន។
នេះបើយោងតាមប្រកាសដែលមាន ៦ ជំពូក និង ១៥ មាត្រាចុះហត្ថលេខាដោយលោក ហង់ជួន ណារ៉ុន ចេញផ្សាយកាលពីថ្ងៃទី ១១ ខែកញ្ញា ឆ្នាំ ២០២៣។
ប្រកាសនេះបានបញ្ជាក់លម្អិតពីទោសប្បញ្ញត្តិដែលមានចែងនៅក្នុងច្បាប់ធរមានថា៖ «ជនណាដែលប្រឡងជំនួស ឬបន្លំគ្រប់រូបភាពក្នុងការប្រឡង ត្រូវទទួលពិន័យអន្តរការណ៍ជាប្រាក់ពី ១ លានរៀល ទៅ ៥ លានរៀល»។
ប្រភពដដែលបន្តថា ករណីមិនរាងចាល សាមីខ្លួនត្រូវទទួលពិន័យអន្តរការណ៍ជាប្រាក់ចំនួនទ្វេដងនៃប្រាក់ពិន័យអន្តរការណ៍នេះ ហើយត្រូវព្យួរការប្រឡងសម្រាប់រយៈពេល ២ ឆ្នាំ ឬហាមឃាត់មិនឱ្យចុះឈ្មោះក្នុងបញ្ជីប្រឡងជាស្ថាពរផងដែរ។ ប្រកាសដដែលនេះក៏បានបញ្ជាក់ផងដែរថា ចំពោះជនដែលប្រឡងជំនួស ឬបន្លំគ្រប់រូបភាពក្នុងការប្រឡង ត្រូវផ្តន្ទាទោសតាមច្បាប់ព្រហ្មទណ្ឌជាធរមាន។
ទាក់ទងនឹងការកំណត់ទោសប្បញ្ញត្តិ និងពិន័យនេះ លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញថ្លែងកាលពីថ្ងៃទី ១២ ខែកញ្ញាថា នេះជាអាណត្តិទី៣ របស់រដ្ឋមន្ត្រីក្រសួងអប់រំដែលបានធ្វើកំណែទម្រង់ចំពោះការក្រឡងមួយឱ្យមានភាពត្រឹមត្រូវ និងយុត្តិធម៌ ពោលគឺអ្នកចេះ គឺជាប់។
លោកបញ្ជាក់ថា៖ «ដូច្នេះ អ្នកពាក់ព័ន្ធទាំងអស់ត្រូវចូលរួមគោរពបទប្បញ្ញត្តិដែលក្រសួងបានណែនាំ ជាពិសេសគ្រប់គណៈកម្មការគ្រប់គ្រងការប្រឡងទាំងអស់ មានទាំងប្រធានមណ្ឌលប្រឡងជាដើម ត្រូវចូលរួមអនុវត្តឱ្យបានត្រឹមត្រូវ»។
លោកស៊ីណារ៉េត ក៏បានផ្តាំផ្ញើផងដែរថា សិស្សា-នុសិស្សទាំងអស់ដែលជាបេក្ខជន ត្រូវខិតខំរៀនសូត្រដោយកុំរំពឹងលើការយកសំណៅឯកសារ ឬទូរស័ព្ទចូលក្នុងបន្ទប់ប្រឡងបាន ពីព្រោះវិធានការនឹងត្រូវអនុវត្តយ៉ាងតឹងរ៉ឹងនៅតាមមណ្ឌលប្រឡងនីមួយៗ។ ដោយឡែកអាណាព្យាបាលក៏ត្រូវជំរុញការរៀនសូត្ររបស់កូនផ្ទាល់ខ្លួន ឱ្យបានច្រើន ដោយកុំរំពឹងថា មានការអន្តរាគមន៍ឬក៏សូកប៉ាន់ផ្សេងៗឡើយ គឺមិនអាចទៅរួចទេ។
លោកបញ្ជាក់ថា៖ «សូមឱ្យគាត់កុំពឹងលើចំណេះដឹងក្រៅខ្លួន សូមឱ្យគាត់ប្រឹងរៀនព្រោះពេលវេលាក៏នៅយូរដែរ ហើយយើងត្រូវតែចូលរួមអនុវត្តតាមការណែនាំតាមបទប្បញ្ញត្តិរបស់ក្រសួងទាំងគ្រូ ទាំងសិស្ស អាណាព្យាបាល និងអាជ្ញាធរពាក់ព័ន្ធផងដែរ»។
ចំណែកលោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ បានថ្លែងថា ករណីលួចប្រឡងជំនួស ឬបន្លំគ្រប់រូបភាព លោកស្រីសង្កេតឃើញថា លែងមានទៀតហើយ។ លោកស្រីថា៖ «ខ្ញុំគិតថា យុវជនសម័យនេះ គាត់មិនប្រើប្រាស់រូបមន្តបែបនេះទៀតទេ។ យើងដឹងហើយថា ច្បាប់គឺជាច្បាប់ ប៉ុន្តែខ្ញុំខ្លាចតែអ្នកច្បាប់ចូលចិត្តល្មើសច្បាប់ទៅវិញទេបានតែងតែមានសិស្សប្រើរូបមន្តដដែលនេះ»៕
.jpg)
