លោក នេត្រ ភក្ត្រា ក្នុងពិធីចុះ MoU ជាមួយភាគីវៀតណាមពីថ្ងៃទី ២៤ កញ្ញា។ រូប ហ្វេសប៊ុក
ភ្នំពេញៈ កម្ពុជា និងបណ្តាប្រទេសមួយចំនួនក្នុងតំបន់បានបង្កើនកិច្ចប្រឹងប្រែងក្នុងការពង្រឹង និងពង្រីកកិច្ចសហប្រតិបត្តិការលើវិស័យព័ត៌មាន និងការផ្សព្វផ្សាយឱ្យកាន់តែទូលំទូលាយ ដោយក្នុងនោះក៏មានការពង្រឹងការប្រយុទ្ធប្រឆាំងព័ត៌មានក្លែងក្លាយផងដែរ។
ការប្តេជ្ញានេះ ធ្វើឡើងក្នុងជំនួបទ្វេភាគីរវាងលោក នេត្រ ភក្ត្រា រដ្ឋមន្ត្រីក្រសួងព័ត៌មានកម្ពុជា និងភាគីនៃបណ្តាប្រទេសទាំងនោះក្នុងឱកាសនៃកិច្ចប្រជុំរដ្ឋមន្ត្រីទទួលបន្ទុកព័ត៌មានអាស៊ានលើកទី១៦ និងកិច្ចប្រជុំពាក់ព័ន្ធ និងកិច្ចប្រជុំរដ្ឋមន្ត្រីទទួលបន្ទុកព័ត៌មានអាស៊ានបូក ៣ លើកទី៧ នៅទីក្រុងដាណាង ប្រទេសវៀតណាមពីថ្ងៃទី ២១ ដល់ថ្ងៃទី ២៤ ខែកញ្ញា។
កិច្ចប្រជុំទាំងនេះធ្វើឡើងក្រោមប្រធានបទ «ប្រព័ន្ធផ្សព្វផ្សាយ៖ ពីព័ត៌មានទៅចំណេះដឹងសម្រាប់អាស៊ានមានភាពធន់ និងឆ្លើយតប» ដែលផ្តោតលើការពង្រឹងកិច្ចសហប្រតិបត្តិការរវាងបណ្តាប្រទេសអាស៊ាន និងចិន ជប៉ុន និងកូរ៉េ ទាក់ទងនឹងគម្រោងមួយចំនួនដូចជា ការពង្រឹងសមត្ថភាព ការអភិវឌ្ឍធនធានមនុស្ស ការលើកស្ទួយកិច្ចសហប្រតិបត្តិការប្រព័ន្ធផ្សព្វផ្សាយ និងការលើកស្ទួយបណ្តាញទំនាក់ទំនងប្រព័ន្ធផ្សព្វផ្សាយ។
លោក នេត្រ ភក្ត្រា កាលពីថ្ងៃទី ២៣ ខែកញ្ញា បានជួបជាមួយលោក Sun Yeli រដ្ឋមន្ត្រីក្រសួងឃោសនាការនៃគណៈកម្មាធិការមជ្ឈិមបក្សកុម្មុយនីស្តចិន ដោយភាគីទាំង ២ បានគូសបញ្ជាក់ពីកិច្ចសហប្រតិបត្តិការលើវិស័យនេះ ឱ្យកាន់មានភាពទូលំទូលាយថែមទៀត។
រីឯក្រោយជួបជាមួយភាគីថៃ លោក នេត្រ ភក្ត្រា បានសរសេរលើទំព័រហ្វេសប៊ុកនៅថ្ងៃទី ២៣ ខែកញ្ញាថា៖ «ខ្ញុំបានទទួលជួបពិភាក្សាទ្វេភាគីជាមួយសមភាគីថៃដើម្បីពិនិត្យលើកិច្ចសហប្រតិបត្តិការរវាងក្រសួងព័ត៌មានកម្ពុជា និងថៃ និងជាពិសេសលើការប្រឆាំងនឹងព័ត៌មានក្លែងក្លាយ»។
