វេទិកាតុមូលស្តីពី ការប្រាស្រ័យទាក់ទងដោយអហិង្សា និងការដាក់វិន័យបែបវិជ្ជមានក្នុងគ្រួសារ។ រូបថត plan international
ភ្នំពេញៈ វេទិកាតុមូលស្តីពី«ការប្រស្រ័យទាក់ទងដោយអហិង្សា និងការដាក់វិន័យបែបវិជ្ជមានក្នុងគ្រួសារ» ជជែកពីវិធីសាស្ត្រចិញ្ចឹមកូនបែបវិជ្ជមាន ដើម្បីកូនៗ លូតលាស់ធំធាត់ប្រកបដោយសុខុមាលភាពល្អទាំងផ្លូវកាយ និងផ្លូវចិត្ត ខណៈវេទិកាជំរុញឱ្យអាណាព្យាបាលគ្រប់រូបចូលរួមលើកកម្ពស់ការអនុវត្តសកម្មភាពវិជ្ជមាននៅក្នុងគ្រួសារ។
នៅថ្ងៃទី២០ ខែកញ្ញានេះ អង្គការបណ្តាញទូរស័ព្ទជំនួយកុមារកម្ពុជា ដែលទទួលបានការគាំទ្រពីអង្គការភ្លែនអន្តរជាតិកម្ពុជា បានរៀបចំវេទិកាតុមូលស្តីពីការប្រស្រ័យទាក់ទងដោយអហិង្សា និងការដាក់វិន័យបែបវិជ្ជមានក្នុងគ្រួសារ ដែលមានការចូលរួមពីសំណាក់អាណាព្យាបាល និងយុវជនមួយចំនួននៅខេត្តសៀមរាប ហើយកម្មវិធីនេះ ក៏មានការផ្សាយបន្តផ្ទាល់តាមរយៈបណ្តាញសង្គមហ្វេសប៊ុកផងដែរ។
អង្គការបណ្តាញជំនួយកុមារកម្ពុជា បានអះអាងថា វេទិកានេះ បង្កើតឡើងដើម្បីបង្កើនចំណេះដឹង និងលើកកម្ពស់ការអនុវត្តនៃការប្រស្រ័យទាក់ទងដោយអហិង្សា និងការដាក់វិន័យវិជ្ជមាននៅក្នុងគ្រួសារ ហើយក៏ដើម្បីចែករំលែក និងរៀនសូត្រពីបទពិសោធន៍ល្អៗនៃការចិញ្ចឹមកូនបែបវិជ្ជមានដើម្បីកូនៗ លូតលាស់ធំធាត់ប្រកបដោយសុខុមាលភាពល្អទាំងផ្លូវកាយ និងផ្លូវចិត្តផងដែរ។
លោក កូយ ចំរើន ប្រធានកម្មវិធីនៃអង្គការបណ្តាញជំនួយកុមារកម្ពុជា បានលើកឡើងថា តាមការសិក្សាជ្រាវជ្រាវ បានរកឃើញថា អ្នកដែលប្រើប្រាស់ហិង្សាលើកុមារមុនគេ គឺភាគច្រើនជាម្តាយ បន្ទាប់មកគឺឪពុក ហើយជាបន្តបន្ទាប់ នឹងបន្តទៅដល់សមាជិកដទៃទៀត ដែលអាចប្រើប្រាស់អំពើហិង្សាក្នុងគ្រួសារ។ ដោយសារតែមើលឃើញពីលទ្ធផលបែបនេះហើយ ទើបលោក អះអាងថា វេទិកាក្នុងពេលនេះ គឺចង់ឆ្លុះបញ្ចាំងអំពីរបៀប ឬវិធីសាស្ត្រនៃការបង្រៀនកុមារ ហើយធ្វើការផ្លាស់ប្តូរដើម្បីឈានទៅរកការចិញ្ចឹមកូនបែបវិជ្ជមាន។
លោក បានបញ្ជាក់ថា៖«ធាតុសំខាន់ដើម្បីអាចជួយកុំឱ្យមាន ឬកាត់បន្ថយអំពើហិង្សាក្នុងគ្រួសារបាន លុះត្រាតែប្តីប្រពន្ធ និងសមាជិកក្នុងគ្រួសារ យល់អំពីរបៀបនៃការចិញ្ចឹមកូន។ កាលណាគាត់យល់អំពីរបៀបចិញ្ចឹមកូននោះ នឹងអាចកាត់បន្ថយអំពើហិង្សា ព្រោះនៅពេលគាត់ចេះគ្រប់គ្រងកំហឹង មិនកើតមានអំពើហិង្សាទេ។ អ៊ីចឹងបានលើកយកប្រធានបទនេះមកជជែក»។
លោក កូយ ចំរើន បាននិយាយថា ការដាក់វិន័យ គឺជារឿងមួយចាំបាច់មានសម្រាប់គ្រួសារ ប៉ុន្តែវិន័យខ្លះ ដែលមិនល្អ ឬបែបហិង្សា ដូចជាការជេរ ការស្តី និងការបន្ទោស ហើយវិន័យទាំងនេះនឹងភ្ជាប់ជាមួយនឹងកំហឹង ដែលនាំឱ្យកើតមានអំពើហិង្សាបាន។
