.jpg)
លោក ស៊ុន ចាន់ថុល (កណ្តាល) ក្នុងសន្និសីទពិភពម៉ាឡាយូ ពិភពអ៊ិស្លាម កាលពីថ្ងៃទី២៣ ខែកញ្ញា ។ រូបថត DPM
ភ្នំពេញៈ លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC )បានលើកទឹកចិត្ត និងអំពាវនាវដល់សហគ្រិនជាសមាជិកអង្គការមូស្លីម DMDI ទាំងអស់ ពិចារណាចូលមកវិនិយោគនៅកម្ពុជា ដោយហេតុថា កម្ពុជា ផ្តល់ការលើកទឹកចិត្តខ្ពស់ ដល់វិនិយោគិនទាំងអស់ អាចចូលមកវិនិយោគដោយបើកចំហ លើគ្រប់វិស័យ និងដោយគ្មានការរឹតបន្តឹងលើកម្មសិទ្ធិ។
ការថ្លែងរបស់លោក ស៊ុន ចាន់ថុល នេះ ធ្វើឡើងនៅក្នុងសន្និសីទពិភពម៉ាឡាយូ ពិភពអ៊ិស្លាម (DMDI) លើកទី២១ ដែលត្រូវបានធ្វើឡើងនៅកម្ពុជា ដើម្បីរួមចំណែកអភិវឌ្ឍសេដ្ឋកិច្ចសង្គម តាមរយៈការចូលរួមរបស់ប្រតិភូ អ្នកវិនិយោគ និងធុរជនបរទេស ពីបណ្តាប្រទេសជាសមាជិករបស់ DMDI កាលពីថ្ងៃទី២៣ ខែកញ្ញា ឆ្នាំ២០២៣។ នេះបើតាមការប្រកាសដោយក្រុមប្រឹក្សាអភិវឌ្ឍន៍កម្ពុជា (CDC )។
សន្និសីទពិភពម៉ាឡាយូ ពិភពអ៊ិស្លាម (DMDI) នេះ ត្រូវបានរៀបចំឡើងដើម្បីចូលរួមអភិវឌ្ឍសេដ្ឋកិច្ចសង្គម តាមរយៈការចូលរួមរបស់ប្រតិភូ អ្នកវិនិយោគ និងធុរជនបរទេស ពីបណ្តាប្រទេសជាសមាជិករបស់ DMDI ដែលក្នុងនោះ ក៏មានការផ្តោតលើឧស្សាហកម្មហាឡាលនៅកម្ពុជាផងដែរ។
លោកស៊ុន ចាន់ថុល បានថ្លែងថា កម្ពុជាក៏មានកម្លាំងពលកម្ម និងជំនាញ សុទ្ធសឹងតែជាយុវជនវ័យក្មេង និងប្រកបដោយថាមពល ហើយក្នុងនោះ រាជរដ្ឋាភិបាលបានផ្ដល់ការយកចិត្តទុកដាក់ដល់សហគ្រិនដែលជាស្រ្តីផងដែរ។
លោកបានបញ្ជាក់ថា៖ «កម្ពុជាជាប្រទេសនៅចំណុចកណ្ដាលនៃតំបន់អាស៊ាន និងនៅក្នុងមហាអនុតំបន់ទន្លេមេគង្គ (GMS) ដែលប្រមូលផ្ដុំទៅដោយមនុស្សជាង ៦៥០លាននាក់ ព្រមទាំងជាសមាជិកដៃគូសេដ្ឋកិច្ច និងកិច្ចព្រមព្រៀងពាណិជ្ជកម្មសេរីផ្សេងៗទៀត ហើយសំខាន់ជាងនេះ គឺការកសាងហេដ្ឋារចនាសម្ព័ន្ធតភ្ជាប់សំខាន់ៗទាំងក្នុងប្រទេស តភ្ជាប់ទៅប្រទេសជិតខាង និងទៅកាន់ពិភពលោក គឺសុទ្ធសឹងតែផ្ដល់បរិយាកាសល្អដល់វិនិយោគិនឱ្យចូលមកវិនិយោគនៅកម្ពុជា»។
