អ្នកចូលរួមក្នុងទិវាបៃតង យកធុងសំរាមរបស់ក្រុមហ៊ុន សោម៉ា គ្រុប ប្រគល់ជូនពលរដ្ឋនៅភូមិគំរូ ក្នុងស្រុកទ្រាំង កាលពីថ្ងៃទី១៦កញ្ញា។ រូបថត សហការី
តាកែវៈក្រុមហ៊ុនអនុវត្តតាមគោលការណ៍ CSR ប្រារព្ធទិវាបៃតង និងប្រកាសបង្កើតភូមិគំរូ ១ ស្ថិតនៅក្នុងឃុំព្រៃស្លឹក ខេត្តតាកែវ ដើម្បីអនុវត្តសាកល្បងលើការងារគ្រប់គ្រងសំរាម និងការកាត់បន្ថយការប្រើប្រាស់ប្លាស្ទិក ក្នុងការចូលរួមចំណែកដោះស្រាយក្តីកង្វល់រួមជាសកលចំពោះការកើនឡើងនូវសំរាមនៅក្នុងសង្គម និងពិភពលោក។
កាលពីថ្ងៃទី១៦ ខែកញ្ញា ឆ្នាំ២០២៣ Soma Initiative ឬ ក្រុមហ៊ុន សោម៉ា គ្រុប ក្រោមកិច្ចសហការជាមួយអាជ្ញាធរស្រុកទ្រាំង និងគាំទ្រដោយក្រសួងបរិស្ថាន បានរួមគ្នាប្រារព្ធទិវាបៃតង ឆ្នាំ២០២៣ ក្រោមប្រធានបទ «ការគ្រប់គ្រងសំរាម កាកសំណល់រឹង និងការកាត់បន្ថយការប្រើប្រាស់ប្លាស្ទិក» នៅទីរួមស្រុកទ្រាំង ខេត្តតាកែវ។
តាមសេចក្តីប្រកាសរបស់ក្រុមហ៊ុន ដែលភ្នំពេញប៉ុស្តិ៍ទទួលបាននៅថ្ងៃទី១៧ កញ្ញា បានឱ្យដឹងថា កម្មវិធីនេះបានប្រព្រឹត្តទៅដោយមានការបង្ហាញរបាយការណ៍របស់តំណាងរដ្ឋបាលស្រុក និងមានការធ្វើបទបង្ហាញទាក់ទងនឹងប្រធានបទពីមន្ត្រីជំនាញមកពីក្រសួងបរិស្ថាន និងតំណាងក្រុមហ៊ុនទាក់ទងនឹងផែនការចូលរួមគ្រប់គ្រងសំរាម និងកាកសំណល់រឹងនៅស្រុកទ្រាំង។
សេចក្តីប្រកាសរបស់ក្រុមហ៊ុន បានបញ្ជាក់ថា៖«ជារៀងរាល់ឆ្នាំ Soma Initiative តែងតែរៀបចំព្រឹត្តិការណ៍ទិវាបៃតងក្រោមប្រធានបទផ្សេងៗគ្នា ហើយលើកនេះជាលើកទី៤សម្រាប់ទិវាបៃតងរបស់យើងខ្ញុំ។ ដោយឆ្នាំនេះយើងផ្ដោតលើការគ្រប់គ្រងសំរាមនិងការកាត់បន្ថយការប្រើប្រាស់ប្លាស្ទិកដែលជាក្តីកង្វល់រួមជាសកលចំពោះការកើនឡើងនៃចំនួនប្រជាជន និងតម្រូវការរបស់មនុស្សធ្វើឱ្យបរិមាណសំរាម កាកសំណល់មានការកើនឡើងនិងបង្កជាគ្រោះមហន្តរាយផ្សេងៗដូចជាការប្រែប្រួលអាកាសធាតុ និងការរាតត្បាតនៃជំងឺផ្សេងៗជាដើម»។
ជាមួយនឹងទិវានេះ Soma Initiative ក៏បានប្រកាសពីការសហការជាមួយអាជ្ញាធរស្រុកទ្រាំង ដើម្បីជ្រើសរើសយកភូមិ១ គឺភូមិព្រៃសណ្តែក ក្នុងឃុំព្រៃស្លឹក ដើម្បីធ្វើការអនុវត្តសាកល្បងលើការងារគ្រប់គ្រងសំរាម និងការកាត់បន្ថយការប្រើប្រាស់ប្លាស្ទិកក្រោមឈ្មោះថា «ភូមិខ្ញុំស្អាត»ផងដែរ។