លោក បានថ្លែងណែនាំពីរបៀបចិញ្ចឹមកូនបែបវិជ្ជមានថា ភាពអហិង្សា គឺឪពុកម្ដាយ អាណាព្យាបាល ឬអ្នកថែទាំកូន មិនគួរប្រើទម្រង់ណាមួយនៃអំពើហិង្សាលើកូន ឬកុមារ រួមមានអំពើហិង្សា ផ្លូវកាយ ផ្លូវចិត្ត ផ្លូវភេទ និងការមិនអើពើលើកុមារនោះទេ។
លោក បានបន្តថា សមាជិកគ្រួសារ គួរប្រកាន់ខ្ជាប់ឥរិយាបថអហិង្សា ដោយប្រើពាក្យពេចន៍ល្អៗទៅកាន់កូននៅពេលពួកគេមានកំហុស និងណែនាំកូនដោយអហិង្សា ព្រោះជាវិធីសាស្ត្រល្អបំផុតដែលម្តាយឪពុកសម័យទំនើបគួរប្រកាន់ខ្ជាប់។ បន្ថែមពីនេះ លោក ណែនាំឱ្យផ្តោតទៅលើដំណោះស្រាយ ដោយការស្ដាប់ បង្ហាញហេតុផល ពិភាក្សា និងការស្វែងរកវិធី ឬរបៀបណាមួយ ដើម្បីដោះស្រាយបញ្ហាដោយសន្តិវិធីតាមបែបវិជ្ជមានដែលផ្តល់តម្លៃដល់ការចូលរួម យល់ព្រម និងការចរចាគ្នាជាមួយកុមារ។
លោក កូយ ចំរើន ថ្លែងថា ការគោរព ការផ្ដោតលើដំណាក់កាលលូតលាស់ និងអភិវឌ្ឍន៍កុមារ ដោយផ្អែកលើអនុសញ្ញាអង្គការសហប្រជាជាតិស្ដីពីសិទ្ធិកុមារ ដែលបង្ហាញថា សិទ្ធិកុមារ គឺជាអ្វីៗដែលកុមារមាន និងអ្វីដែលមនុស្សទទួលខុសត្រូវលើកុមារ ដើម្បីធានាថា ពួកគេមានសុវត្ថិភាព សុខភាពល្អ សប្បាយរីករាយ ទទួលការអប់រំ និងនិយាយអ្វីដែលមានសារៈសំខាន់សម្រាប់ពួកគេ។
លោក បានបញ្ជាក់ថា៖«យើងចង់ឃើញសហគមន៍យើង១ មានបរិស្ថានសុវត្ថិភាព ចៀសផុតពីការរំលោភបំពានកុមារក្នុងគ្រួសារ និងសាលារៀន ដោយការដាក់វិន័យបែបវិជ្ជមាន។ នៅផ្ទះម្តាយប្រើប្រាស់វិធីសាស្ត្រតាមបែបវិជ្ជមាន ពេលកូនធ្វើលំហាត់ ចេះនិយាយល្អជាមួយ។ បើកូនទារនេះទារនោះ ចេះពន្យល់ហេតុផលទៅគាត់»។
លោក យី គឹមថាន នាយករងប្រចាំប្រទេសទទួលបន្ទុកកម្មវិធីនៃអង្គការភ្លែនអន្តរជាតិ បានអះអាងថា បើយោងតាមការស្រាវជ្រាវ និងអង្កេតវិទ្យាសាស្ត្ររបស់រដ្ឋាភិបាល កាលពីឆ្នា២០២១ និងឆ្នាំ២០២២ បានបង្ហាញថា កុមារមានអាយុពី១ ឆ្នាំ ដល់អាយុ១៤ ឆ្នាំ មានបទពិសោធន៍ទទួលរងអំពើហិង្សាក្នុងគ្រួសារដល់ទៅ៦៦ ភាគរយ។
លោក បានបន្តថា បើធៀបនឹងការសិក្សារបស់ក្រសួងកិច្ចការនារីកាលពីឆ្នាំ២០១៣ ដែលមានតែ៦០ភាគរយ នោះបង្ហាញថា ក្នុងរយៈពេលជិត ១០ ឆ្នាំ កន្លងមកនេះ អំពើហិង្សាលើកុមារ មិនមានធា្លក់ចុះនោះទេ ហើយបែរជាកើនឡើងទៅវិញ ស្របពេលអាណាព្យាបាលប្រមាណ ២៧ ភាគរយ នៅតែយល់ថា ការអប់រំកូនរបស់ពួកគេ ដើម្បីទទួលបានជោគជ័យក្នុងជីវិត គឺមានតែការដាក់ទណ្ឌកម្ម។
លោក យី គឹមថាន ថ្លែងថា៖«វេទិកាតុមូលក្នុងពេលនេះ គឺមានសារៈសំខាន់ណាស់ ដើម្បីអប់រំទៅដល់អាណាព្យាបាល និងសាធារណជនឱ្យពួកគាត់ បានដឹងថា មិនមែលទាល់តែប្រើទណ្ឌកម្មទៅលើក្មេងទើបអាចកែប្រែក្មេងបាននោះទេ។ យើងមានវិធីសាស្ត្រច្រើនណាស់ ហើយក្នុងវេទិការបស់យើង គឺមានបង្ហាញពីបទពិសោធន៍ ក៏ដូចជាបង្ហាញពីវិធីសាស្ត្រផ្សេងៗក្នុងការអប់រំកូនតាមបែបវិជ្ជមាន»៕
.jpg)
