អាជីវករលក់ដូងនៅស្រុកឈូក ខែកំពត នាពេលកន្លងទៅ។ រូបថត ហេង ជីវ័ន
កំពត/កែបៈ អង្គការ Aide et Action ទទួលបានសំណើពីអាជីវករ និងអ្នកលក់ដូរពីតំបន់គោលដៅជាង ១២០ សំណើ ដើម្បីស្នើសុំថវិកាគាំទ្រដល់អាជីវកម្ម បន្ទាប់ពីប្រកាសផ្តល់ឱកាសទទួលបានថវិកាខ្នាតតូចចាប់ពី ១០០ ដុល្លារ ដល់ ៥០០ ដុល្លារ ក្នុងការផ្គត់ផ្គង់អាជីវកម្មនៅតាមតំបន់ឆ្នេរក្នុងខេត្តកំពត និងខេត្តកែប។
គម្រោងផ្តល់ជំនួយគាំទ្រថវិកាដល់អាជីវករ ឬអ្នកលក់ដូរតាមដងផ្លូវនេះ ត្រូវបានសហការអនុវត្តដោយអង្គការសម្ព័ន្ធភាពដៃគូ ដើម្បីការអភិវឌ្ឍតាមបែបប្រជាធិបតេយ្យទទួលបានមូលនិធិគាំទ្រពីសហភាពអឺរ៉ុប តាមរយៈអង្គការ Aide et Action SEA-Cambodia ក្នុងគម្រោង “សម្ព័ន្ធភាពដើម្បីការអភិវឌ្ឍប្រកបដោយចីរភាព និងការគាំទ្រសំឡេង ដើម្បីសមធម៌សង្គម (CO-SAVED)”។
តាមការប្រកាស កញ្ចប់ថវិកាដែលនឹងផ្តល់ជូនពលរដ្ឋ គឺមានសរុប ១២៥ កញ្ចប់ មានទឹកប្រាក់សរុប ៣ ម៉ឺនដុល្លារដោយបែងចែកជា ៤ ប្រភេទ។ ពលរដ្ឋដែលអាចទទួលបានកញ្ចប់ថវិកានេះ គឺត្រូវបានកំណត់ជាពលរដ្ឋដែលកំពុងរស់នៅក្នុងសង្កាត់ ឬឃុំមួយចំនួនក្នុងក្រុងកែប និងស្រុកដំណាក់ចង្អើរនៃខេត្តកែប និងឃុំមួយចំនួនក្នុងស្រុកទឹកឈូ និងស្រុកកំពង់ត្រាចនៃខេត្តកំពតដែលកំពុង ឬធ្លាប់ប្រកបរបរនេសាទ ឬជាសមាជិកគ្រួសារ។
តាមការប្រកាសបានបញ្ជាក់ថា៖ «ប្រភេទទី១ មានកញ្ចប់ថវិកា ១០០ ដុល្លារ ចំនួន ៥០ កញ្ចប់ សម្រាប់ការជំរុញការលក់របស់អាជីវករ។ ប្រភេទទី២ មានកញ្ចប់ថវិកា ២០០ ដុល្លារ ចំនួន ២៥ កញ្ចប់ សម្រាប់ការផ្គត់ផ្គង់ឧបករណ៍ប្រើប្រាស់ក្នុងអាជីវកម្ម។ ប្រភេទទី៣ មានកញ្ចប់ថវិកា ៣០០ ដុល្លារ ចំនួន ២៥ កញ្ចប់ សម្រាប់ចាប់ផ្តើមអាជីវកម្ម ឬពង្រីកអាជីវកម្ម និងប្រភេទទី៤ មានកញ្ចប់ថវិកា ៥០០ ដុល្លារ ចំនួន ២៥ កញ្ចប់ ទាក់ទងនឹងការចាប់ផ្តើម ឬពង្រីកអាជីវកម្ម»។
