លោក ប៊ិន ត្រឈៃ និងថ្នាក់ដឹកនាំក្រសួងផែនការ ក្នុងជំនួបជាមួយលោក Will Parks និងមន្ត្រីអង្គការយូនីសេហ្វប្រចាំកម្ពុជា កាលពីថ្ងៃទី១១កញ្ញា។ រូបថត ក្រសួងផែនការ
ភ្នំពេញៈក្នុងជំនួបជាមួយនឹងតំណាងអង្គការយូនីសេហ្វប្រចាំកម្ពុជា លោក ប៊ិន ត្រឈៃ រដ្ឋមន្ត្រីក្រសួង ផែនការបានស្នើតំណាងអង្គការនេះ បន្តកិច្ចគាំទ្រលើការងារអាហារូបត្ថម្ភតាមរយៈកម្មវិធីបញ្ចូលជាតិអ៊ីយ៉ូដជាសកលក្នុងអំបិល និងកម្មវិធីបញ្ចូលជាតិ ដែកក្នុងទឹកត្រី និងទឹកស៊ីអ៊ីវ ដល់កុមារ និងមនុស្សពេញវ័យ រួមនឹងការបណ្តុះបណ្តាលមន្រ្តីផងដែរ។
ការស្នើរបស់ក្រសួងផែនការនេះត្រូវបានអង្គការធ្វើការលើអាហារូបត្ថម្ភសម្រាប់កុមារ និងស្រ្តី មានការសាទរ និងគាំទ្រ។
ជំនួបសម្តែងការគួរសម និងពិភាក្សាការងារកាលពីថ្ងៃទី១១ កញ្ញានេះធ្វើឡើងនាទីស្តីការក្រសួងផែនការ រវាងលោក ប៊ិន ត្រឈៃ រដ្ឋមន្ត្រីក្រសួងផែនការ និងលោក Will Parks តំណាងអង្គការយូនីសេហ្វប្រចាំកម្ពុជា (UNICEF) ព្រមទាំងសហការី។ នេះបើយោងតាមការប្រកាសតាមរយៈហ្វេសប៊ុកក្រសួងផែនការ។
នាឱកាសនោះ លោក ប៊ិន ត្រឈៃ បានលើកឡើងថា ៖ «សូមស្នើដល់ UNICEF ឱ្យបន្តកិច្ចគាំទ្រលើការងារអាហារូបត្ថម្ភតាមរយៈកម្មវិធីបញ្ចូលជាតិអ៊ីយ៉ូដជាសកលក្នុងអំបិល និងកម្មវិធីបញ្ចូលជាតិដែកក្នុងទឹកត្រី និងទឹកស៊ីអ៊ីវ ដល់កុមារ និងមនុស្សពេញវ័យ និងបន្តគាំទ្រលើការបណ្តុះបណ្តាលដល់មន្ត្រីក្រសួងផែនការ លើជំនាញត្រួតពិនិត្យ និងវាយតម្លៃផងដែរ»។
លោករដ្ឋមន្រ្តី ក៏បានស្នើឱ្យអង្គការយូនីសេហ្វបន្តឧបត្ថម្ភ គាំទ្របច្ចេកទេសលើការងារប្រមូលទិន្នន័យនៅថ្នាក់ក្រោមជាតិ ជាពិសេសឧបត្ថម្ភគាំទ្រជាសម្ភារថេប្ល៊ិត (Tablet)បន្ថែម ដល់បណ្តាឃុំ សង្កាត់ទូទាំងប្រទេស និងមន្ទីរផែនការរាជធានី ខេត្ត ពាក់ព័ន្ធនឹងការងារកំណត់អត្តសញ្ញាណកម្មគ្រួសារក្រីក្រផងដែរ។
ក្នុងជំនួបដដែលនោះដែរ លោក Will Parks ក៏បានលើកឡើងដោយបញ្ជាក់ក្នុងនាមជាតំណាងឱ្យអង្គការយូនីសេហ្វសន្យានឹងបន្តពង្រឹង និងពង្រីកកិច្ចសហប្រតិបត្តិការដ៏ល្អរវាងក្រសួងផែនការ និងអង្គការយូនីសេហ្វឱ្យកាន់តែរឹងមាំបន្ថែមទៀត។
