លោក រ័ត្ន មុនី អគ្គនាយករងនៃអគ្គនាយកដ្ឋានពន្ធដារ (ឆ្វេង) និងលោក ឡុង ឌីម៉ង់ អភិបាលរងខេត្តព្រះសីហនុ ក្នុងសិក្ខាសាលាផ្សព្វផ្សាយច្បាប់ និងអនុក្រឹត្យស្ដីពីវិនិយោគនៃព្រះរាជាណាចក្រកម្ពុជា នៅខេត្តព្រះសីហនុ។ រូបថត អគ្គនាយកដ្ឋានពន្ធដារ
ភ្នំពេញៈ កម្ពុជា បានចុះហត្ថលេខាលើកិច្ចព្រមព្រៀងស្តីពីការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល (Double Taxation Agreement-DTA) ជាមួយប្រទេសចំនួន ១១ រួចហើយ ដោយក្នុងចំណោម នេះ មាន DTA ចំនួន ៩ កំពុងមានប្រសិទ្ធភាពអនុវត្ត។
សម្រាប់ DTA រវាងកម្ពុជា-តំបន់រដ្ឋបាលពិសេសម៉ាកាវ នឹងមានប្រសិទ្ធភាពអនុវត្តនៅ ខែមករា ឆ្នាំ២០២៤ និង DTA រវាងកម្ពុជា-តួកគី កំពុងស្ថិតក្នុងដំណាក់កាលបញ្ចប់នីតិវិធីចាំបាច់នានា។ នេះបើយោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ ដែលបានចេញផ្សាយនៅថ្ងៃទី២៥ ខែកញ្ញា ឆ្នាំ២០២៣ ស្តីពីសិក្ខាសាលាផ្សព្វផ្សាយច្បាប់ និងអនុក្រឹត្យស្ដីពីវិនិយោគនៃព្រះរាជាណាចក្រកម្ពុជា នៅខេត្តព្រះសីហនុ។
សេចក្តីប្រកាសព័ត៌មានបានបន្តថា ការចរចា DTA ជាមួយប្រទេសជាដៃគូវិនិយោគសំខាន់ៗ ធ្វើឡើងដើម្បីបំពេញកាតព្វកិច្ចក្រោមក្របខ័ណ្ឌអាស៊ាន ទាក់ទាញ និងសម្រួលការវិនិយោគនិងពាណិជ្ជកម្មអន្ដរជាតិ ព្រមទាំងទប់ស្កាត់ និងបង្ក្រាបការគេចវេះពន្ធទាំងក្នុងក្របខ័ណ្ឌជាតិ និងអន្តរជាតិ។
តាមរយៈសេចក្តីប្រកាសព័ត៌មានដដែលនេះ លោក រ័ត្ន មុនី អគ្គនាយករងនៃអគ្គនាយកដ្ឋានពន្ធដារ បានឱ្យដឹងថា DTA ចំនួន ១១ នោះរួមមានជាមួយ សិង្ហបុរី ចិន ថៃ ប្រ៊ុយណេ វៀតណាម ឥណ្ឌូនេស៊ី តំបន់រដ្ឋបាលពិសេសហុងកុង ម៉ាឡេស៊ី កូរ៉េខាងត្បូង តំបន់រដ្ឋបាលពិសេសម៉ាកាវ និងសាធារណរដ្ឋតួកគី។
លោកបានបញ្ជាក់ថា៖«DTA រវាងកម្ពុជា-តំបន់រដ្ឋបាលពិសេសម៉ាកាវ នឹងមានប្រសិទ្ធភាពអនុវត្តនៅថ្ងៃទី១ ខែមករា ឆ្នាំ២០២៤ខាងមុខ ខណៈDTA រវាងកម្ពុជា-តួកគី កំពុងតែស្ថិតក្នុងដំណាក់កាលបញ្ចប់នីតិវិធីចាំបាច់នានា ដើម្បីឱ្យកិច្ចព្រមព្រៀងនេះចូលជាធរមាន និងមានប្រសិទ្ធភាពអនុវត្ត»។
