លោក លី ធុជ អនុប្រធានទី១អាជ្ញាធរមីន និងលោក Cherdkiat ATTHAKOR ឯកអគ្គរាជទូតថៃប្រចាំកម្ពុជា ជួបពិភាក្សាការងារស្តីពីកិច្ចសហប្រតិបត្តិការបោសសម្អាតមីនតាមតំបន់ព្រំដែនកម្ពុជា-ថៃ។ រូបថត CMAA
ភ្នំពេញៈ មន្ត្រីជាន់ខ្ពស់នៃអាជ្ញាធរមីនកម្ពុជា បានលើកឡើងថា កម្ពុជា និងថៃ នឹងធ្វើការសិក្សាលម្អិតជាមួយគ្នាបន្តទៀតទាក់ទងនឹងគម្រោងបោសម្អាតមីន និងគ្រាប់យុទ្ធភណ្ឌមិនទាន់ផ្ទុះនៅតាមទីតាំង និងភូមិសាស្ត្រជាប់ព្រំដែននៃប្រទេសទាំង២ ដែលជួបបញ្ហាប្រឈមដោយសារគ្រឿងផ្ទុះទាំងនេះ។
លោកទេសរដ្ឋមន្ត្រី លី ធុជ អនុប្រធានទី១អាជ្ញាធរមីន បានប្រាប់ឱ្យដឹងដូចនេះ កាលពីថ្ងៃទី១៧ ខែកញ្ញា ឆ្នាំ២០២៣ បន្ទាប់ពីលោកបានជួបពិភាក្សាការងារស្តីពីកិច្ចសហប្រតិបត្តិការបោសសម្អាតមីនតាមតំបន់ព្រំដែនកម្ពុជា-ថៃ ជាមួយលោក Cherdkiat ATTHAKOR ឯកអគ្គរាជទូតថៃប្រចាំកម្ពុជា និងអគ្គនាយកនៃមជ្ឈមណ្ឌលសកម្មភាពកំចាត់មីនថៃ (TMAC) កាលពីសប្តាហ៍មុន។
លោក លី ធុជ បានថ្លែងថា ៖ «យើងនឹងធ្វើការសិក្សាលម្អិតជាមួយគ្នានេះ ក្នុងការបោសម្ពាតមីន និងគ្រាប់យុទ្ធភណ្ឌមិនទាន់ផ្ទុះនេះ នៅតាមទីតាំង និងភូមិសាស្ត្រនៅជាប់ព្រំដែនជែលជួបបញ្ហាប្រឈម។ ក្រោយទទួលបានព័ត៌មានលម្អិតពីភាគីថៃ ក្រុមការងារជំនាញរបស់កម្ពុជានឹងធ្វើការជាមួយគ្នា ដើម្បីផ្តល់នូវកិច្ចសហប្រតិបត្តិការក្នុងការឈានទៅដល់ការបោសសម្អាតក្នុងពេលវេលាសមស្របណាមួយ»។
លោក លី ធុជ បានលើកឡើងទៀតថា តាមរយៈកិច្ចសហប្រតិបត្តិការបោសសម្អាតមីន និងគ្រាប់មិនទាន់ផ្ទុះនៅតាមបន្ទាត់ព្រំដែននេះ លោកនាយកដ្ឋមន្ត្រីនៃប្រទេសកម្ពុជា និងប្រទេសថៃ មានបំណង និងចង់ឃើញតំបន់ព្រំដែននៃប្រទេសដែលមានរបងជាប់គ្នាទាំង២ជាតំបន់ដែលមានសន្តិភាព សុវត្ថិភាព ជូនប្រជាពលរដ្ឋទាំងសងខាង និងធ្វើឱ្យតំបន់ទាំងនោះ មានការអភិវឌ្ឍផងដែរ។
លោកមានប្រសាសន៍ថា៖ «តំបន់មួយចំនួននៃតំបន់ព្រំដែនរបស់ប្រទេសទាំង២នេះ ជាអតីតតំបន់សមរភូមិ មានគ្រាប់មីន និងគ្រាន់មិនទាន់ផ្ទុះដែលអាចបង្កគ្រោះថ្នាក់ដល់ប្រជាពលរដ្ឋទាំងសងខាង និងជាឧបសគ្គដល់ការអភិវឌ្ឍនៅតាមតំបន់នោះ។ ដូច្នេះ ខ្ញុំបានជម្រាបជូនភាគីថៃដែរថា សម្តេចធិបតី ហ៊ុន ម៉ាណែត ចង់ឃើញតំបន់ទាំង២មានការអភិវឌ្ឍ និងសុវត្ថិភាព ព្រមទាំងផ្តល់ផលប្រយោជន៍នៃប្រទេសទាំង២ផងដែរ»។
ទោះបីជាយ៉ាងណា លោក លី ធុជ បញ្ជាក់បន្ថែមថា ៖ «ការងារនេះ មិនទាន់កំណត់ពេលវេលាជាក់លាក់ក្នុងការអនុវត្តនៅពេលណានៅឡើយទេ ដោយរងចាំព័ត៌មានលម្អិតពីភាគីថៃ ខណៈភាគីកម្ពុជាបានកំណត់ និងស្គាល់ទីតាំងច្បាស់លាស់ក្នុងការបោសសម្ពាតមីន និងគ្រាប់យុទ្ធភណ្ឌមិនទាន់ផ្ទុះនេះ អស់ហើយ»។
កាលពីថ្ងៃទី១៣ ខែកញ្ញា កន្លងទៅក្នុងពិធីបើកសិក្ខាសាលាថ្នាក់តំបន់ស្តីពីការជំរុញនវានុវត្តន៍ និងចីរភាពក្នុងសកម្មភាពមីន និងយុទ្ធភណ្ឌមិនទាន់ផ្ទុះ លោក លី ធុជ បានអនុញ្ញាតឱ្យលោក Cherdkiat ATTHAKOR ឯកអគ្គរាជទូតថៃប្រចាំកម្ពុជា និងលោក SupathatNarindarabhakdi អគ្គនាយកនៃមជ្ឈមណ្ឌលសកម្មភាពកំចាត់មីនថៃ (TMAC) ព្រមទាំងសហការី សម្តែងការគួរសម និងជួបពិភាក្សាការងារ ស្តីពីកិច្ចសហប្រតិបត្តិការបោសសម្អាតមីនតាមតំបន់ព្រំដែនកម្ពុជា-ថៃ។
ក្នុងឱកាសនោះ លោកបានលើកឡើងពីទំនាក់ទំនង និងកិច្ចសហប្រតិបត្តិការយ៉ាងជិតស្និទ្ធរវាងប្រទេស និងប្រជាជនទាំង២ដែលមានព្រំប្រទល់ជាប់គ្នា ព្រមទាំងបានគូសបញ្ជាក់ពីចក្ខុវិស័យដឹកនាំរបស់រាជរដ្ឋាភិបាលកម្ពុជា ក្នុងការដោះស្រាយបញ្ហាមីននៅកម្ពុជាឱ្យអស់ត្រឹមឆ្នាំ២០២៥៕
.jpg)