លោក Will Parks ក៏បានស្នើលោក ប៊ិន ត្រឈៃ ចូលរួមជាអធិបតីក្នុងកិច្ចប្រជុំពិគ្រោះយោបល់ជាមួយអង្គការយូនីសេហ្វ ដែលនឹងប្រព្រឹត្តទៅនាចុងខែកញ្ញា ឆ្នាំ២០២៣ខាងមុខ ដោយផ្តោតសំខាន់លើការរៀបចំផែនការកិច្ចសហប្រតិបត្តិការ សម្រាប់រយៈពេល៥ឆ្នាំបន្តទៀត (២០២៤-២០២៨)។
សូមបញ្ជាក់ដែរថា ក្រសួងផែនការ និងអង្គការ UNICEFកន្លងមក មានកិច្ចសហប្រតិបត្តិការជាមួយគ្នា ដោយខាងអង្គការUNICEF បានឧបត្ថម្ភគាំទ្រជាជំនួយបច្ចេកទេស លើការងាររៀបចំផែនការយុទ្ធសាស្ត្រអភិវឌ្ឍន៍ជាតិ គោលដៅអភិវឌ្ឍន៍ប្រកបដោយចីរភាព ការងារពាក់ព័ន្ធអាហារូបត្ថម្ភនិងគាំទ្រដល់ដំណើរការនៃការរៀបចំនីតិវិធីនៃការកំណត់អត្តសញ្ញាណកម្មគ្រួសារក្រីក្រ និងកិច្ចការមួយចំនួនទៀត។
លោក ហ៊ូ ក្រើន ប្រធានអង្គការហេឡេន ខេលល័រប្រចាំកម្ពុជា បានថ្លែងនៅថ្ងៃទី១៣ ខែកញ្ញា ដោយលោកស្វាគមន៍ និងចាត់ទុកថា ការស្នើ និងការយកចិត្តទុកដាក់លើសុខភាពកុមារ និងស្រ្តី គឺជារឿងមួយដ៏ល្អ ពីព្រោះកន្លងមក កម្ពុជាមានការប្រឈមច្រើនចំពោះការត្រួតពិនិត្យលើអំបិលដែលមានបញ្ចូលជាតិអ៊ីយ៉ូដនេះ។
លោកបានថ្លែងថា៖ «មានការត្រួតពិនិត្យពីអង្គការយូនីសេហ្វនៅក្នុងឆ្នាំ២០១៨ ហើយក្រោយមកទៀត ដោយសារមានបញ្ហាមួយចំនួនសម្រាប់វិស័យឯកជន នៅក្នុងការរកទិញសារធាតុអ៊ីយ៉ូដបញ្ចូលនៅក្នុងអំបិល។ អ៊ីចឹង! បានជាមានបញ្ហា ហើយចំណុចមួយទៀតកន្លងទៅ មានការក្លែងបន្លំ ដោយអំបិលខ្លះមានការដាក់ស្លាកជាអ៊ីយ៉ូដប៉ុន្តែពេលដែលធ្វើការត្រួតពិនិត្យអត់មានសារធាតុនេះ ហើយអំបិលខ្លះមានអ៊ីយ៉ូដដែរ តែអត់ត្រឹមត្រូវតាមស្តង់ដា»។
បើតាមលោក ហ៊ូ ក្រើន ការស្នើសុំឱ្យអង្គការយូនីសេហ្វជួយធ្វើការត្រួតពិនិត្យទៅលើអំបិលនេះ គឺជារឿងសំខាន់ ដើម្បីធានាធ្វើយ៉ាងណាឱ្យអំបិលនៅក្នុងទីផ្សារ មានសារធាតុអ៊ីយ៉ូដទៅតាមស្តង់ដាត្រឹមត្រូវ ស្របតាមគោលនយោបាយ និងមានចែងនៅក្នុងអនុក្រឹត្យរបស់ក្រសួងផែនការក្នុងការបញ្ចូលសារធាតុអ៊ីយ៉ូដនៅក្នុងអំបិលនេះ៕
.jpg)
