អ្នកតំណាងរាស្ត្រ ក្នុងកិច្ចប្រជុំរដ្ឋសភានៅព្រឹកថ្ងៃទី១៤កញ្ញានេះ។ រូបថត រដ្ឋសភា
ភ្នំពេញៈរដ្ឋសភានៅថ្ងៃនេះ បានបន្តសម័យប្រជុំរដ្ឋសភាលើកទី១ នីតិកាលទី៧ ដើម្បីពិភាក្សា និងអនុម័តលើសេចក្តីព្រាងច្បាប់ស្តីពី ការបង្កើតក្រសួងអធិការកិច្ច និងសេចក្តីព្រាងច្បាប់ស្តីពី ការបង្កើតរដ្ឋលេខាធិការដ្ឋានកិច្ចការព្រំដែន។
យោងតាមអគ្គលេខាធិការដ្ឋានរដ្ឋសភា សម័យប្រជុំនេះ ត្រូវបានដឹកនាំដោយលោកស្រី ឃួន សុដារី ប្រធានរដ្ឋសភា នាវិមានរដ្ឋសភា ដោយមានវត្តមានសមាជិកសមាជិការដ្ឋសភា ពេលចាប់ផ្តើមសម័យប្រជុំ ចំនួន ១១០រូប។
កាលពីថ្ងៃទី៥ កញ្ញា រដ្ឋសភា បានបន្តបើកសម័យប្រជុំលើកទី១ នីតិកាលទី៧ ដើម្បីបោះឆ្នោតជ្រើសតាំងសមាជិកគណៈកម្មការជំនាញទាំង ១០ មុននឹងធ្វើការបោះឆ្នោតផ្ទៃក្នុងតាមគណៈកម្មការនីមួយៗ ក្នុងការជ្រើសតាំងលេខាធិការនៃគណៈកម្មការ។
ការបន្តសម័យប្រជុំនាថ្ងៃនេះ បានធ្វើឡើង បន្ទាប់ពីសមាជិករដ្ឋសភាចំនួន ៨៧ រូប បានបន្តសម័យប្រជុំរដ្ឋសភាលើកទី១ ក្នុងនីតិកាលទី៧ ដើម្បីប្រកាសសុពលភាពតំណាងរាស្ត្រថ្មីចំនួន ២៩ រូប និងបោះឆ្នោតជ្រើសតាំងសមាជិកក្រុមប្រឹក្សាធម្មនុញ្ញកាលពីថ្ងៃទី៣១ សីហា៕
.jpg)
