លោក Patrick Murphy ពេលជួបអ្នកសារព័ត៌មាននៅខេត្ដសៀមរាប កាលពីថ្ងៃទី២១ កញ្ញា ។ រូបថត US Embassy
ភ្នំពេញៈឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោកPatrick Murphy បានដឹកនាំគណៈប្រតិភូស្ថានទូតចំនួនជាង ៦០ នាក់ ទៅបំពេញទស្សនកិច្ចទៅខេត្តសៀមរាប រយៈពេល ៥ ថ្ងៃ ចាប់ពីថ្ងៃទី១៨ ដល់ថ្ងៃទី២២ ខែកញ្ញា ដើម្បីទាញការចាប់អារម្មណ៍លើទំនាក់ទំនងទ្វេភាគី ភាពជាដៃគូ និងកម្មវិធីផ្សេងៗ ដែលលើកកម្ពស់ទំនាក់ទំនងរវាងប្រជាជន និងប្រជាជន ក្នុងអំឡុងពេល «សប្តាហ៍មិត្តភាពកម្ពុជា-អាមេរិកឆ្នាំ២០២៣»។
សេចក្តីប្រកាសព័ត៌មានស្ថានទូតអាមេរិក បញ្ជាក់នៅថ្ងៃទី២១ ខែកញ្ញា ថា៖ «កម្មវិធីរយៈពេល[ប្រមាណ] ១ សប្តាហ៍ ដែលមានសកម្មភាពការងារនានានៅតាមមូលដ្ឋាន ទស្សនកិច្ចផ្លូវការ និងការប្រស្រ័យជាមួយដៃគូក្នុងមូលដ្ឋាននៅសៀមរាបគឺជាការបន្តមិត្តភាពកម្ពុជា អាមេរិក ឆ្នាំ២០២៣ ដែលជាការអបអរទំនាក់ទំនងយូរអង្វែង រវាងប្រជាជន និងប្រជាជន ហើយនិងជាឱកាសក្នុងការជំរុញបន្ថែមដល់វិស័យសហប្រតិបត្តិការនានា រវាងសហរដ្ឋអាមេរិក និងប្រទេសកម្ពុជា»។
គណៈប្រតិភូបានប្រស្រ័យជាមួយនឹងដៃគូនៅខេត្តសៀមរាប និងអ្នកពាក់ព័ន្ធនៅក្នុងវិស័យសុខភាពសាធារណៈ អប់រំ វប្បធម៌ ធុរកិច្ច យុវជន ការដោះមីន ការពង្រឹងការអនុវត្តច្បាប់ និងសន្តិសុខដើម្បីបង្ហាញឱ្យឃើញពីការប្តេជ្ញាចិត្តរបស់រដ្ឋាភិបាលសហរដ្ឋអាមេរិកចំពោះប្រជាជនកម្ពុជាទាំងអស់។
លោក Murphy បានថ្លែងថា ៖ «យើងគឺជាស្ថានទូតអាមេរិកនៅទូទាំង២៥ រាជធានី ខេត្តនៅកម្ពុជា ហើយយើងមានសេចក្តីរំភើបរីករាយជាខ្លាំងក្នុងការនាំក្រុមបុគ្គលិកទាំងអស់របស់យើងមកកាន់ខេត្តភាគខាងជើងនេះ ជាទីដែលយើងមានកម្មវិធី និងការងារជាច្រើនជាមួយដៃគូនៅក្នុងមូលដ្ឋាន»។
សប្តាហ៍មិត្តភាពកម្ពុជា-អាមេរិក មានការចូលរួមពីមន្ត្រីក្រសួងការបរទេសអាមេរិក ទីភ្នាក់ងារផ្តល់ជំនួយអន្តរជាតិអាមេរិក(USAID) ក្រសួងការពារជាតិអាមេរិក មជ្ឈមណ្ឌលបង្ការនិងកម្ចាត់ជំងឺអាមេរិក ផ្នែកស៊ើបអង្កេតនៃក្រសួងសន្តិសុខមាតុភូមិអាមេរិក និងទីភ្នាក់ងារដទៃទៀតដែលមានតំណាងនៅស្ថានទូតអាមេរិក។
ក្នុងដំណើរទស្សនកិច្ចនេះមានការជួបជាមួយមន្ត្រីរដ្ឋបាលខេត្តសៀមរាប ពលរដ្ឋអាមេរិកដែលរស់នៅខេត្តសៀមរាប និស្សិតសាកលវិទ្យាល័យ ដែលជាអ្នកទទួលផលពីការកែលម្អនៃកម្មវិធីសិក្សាផ្នែកព័ត៌មានវិទ្យា ហើយនិងការបើកកម្មវិធីដែលផ្តល់អំណាចដល់ស្ត្រី និងយុវជនតាមរយៈកីឡា។
គណៈប្រតិភូរបស់ស្ថានទូតអាមេរិក ក៏បានរៀបចំពិធីជួបជុំដ៏ធំមួយ នៅថ្ងៃទី២០ កញ្ញា នៅខេត្តសៀមរាប ដើម្បីអបអរដល់ដៃគូរបស់ស្ថានទូត អ្នកធ្លាប់បានចូលរួមក្នុងកម្មវិធីផ្លាស់ប្តូររបស់រដ្ឋាភិបាលអាមេរិក និងសមភាគីសំខាន់ៗ ដែលមាននាទីសំខាន់ក្នុងការរក្សាទំនាក់ទំនងយូរអង្វែង រវាងប្រទេសកម្ពុជា និងសហរដ្ឋអាមេរិក៕
.jpg)
