គ្រូជំនាញពេលចូលរួមវគ្គបណ្ដុះបណ្ដាលពីការបញ្ជារ៉ូបូត។ រូបថត ក្រសួងអប់រំ
ភ្នំពេញៈ ក្រសួងអប់រំ យុវជន និងកីឡាបានរៀបចំវគ្គបណ្ដុះបណ្តាលស្តីពីការបញ្ជារ៉ូបូតដល់គ្រូបច្ចេកទេសជំនាញអគ្គិសនី អេឡិចត្រូនិក និងមេកានិកដើម្បីពង្រីកសមត្ថភាពនេះឱ្យស្របតាមបដិវត្តន៍ឧស្សាហកម្មឌីជីថល និងពង្រឹងការអនុវត្តកម្មវិធីសិក្សាផ្នែកអប់រំបច្ចេកទេសឱ្យកាន់តែប្រសើរ។
យោងតាមហ្វេសប៊ុកក្រសួងអប់រំយុវជន និងកីឡា កាលពីថ្ងៃទី ២០ ខែកញ្ញា ឆ្នាំ ២០២៣ បានឱ្យដឹងថា វគ្គបណ្តុះបណ្តាលស្តីពី«ការបញ្ជារ៉ូបូត» នេះ គឺធ្វើឡើងចាប់ពីថ្ងៃទី ២០ ដល់ថ្ងៃទី ២២ ខែកញ្ញា នៅខេត្តសៀមរាបដោយមានអ្នកចូលរួម ៥៥ នាក់មកពី ១៤ វិទ្យាល័យចំណេះទូទៅ និងបច្ចេកទេស។
នាឱកាសនោះ លោក ជួន ជីវិន រដ្ឋលេខាធិការក្រសួងអប់រំ យុវជន និងកីឡា បានឱ្យដឹងថា ក្រសួងបង្កើតវគ្គបណ្ដុះបណ្តាលនេះ គឺដើម្បីបង្កើនចំណេះដឹងនិងពង្រីកសមត្ថភាពលើជំនាញបច្ចេកទេសក្នុងការបញ្ជារ៉ូបូតស្របតាមបដិវត្តន៍ឧស្សាហកម្មឌីជីថល ៤.០។
លោកបានបន្តថា៖ «វគ្គបណ្តុះបណ្តាលនេះ ក៏អាចជួយបង្កើនស្វ័យប្រវត្តិកម្មដល់ផលិតកម្ម និងដើម្បីពង្រឹងការអនុវត្តកម្មវិធីសិក្សាផ្នែកអប់រំបច្ចេកទេសជំនាញអេឡិចត្រូនិក អគ្គិសនី និងមេកានិច ឱ្យកាន់តែមានប្រសិទ្ធភាពនៅតាមវិទ្យាល័យចំណេះទូទៅ និងបច្ចេកទេសផងដែរ»។
ជាមួយគ្នានេះលោក ជួន ជីវិន ក៏បានថ្លែងអំណរគុណដល់លោកនាយក និងមន្ត្រីទាំងអស់ នៃមជ្ឈមណ្ឌលតំបន់អាស៊ីអាគ្នេយ៍សម្រាប់ការអភិវឌ្ឍអប់រំបច្ចេកទេស (SEAMEO TED) ដែលបានខិតខំរៀបចំវគ្គបណ្តុះបណ្តាលនេះឡើងដោយមានការចូលរួមយ៉ាងសកម្មពីភាគីពាក់ព័ន្ធក្នុងស្មារតីសម្រេចចក្ខុវិស័យ និងបេសកកម្មរួមរបស់រាជរដ្ឋាភិបាលកម្ពុជា។
ដោយផ្អែកលើការវិវឌ្ឍផ្នែកបច្ចេកវិទ្យាបច្ចុប្បន្ន លោក ជួន ជីវិន បានបង្ហាញក្តីសង្ឈឹមថា សិក្ខាកាមទាំងអស់នឹងទទួលបានចំណេះដឹងថ្មីៗ ហើយសម្រួចជំនាញរបស់ខ្លួនតាមរយៈការចែករំលែក និងផ្ទេរចំណេះដឹងដែលទទួលបានទៅដល់លោកគ្រូ អ្នកគ្រូ ដែលពុំទាន់មានឱកាសចូលរួមឬទទួលបានវគ្គបណ្តុះបណ្តាលនេះ ជាពិសេស គឺបង្រៀនក៏ដូចសិស្សានុសិស្សនៅតាមសាលាប្រកបដោយប្រសិទ្ធភាពខ្ពស់ផងដែរ។
ជុំវិញរឿងនេះលោកគង់ សំនៀងប្រធានសហព័ន្ធសេវាអប់រំកម្ពុជាបានថ្លែងនៅថ្ងៃទី ២១ ខែកញ្ញាថា លោកគាំទ្រចំពោះសកម្មភាពដែលជួយពង្រឹង និងពង្រីកសមត្ថភាពដល់គ្រូ ជាពិសេសលើជំនាញបច្ចេកទេសនានា។
លោកបានបន្តថា៖ «សារៈសំខាន់នៃការអប់រំបណ្ដុះបណ្ដាលបច្ចេកទេសដល់គ្រូនឹងធ្វើឱ្យគ្រូមានសមត្ថភាពគ្រប់គ្រាន់អាចបន្តអប់រំទៅកាន់សិស្សានុសិស្សកាន់តែមានភាពច្បាស់លាស់ ត្រឹមត្រូវ មិនតែប៉ុណ្ណោះការបណ្តុះបណ្តាលជំនាញបច្ចេកទេសក៏ជាការរួមចំណែកអភិវឌ្ឍន៍កម្លាំងពលកម្មជំនាញប្រកបដោយគុណភាព និងប្រសិទ្ធភាពឱ្យឆ្លើយតបទៅនឹងតម្រូវការទីផ្សារការងារនៅក្នុង និងក្រៅប្រទេសផងដែរ»។
បើតាមក្រសួងអប់រំ ការអប់រំបច្ចេកទេសបានក្លាយជាគោលនយោបាយ និងផែនការអាទិភាពមួយរបស់រាជរដ្ឋាភិបាលកម្ពុជានៃអាណត្តិទី៧ ក្រោមការដឹកនាំរបស់លោកនាយករដ្ឋមន្ត្រីហ៊ុន ម៉ាណែត ។ ហេតុនេះដើម្បីសម្រេចគោលដៅ និងគោលនយោបាយអភិវឌ្ឍន៍ជាតិនេះ ក្រសួងអប់រំ ក៏បានប្តេជ្ញាបន្តក្នុងការអភិវឌ្ឍធនធានមនុស្សកម្ពុជាតាមរយៈការពង្រឹងគុណភាពនៃការអប់រំវិទ្យាសាស្ត្រ បច្ចេកវិទ្យា និងការបណ្តុះបណ្តាលបច្ចេកទេស និងវិជ្ជាជីវៈឱ្យកាន់តែខ្លាំងថែមទៀត៕
.jpg)