ចំណែកជំនួបរវាងលោក នេត្រ ភក្ត្រា និងលោក Expedito Loro Dias Ximenes រដ្ឋមន្ត្រីទីស្តីការគណៈរដ្ឋមន្ត្រីទីម័រខាងកើតពីថ្ងៃទី ២២ ខែកញ្ញា ភាគីទីម័រខាងកើតបានស្នើសុំកិច្ចសហការលើការផ្លាស់ប្តូរបទពិសោធន៍និងដំណើរទស្សនកិច្ចរបស់អ្នកសារព័ត៌មានរបស់ទីម័រខាងកើតមកកម្ពុជា ដើម្បីស្វែងយល់ពីវិស័យព័ត៌មាននៅកម្ពុជា។
លោក នេត្រ ភក្ត្រា បានប្រកាសស្វាគមន៍ និងបានត្រៀមខ្លួនក្នុងការសហការជាមួយប្រទេសទីម័រខាងកើត។ ជាមួយនោះភាគីទាំង ២ ក៏បានពិភាក្សាលើការប្រឆាំងនឹងព័ត៌មានក្លែងក្លាយក្នុងសម័យឌីជីថលផងដែរ។
ចំណែកក្នុងជំនួបកាលពីថ្ងៃទី ២២ ខែកញ្ញា លោក នេត្រ ភក្ត្រា និងលោក Ahmad Fahmi bin Mohamed Fadzil រដ្ឋមន្ត្រីក្រសួងគមនាគមន៍និងឌីជីថលម៉ាឡេស៊ីក៏បានបញ្ជាក់ពីកិច្ចសហប្រតិបត្តិការរវាងក្រសួងទាំង ២ លើទិដ្ឋភាពប្រឆាំងនឹងព័ត៌មានក្លែងក្លាយ និងផ្លាស់ប្តូរបទពិសោធន៍គ្នាលើកិច្ចការព័ត៌មាននិងការផ្សព្វផ្សាយផងដែរ។
ចំពោះក្នុងជំនួបជាមួយសមភាគីម៉ាឡេស៊ី លោក នេត្រ ភក្ត្រា បានលើកឡើងថា៖ «ក្នុងបរិបទនៃសង្គមឌីជីថល និន្នាការនៃការទទួលព័ត៌មានរបស់ប្រជាពលរដ្ឋបច្ចុប្បន្ននេះពីតាមរយៈប្រព័ន្ធផ្សព្វផ្សាយទំនើប គឺបណ្តាញទំនាក់ទំនងសង្គមជាពិសេសពីហ្វេសប៊ុក និងតិកតុក។
ទន្ទឹមនឹងការផ្តល់នូវខ្លឹមសារសម្បូរបែប និងមានល្បឿនលឿន បណ្តាញសង្គមក៏បានធ្វើឱ្យមានបញ្ហានៃការបំពុលព័ត៌មានតាមរយៈការបង្កើតព័ត៌មានក្លែងក្លាយដែលមានចេតនាទុច្ចរិត»។
លោកថ្លែងថា ព័ត៌មានក្លែងក្លាយបានធ្វើឱ្យប៉ះពាល់អវិជ្ជមានដល់ប្រជាពលរដ្ឋក្នុងការទទួលបានព័ត៌មានត្រឹមត្រូវ និងធ្វើឱ្យប៉ះពាល់ដល់សង្គម ហើយពេលខ្លះបង្កើតជាបញ្ហាចលាចល និងបំផ្លាញកិត្តិយសបុគ្គល ឬធ្វើឱ្យមានការយល់ច្រឡំ និងបាត់បង់ជំនឿទុកចិត្តផងដែរ ហើយករណីនេះចាំបាច់ត្រូវសហការគ្នាក្នុងការបង្ការនិងទប់ស្កាត់ឱ្យខាងតែបាន។
ក្នុងជំនួបទ្វេភាគីរវាងលោក នេត្រ ភក្ត្រា និងលោក ង្វៀន ម៉ាញ់ហុង រដ្ឋមន្ត្រីក្រសួងព័ត៌មាននិងគមនាគមន៍វៀតណាម កាលពីថ្ងៃទី ២១ ខែកញ្ញា ភាគីវៀតណាមបានប្រកាសស្វាគមន៍ និងត្រៀមខ្លួនផ្តល់ការគាំទ្រលើការបណ្តុះបណ្តាលធនធានមនុស្សតាមរយៈការបញ្ជូនមន្ត្រីទៅបណ្តុះបណ្តាលនៅសាលាបណ្តុះបណ្តាលវិជ្ជាជីវៈសារព័ត៌មាននៅកម្ពុជា។