លោកស្រី ចម ក្រស្នា អគ្គនាយិកាក្រុមហ៊ុន សោម៉ា គ្រុប និងជាប្រធាន Soma Initiativeបានថ្លែងថា គម្រោងអនុវត្តសាកល្បងលើការងារគ្រប់គ្រងសំរាម និងការកាត់បន្ថយការប្រើប្រាស់ប្លាស្ទិកនៅក្នុងភូមិនេះ នឹងមានការរៀបចំផែនការរយៈពេលវែង និងមធ្យម។ លោកស្រី បន្តថា ក្រុមហ៊ុន សោម៉ា គ្រុប និងបុត្រសម្ព័ន្ធ នឹងចូលរួមគាំទ្រលើការងារបំផុសស្មារតី អប់រំ និងផ្តល់ជាសម្ភារផ្សេងៗដែលបម្រើដល់គម្រោងនេះ ព្រមទាំងជួយស្វែងរកដៃគូសហការ និងសប្បុរសជននានា ដើម្បីធានាចូលរួមគាំទ្រដល់កម្មវិធីទៀតផង។
លោក ជឹង ទូច ប្រធានក្រុមផ្សព្វផ្សាយ និងទំនាក់ទំនងសាធារណៈនៃក្រុមហ៊ុន សោម៉ា គ្រុប បានប្រាប់ភ្នំពេញប៉ុស្តិ៍ថាក្រុមហ៊ុន សោម៉ា គ្រុប បានបង្កើត Soma Initiative ដែលអនុវត្តតាមគោលការណ៍ CSR ដោយធ្វើការផ្តោតទៅលើកម្មវិធីចំនួន៣ ពាក់ព័ន្ធនឹងការអប់រំ សុខភាពអនាម័យ និងបរិស្ថាន។ សម្រាប់ឆ្នាំនេះ ក្រៅពីប្រារព្ធទិវាបៃតង គឺ Soma Initiative ក៏បានជ្រើសរើសយកភូមិ១ ដើម្បីអនុវត្តសាកល្បង ឱ្យក្លាយជាភូមិគំរូផ្នែកគ្រប់គ្រងបរិស្ថាន។
លោកបញ្ជាក់ថា៖«ដោយសារតែយើងមើលឃើញថា ភូមិ១នេះ គឺភូមិប្រជុំជន១ របស់ស្រុកទ្រាំង ដែលប្រជាពលរដ្ឋកំពុងតែកើនឡើង ធ្វើឱ្យកាកសំណល់ផ្សេងៗក៏មានការកើនឡើងដែរ។ យើងផ្តួតផ្តើមគំនិនេះគឺចង់ឱ្យមានការចូលរួមពីប្រជាពលរដ្ឋ ពីអាជ្ញាធរ និងពីអ្នកពាក់ព័ន្ធផ្សេងទៀត ដើម្បីរួមចំណែកគ្រប់គ្រងសំរាមក្នុងភូមិនេះឱ្យបានល្អ ចៀសវាងនៅពេលសំរាមកាន់តែកើន ជួបប្រទះផលវិបាក ព្រោះគ្មានវិធានការពីដើមទី»។
បើតាមលោក ជឹង ទូច ក្នុងដំណាក់កាលសាកល្បងជំហានដំបូងនេះ គឺមានរយៈពេល៤ខែ ដោយក្រុមហ៊ុនសោម៉ាគ្រុម បានផ្តល់ធុងសំរាមចំនួន៩០ ដោយបែងចែកចំនួន៣ ពណ៌ ទៅកាន់អាជ្ញាធរស្រុក ដើម្បីធ្វើការបែងចែកទៅតាមគោលដៅខណៈពលរដ្ឋដែលចូលរួមអនុវត្តគម្រោង ភូមិខ្ញុំស្អាត ត្រូវបានជ្រើសរើសប្រមាណ ៣០០ គ្រួសារ ក្នុងចំណោមពលរដ្ឋសរុបក្នុងភូមិជាង៤០០ គ្រួសារ។
លោក ទិត្យ ឌឿន ជាពលរដ្ឋម្នាក់រស់នៅក្នុងឃុំព្រៃស្លឹក បាននិយាយថា ការគាំទ្រនេះ បានចូលរួមជួយដល់បញ្ហាអនាម័យដល់ប្រជាពលរដ្ឋ ដែលរស់នៅក្នុងឃុំរបស់លោក ហើយថែមទាំងបានគិតគូរពីគម្រោងអនាគតក្នុងការគ្រប់គ្រងសំរាមនៅក្នុងភូមិផងដែរ។
លោកបញ្ជាក់ថា៖«នៅពេលមានការដាក់ធុងសំរាម ហើយមានឡានដឹកសំរាមទៀត ខ្ញុំ ក៏បានចូលរួមសម្អាតអនាម័យ ហើយយើងបានចូលរួមសម្អាតអនាម័យតាមដងផ្លូវដើម្បីឱ្យសម្រេចបានតាមការដាក់ចេញ ភូមិយើងស្អាត ជាភូមិគំរូ។ ក្នុងនាមជាពលរដ្ឋ យើងរីករាយសប្បាយចិត្ត ដែលមានការសហការជួយភូមិ ឃុំខ្ញុំស្អាត។ នេះគឺជាអនាម័យ និងសុខភាព ដែលផ្តល់ដល់ពលរដ្ឋយើងទាំងអស់គ្នា»៕
.jpg)
