ពិធីប្រគល់-ទទួល ឧបករណ៍បំភ្លឺផ្លូវសុវត្ថិភាពជាង ៣ ០០០ គ្រាប់ កាលថ្ងៃទី ១៨ ខែកញ្ញា។ រូបថត MPWT
ភ្នំពេញៈ ក្រុមហ៊ុនជប៉ុន ប្រគល់ឧបករណ៍បំភ្លឺផ្លូវសុវត្ថិភាពជាង ៣ ០០០ គ្រាប់ ដល់ក្រសួងសាធារណការ និងដឹកជញ្ជូន សម្រាប់បំពាក់នៅលើទ្រូងផ្លូវថ្នល់ ឬស្ពាន ឬត្រង់កន្លែងដែលងាយបង្កគ្រោះថ្នាក់ ខណៈអ្នកជំនាញបានដំឡើងរួចរាល់ជាង ២ ០០០ គ្រាប់នៅតាម ៧៥ ទីតាំង នៅតាមបណ្តោយផ្លូវជាតិលេខ ២ លេខ ៥ លេខ ៦ និងលេខ ៦១។
ពិធីប្រគល់ទទួលឧបករណ៍បំភ្លឺផ្លូវ Pikalotto នេះ បានធ្វើឡើងបន្ទាប់ពីមន្ត្រីជំនាញនៃក្រសួងសាធារណការ និងដឹកជញ្ជូន ពីនាយកដ្ឋានសុវត្ថិភាពចរាចរណ៍ផ្លូវគោក នាយកដ្ឋានផ្លូវថ្នល់ និងអ្នកជំនាញជប៉ុនមកពី JICA កាលពីថ្ងៃទី ១៣ កញ្ញា បានរួមគ្នាចុះត្រួតពិនិត្យឧបករណ៍បំភ្លឺផ្លូវ Pikalotto LED Solar Light ដែលបានដំឡើងរួចរាល់នៅតាមទីតាំងដែលងាយបង្កគ្រោះថ្នាក់ចរាចរណ៍។
តាមទំព័រហ្វេសប៊ុករបស់ក្រសួងសាធារណការ បានឱ្យដឹងថា លោក ប៉េង ពោធិ៍នា រដ្ឋមន្ត្រីក្រសួងសាធារណការ បានចូលរួមក្នុងពិធីប្រគល់ទទួលឧបករណ៍បំភ្លឺផ្លូវ Pikalotto និងឧបករណ៍សម្រាប់ខួងដំឡើងពីក្រុមហ៊ុន Fuji Construction Works Co., Ltd. ដោយមានការចូលរួមពី លោក Sanui Kazumasa ប្រធានទីភ្នាក់ងារ JICA ប្រចាំនៅកម្ពុជា កាលពីថ្ងៃទី ១៨ ខែកញ្ញា ឆ្នាំ ២០២៣ ។
ឧបករណ៍បំភ្លឺផ្លូវ Pikalotto នេះ គឺឧបករណ៍សម្រាប់បំពាក់ទៅលើទ្រូងផ្លូវថ្នល់ ឬស្ពាន ត្រង់កន្លែងដែលងាយបង្កគ្រោះថ្នាក់ ដូចជាកន្លែងផ្លូវកោងជាដើម ដើម្បីដាស់ស្មារតីអ្នកបើកបរនៅពេលយប់ ឱ្យមើលឃើញពីស្ថានភាពផ្លូវបានច្បាស់ និងបង្កើនការប្រុងប្រយ័ត្នខ្ពស់។
ក្រសួងបញ្ជាក់ថា៖ «ឧបករណ៍បំភ្លឺផ្លូវដែលទទួលបានពីក្រុមហ៊ុនមានចំនួន ៣ ១០០ គ្រាប់ដែល ២ ៦៦៩ គ្រាប់ ត្រូវបានដំឡើងរួចរាល់ក្នុង ៧៥ ទីតាំង តាមបណ្តោយផ្លូវជាតិលេខ ២ លេខ ៥ លេខ ៦ និងលេខ ៦១។ ដោយឡែកឧបករណ៍ដែលនៅសល់ និងឧបករណ៍ខួងដំឡើង ២ គ្រឿង បានយកមកប្រគល់ជូនក្រសួង