លោក ថាន់ សាមឌី មន្ត្រីគ្រប់គ្រងផ្នែកផ្តល់ទុនវិនិយោគនៃអង្គការ Aide et Action បានប្រាប់ ភ្នំពេញ ប៉ុស្តិ៍ នៅថ្ងៃទី ២៤ ខែកញ្ញាថា គិតត្រឹមថ្ងៃទី ២៣ ខែកញ្ញា មានពលរដ្ឋ ១២៥ នាក់ ឬគ្រួសារបានដាក់សំណើ ដើម្បីស្នើសុំកញ្ចប់ថវិកាទាំងនេះទៅតាមប្រភេទនីមួយៗ។ លោកបានឱ្យដឹងថា គម្រោងនេះ គឺធ្វើឡើងដើម្បីចូលរួមចំណែកលើកកម្ពស់ការអភិវឌ្ឍសេដ្ឋកិច្ចមូលដ្ឋានក្នុងតំបន់ឆ្នេរក្នុងខេត្តកែបនិងខេត្តកំពត ឱ្យប្រសើរឡើង។
លោកថា ពលរដ្ឋដែលបានដាក់សំណើគឺត្រូវឆ្លងកាត់វគ្គបណ្តុះបណ្តាល ១ ថ្ងៃជាមុនសិន មុននឹងក្រុមការងារវាយតម្លៃក្នុងការផ្តល់កញ្ចប់ថវិកាដល់ពួកគាត់។
លោកថា៖ «ថវិកាយើងនេះ គឺមានមុខព្រួញដើម្បីជួយទៅលើអាជីវករដែលពឹងផ្អែកលើសេដ្ឋកិច្ចក្រៅប្រព័ន្ធ និងអ្នកពឹងអាស្រ័យទៅលើផលនេសាទ ព្រោះយើងឃើញមួយរយៈនេះ មានផលប៉ះពាល់នឹងការប្រែប្រួលអាកាសធាតុដែលនាំឱ្យពួកគាត់ធ្លាក់ការរកចំណូល...»។
ទន្ទឹមនឹងនេះ លោក ថាន់ សាមឌី ក៏រំពឹងដែរថា នៅពេលអាជីវកម្មនិងចំណូលពលរដ្ឋ ត្រូវបានធានា នោះគ្រួសាររបស់ពួកគាត់ក៏នឹងធានាដល់ការសិក្សារបស់កូនៗដែលនឹងមិនដាក់សម្ពាធដល់ពួកគេដែលអាចនឹងបោះបង់ការសិក្សា។
លោក សុខ ឌីណា ជាពលរដ្ឋម្នាក់រស់នៅក្នុងសហគមន៍កែបដែលបានស្នើកញ្ចប់ថវិកាពង្រីកអាជីវកម្មបានថ្លែងថា ដោយសារការលក់ដូរស្ងប់ស្ងាត់ គ្មានភ្ញៀវចំណូលក៏ធ្លាក់ចុះដែរ។ លោករំពឹងថា សំណើដែលលោកស្នើនេះនឹងទទួលបានដើម្បីយកទៅទប់ទល់ថ្លៃចំណាយដែលកំពុងតែមានការខ្វះខាត។
លោកថា៖ «ខ្ញុំមិនចង់បិទមុខរបរនេះទេ ហើយបើបិទទៅ ក៏មិនដឹងទៅរកស៊ីអ្វីដែរ។ បើបានថវិកាទាំងនេះយ៉ាងហោចណាស់ក៏បានបង្វិលថ្លៃដើមបានបន្តិចបន្តួចដែរ។ ខ្ញុំលក់រាល់ថ្ងៃបានចំណូលតិចទៅៗ ពេលខ្លះ មិនបាន ១០ ម៉ឺនរៀលផង។ អ៊ីចឹងបើបានមក ខ្ញុំក៏បានលុយបង្វិលទិញសម្ភារចូលបន្ត»។
តាមលោក ថាន់ សាមឌី វគ្គបណ្តុះបណ្តាលពលរដ្ឋដែលជាប់ក្នុងការដាក់សំណើស្នើកញ្ចប់ថវិកា នឹងធ្វើឡើងទៅលើសមាជិកប្រមាណជិតពាក់កណ្តាលនៅថ្ងៃទី ២៥ និង ២៦ ខែកញ្ញា រីឯអ្នកស្នើដទៃទៀតនឹងត្រូវរៀបចំឱ្យទទួលវគ្គបណ្តុះបណ្តាលនៅដើមខែក្រោយ៕
.jpg)