លោក ក៏បានលើកឡើងពីសារៈសំខាន់នៃច្បាប់និងអនុក្រឹត្យស្ដីពីវិនិយោគនៃព្រះរាជាណាចក្រកម្ពុជា ដែលជាក្របខ័ណ្ឌគតិយុត្តដែលមានភាពអំណោយផលសម្រាប់ការទាក់ទាញការវិនិយោគ និងការលើកទឹកចិត្តផ្នែកពន្ធដារសម្រាប់ការវិនិយោគឱ្យមានតម្លាភាព ភាពគ្រប់ជ្រុងជ្រោយ ភាពប៉ាន់ប្រមាណទុកជាមុនបាន ដោយគ្មានការរើសអើងនិងការប្រកួតប្រជែងដោយស្មើភាព ដើម្បីទាក់ទាញនិងលើកកម្ពស់ការវិនិយោគសំដៅអភិវឌ្ឍសង្គម-សេដ្ឋកិច្ចនៅកម្ពុជា។
លោក លឹម ហេង អនុប្រធានសភាពាណិជ្ជកម្មកម្ពុជា បានប្រាប់ឱ្យដឹងដែរថា កិច្ចព្រមព្រៀងមិនយកពន្ធត្រួតគ្នានេះ មានសារៈសំខាន់ខ្លាំងណាស់សម្រាប់អ្នកវិនិយោគ ជាពិសេសប្រទេសដែលមានពាណិជ្ជកម្មធំៗជាមួយកម្ពុជា គឺទាមទារឱ្យមានកិច្ចព្រមព្រៀងនេះ។
លោកបានបញ្ជាក់ថា៖«នៅពេលដែលមានកិច្ចព្រមព្រៀងនេះ វិនិយោគិនដែលចង់បង្វិលប្រាក់ចំណេញឱ្យប្រទេសគេវិញ គឺត្រឹមតែ១០ភាគរយប៉ុណ្ណោះ តែបើគ្មានទេត្រូវបង់ដល់១៤ភាគរយ។ ដូចនេះនៅពេលដែលកម្ពុជា មានកិច្ចព្រមព្រៀងនេះ ជាមួយប្រទេសនានាកាន់តែច្រើន នឹងអាចទាក់ទាញការវិនិយោគបន្ថែមទៀតដែរ»។
តួកគី គឺជាដៃគូ DTA ទី១ ដែលកម្ពុជាមានជាមួយប្រទេសនៅតំបន់អឺរ៉ុប និងក៏ជាសមាជិក G20 ទី៤ ដែលកម្ពុជាមាន DTA ជាមួយផងដែរ។ កិច្ចព្រមព្រៀងស្តីការចៀសវាងការយកពន្ធត្រួតគ្នានេះ គឺជាការបែងចែកសិទ្ធិក្នុងការយកពន្ធរវាងគូភាគី នៃយុត្តាធិការជាហត្ថលេខី ដែលម្ខាងអាចកម្រិតផ្នែកខ្លះនៃការអនុវត្តច្បាប់និងបទប្បញ្ញត្តិក្នុងស្រុកស្ដីពីពន្ធដារ ហើយនៅក្នុងដំណាក់កាលនៃការអនុវត្ត ដំបូងអាចមានផលប៉ះពាល់ផ្ទាល់ដល់ចំណូលពន្ធរបស់ប្រទេស ដោយសារការកាត់បន្ថយអត្រាពន្ធកាត់ទុកដែលត្រូវអនុវត្តចំពោះអ្នកជាប់ពន្ធអនិវាសនជននិងការបែងចែកសិទ្ធិ យកពន្ធលើប្រភេទប្រាក់ចំណូលមួយចំនួនឱ្យប្រទេសនិវាសនដ្ឋាន៕
.jpg)