ហ្វេសប៊ុកដដែលបញ្ជាក់ថា៖ «រដ្ឋមន្ត្រីក្រសួងព័ត៌មាននៃប្រទេសទាំង ២ បានឯកភាពលើការងារសម្របសម្រួលកសាងច្រកព័ត៌មានសម្រាប់ប្រទេសទាំង ២ ដើម្បីផ្សព្វផ្សាយព័ត៌មានគ្នាទៅវិញទៅមក និងធ្វើឱ្យពលរដ្ឋទាំង ២ ទទួលបានព័ត៌មានពីគ្នាទៅវិញទៅមកតាមរយៈការសហការរៀបចំដំណើរទស្សនកិច្ចទៅវិញទៅមករវាងក្រុមអ្នកកាសែតខ្មែរនៅវៀតណាម និងអ្នកកាសែតវៀតណាមមកកម្ពុជា ដើម្បីបង្កើនការផ្សព្វផ្សាយព័ត៌មានពីគ្នាទៅវិញទៅមក»។
ក្នុងឱកាសនោះលោក នេត្រ ភក្ត្រា និងលោក ង្វៀន ម៉ាញ់ហុង បានចុះហត្ថលេខាលើអនុស្សរណៈយោគយល់គ្នា ស្តីពីកិច្ចសហប្រតិបត្តិការលើវិស័យព័ត៌មាន ពង្រឹងកិច្ចសហប្រតិបត្តិការលើវិស័យសារព័ត៌មាន និងការផ្សព្វផ្សាយ។
រដ្ឋមន្ត្រីទទួលបន្ទុកព័ត៌មានអាស៊ាន និងអាស៊ានបូក ៣ បានចេញសេចក្តីថ្លែងការណ៍រួមដោយបញ្ជាក់ថា ក្នុងការឆ្លើយតបទៅនឹងទិដ្ឋភាពនៃការផ្លាស់ប្តូរយ៉ាងឆាប់រហ័សនៃព័ត៌មាន អង្គប្រជុំបានជំរុញឱ្យវិស័យសារព័ត៌មាន និងព័ត៌មានមានភាពធន់ និងឆ្លើយតបកាន់តែរឹងមាំ ដើម្បីក្លាយជាមធ្យោបាយសកម្មសម្រាប់ការសិក្សាពេញ ១ ជីវិត និងលើកកម្ពស់ការយល់ដឹង និងអក្ខរកម្មឌីជីថលសម្រាប់ពលរដ្ឋអាស៊ាន។
សេចក្តីថ្លែងការណ៍រួមលើកឡើងថា៖ «កិច្ចប្រជុំបានគូសបញ្ជាក់ពីសារៈសំខាន់នៃការផ្សព្វផ្សាយទាន់ពេលវេលា ត្រឹមត្រូវ ផ្អែកលើភ័ស្តុតាង និងព័ត៌មានដែលអាចជឿទុកចិត្តបាន ដើម្បីផ្តល់ដំណឹងទៅដល់សង្គមកាន់តែប្រសើរឡើង និងផ្តល់សិទ្ធិអំណាចដល់បុគ្គល សហគមន៍ និងសង្គម ព្រមទាំងបានអំពាវនាវឱ្យមានការពង្រឹងកិច្ចសហប្រតិបត្តិការក្នុងតំបន់ ដើម្បីគាំទ្រដល់ការបង្កើតបរិយាកាសអនឡាញដ៏អំណោយផលតាមរយៈការជំរុញឧត្តមភាពនៃអក្ខរកម្មព័ត៌មាននិងប្រព័ន្ធផ្សព្វផ្សាយ ព្រមទាំងផ្តល់ទំនាក់ទំនងជាសាធារណៈ និងជាយុទ្ធសាស្ត្រប្រកបដោយប្រសិទ្ធភាពសម្រាប់ប្រជាពលរដ្ឋ»៕