ដើម្បីទុកប្រើប្រាស់ក្នុងពេលបន្ទាប់»។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជាបានលើកឡើងថា ដើម្បីកាត់បន្ថយការស្លាប់ និងរបួសពីគ្រោះថ្នាក់ចរាចរណ៍ កម្ពុជាត្រូវមានវិធានការធំៗចំនួន ៥ ក្នុងនោះគឺការផ្សព្វផ្សាយអប់រំ ការរឹតបន្តឹងការអនុវត្តច្បាប់ ការមានសុវត្ថិភាពយានយន្ត ការមានផ្លូវដែលមានសុវត្ថិភាព និងចុងក្រោយការផ្តល់នូវជំនួយសង្គ្រោះបន្ទាន់។
ជាមួយនឹងការបំពាក់ឧបករណ៍នៅតាមដងផ្លូវនេះ លោក បញ្ញា យល់ឃើញថា វាស្របតាមចំណុចទី៤ ដើម្បីធ្វើឱ្យផ្លូវមានសុវត្ថិភាពសម្រាប់អ្នកដំណើរ ដែលបានចូលរួមចំណែកជួយកាត់បន្ថយការស្លាប់ និងរបួសបណ្តាលមកពីគ្រោះថ្នាក់ចរាចរណ៍។
ទោះជាយ៉ាងណាក្តីលោក គឹម បញ្ញា ក៏នៅតែចង់ឃើញក្រសួងសាធារណការ និងដឹកជញ្ជូន និងដៃគូពាក់ព័ន្ធ បន្តបំពាក់ឧបករណ៍ទាំងនេះឱ្យបានច្រើន និងត្រឹមត្រូវនៅតាមតំបន់ ឬចំណុចប្រឈមដែលបង្កគ្រោះថ្នាក់ខ្ពស់ដទៃទៀត។
លោកបានបញ្ជាក់ថា៖ «ខ្ញុំវាយតម្លៃខ្ពស់ដែលក្រុមហ៊ុនតាមរយៈអង្គការ JICA ដែលគាត់បានជួយឧបករណ៍សម្រាប់ឱ្យអ្នកបើកបរនៅពេលយប់មើលឃើញស្ថានភាពផ្លូវច្បាស់ ដើម្បីបង្កើនការប្រុងប្រយ័ត្ន។ យើងចង់ឱ្យមានការបំពាក់ឱ្យបានច្រើនបន្ថែមទៀតនៅតាមផ្លូវកោង ផ្លូវប្រសព្វ ផ្លូវចេញពីភូមិ ឬផ្លូវដែលប្រើប្រាស់ល្បឿនលឿន ហើយទន្ទឹមនឹងហ្នឹងដែរ យើងក៏ត្រូវការស្លាកសញ្ញា គំនូសសញ្ញា ហើយយើងត្រូវការរបាំង ឬខឿនបែងចែកទ្រូងផ្លូវផងដែរ»។
ពាក់ព័ន្ធនឹងស្ថានភាពគ្រោះថ្នាក់ចរាចរណ៍ យោងរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោកបានឱ្យដឹងថា នៅក្នុងឆ្នាំ ២០២២ កន្លងមក ករណីគ្រោះថ្នាក់ចរាចរណ៍ផ្លូវគោក បានកើតឡើងចំនួន ២ ៩៧៦ ករណី ដោយក្នុងនោះ បានបណ្ដាលឱ្យមានអ្នកស្លាប់មានចំនួន ១ ៧០៩ នាក់ និងរងរបួសជាង ៤ ពាន់នាក់។ ក្នុងនោះ ករណីគ្រោះថ្នាក់ចរាចរណ៍ដែលបានបញ្ជូនទៅកាន់តុលាការមានចំនួន ១ ០២៧ ករណី ដោយបានដោះស្រាយចំនួន ១២១ ករណី និងកំពុងអង្កេតចំនួន ៦៦៤ ករណី៕
.jpg)