លោកបានបន្ថែមថា រាជរដ្ឋាភិបាលកម្ពុជា មានចក្ខុវិស័យលើកកម្ពស់ទំនើបកម្មនៃរចនាសម្ព័ន្ធឧស្សាហកម្ម ពីឧស្សាហកម្មដែលពឹងផ្អែកលើកម្លាំងពលកម្ម ទៅជាឧស្សាហកម្មជំនាញត្រឹមឆ្នាំ២០២៥ តាមរយៈការតភ្ជាប់ទៅកាន់ខ្សែចង្វាក់តម្លៃសកល ការធ្វើសមាហរណកម្មទៅក្នុងបណ្តាញផលិតកម្មក្នុងតំបន់ និងការអភិវឌ្ឍខ្សែចង្វាក់ផ្គត់ផ្គង់ផលិតកម្ម ស្របតាមការពង្រឹងសមត្ថភាពប្រកួតប្រជែង និងផលិតភាពនៃឧស្សាហកម្មក្នុងស្រុក ខណៈពេលដែលកម្ពូជាកំពុងបន្តអភិវឌ្ឍឧស្សាហកម្មទំនើបដោយផ្អែកលើបច្ចេកវិទ្យា និងទិន្នន័យ។
លោក លឹម ហេង អនុប្រធានសភាពាណិជ្ជកម្មកម្ពុជា បានថ្លែងនៅថ្ងៃទី២៤ ខែកញ្ញាថា ខាងវិស័យឯកជនកម្ពុជា តែងតែស្វាគមន៍ជានិច្ចចំពោះអ្នកវិនិយោគមកពីគ្រប់ទិសទី ដោយរាជរដ្ឋាភិបាលកម្ពុជា បានបើកទូលាយចំពោះការវិនិយោគដោយមិនប្រកាន់ជាតិសាសន៍នោះឡើយ។
លោកបញ្ជាក់ថា ៖ «នៅកម្ពុជាមានបងប្អូនមូស្លីមច្រើនគួរសមដែរ ដោយពួកគាត់ត្រូវបានការយកចិត្តទុកដាក់ យ៉ាងខ្លាំងពីរាជរដ្ឋាភិបាលយើង។ ខ្ញុំយល់ថា បើមានការវិនិយោគលើឧស្សាហកម្មហាឡាលនៅកម្ពុជាកាន់តែច្រើន ជាការល្អ ព្រោះថា នេះការបង្កលក្ខណៈងាយស្រួលដល់បងប្អូនមូស្លីម ជាពិសេសការវិនិយោគលើការនាំចូលគ្រឿងឧបភោគបរិភោគ និងការផលិតចំណីអាហារដែលមានស្លាកសញ្ញាហាឡាល់»។
សូមជម្រាបថា ពិភពម៉ាឡាយូ ពិភពអ៊ិស្លាម DuniaMelayuDunia Islam (DMDI) ជាអង្គការមិនមែនរដ្ឋាភិបាល បង្កើតឡើងក្នុងឆ្នាំ២០០០ នៅប្រទេសម៉ាឡេស៊ី ក្នុងគោលបំណងដើម្បីពង្រឹងសាមគ្គីភាពរវាងបណ្តាប្រទេសសមាជិក និងប្រជាជនមូស្លីមម៉ាឡេ ពិសេសពាណិជ្ជករ ដូចជាការលើកកម្ពស់កិច្ចសហប្រតិបត្តិការលើគ្រប់វិស័យ និងអភិវឌ្ឍក្នុងចំណោមប្រជាជនមូស្លីមម៉ាឡេ ស៊ីជាមួយប្រជាជនប្រទេសផ្សេងៗ ដើម្បីជំរុញវឌ្ឍនភាព និងការអភិវឌ្ឍលើវិស័យជាច្រើន។
វិស័យទាំងនោះ មានដូចជា សេដ្ឋកិច្ច អភិវឌ្ឍន៍សហគមន៍ អប់រំ យុវជន និងកីឡា វិទ្យាសាស្ត្រ និងបច្ចេកវិទ្យា វប្បធម៌ចម្រុះ ឃោសនាអប់រំអ៊ិស្លាម អភិវឌ្ឍន៍ស្ត្រី ទេសចរណ៍ សុខភាព និងអនាម័យ និងព័ត៌មានវិទ្យា។
កាលពីឆ្នាំ២០១២ កម្ពុជាត្រូវបានបញ្ចូលជាសមាជិក ហើយអង្គការនេះ មានសមាជិកចំនួន ២២ប្រទេសផ្សេងទៀតរួមមាន ថៃ សិង្ហបុរី ម៉ាឡេស៊ី ចិន ឥណ្ឌូនេស៊ី អារ៉ាប៊ីសាអ៊ូឌីត ប្រ៊ុយណេ ហ្វីលីពីន ទីម័រខាងកើត អង់គ្លេស ម៉ាដាហ្គាស្ការ អូស្ត្រាលី អាហ្វ្រិកខាងត្បូង អេហ្ស៊ីប ហូឡង់ ម៉ាល់ឌីវ បង់ក្លាដែស កាណាដា បូស្ន៊ីហឺហ្សេហ្គោវីណា នូវែលសេឡង់ ស្រីលង្កា និងស៊ូរីណាម៕
