អ្នកទស្សនា កំពុងគន់មើលរូបគំនូរ ដែលដាក់តាំងនៅសារមន្ទីរដ៏តូចចង្អៀត Metaestetica Lab@Museum ។ ហុង រស្មី
ភ្នំពេញ : នៅក្នុងបរិយាកាសបែបច្នៃប្រឌិតនៃសារមន្ទីរដ៏តូចចង្អៀត Metaestetica Lab@Museum ពិព័រណ៍សិល្បៈឆ្លុះបញ្ចាំងពីអតីតកាល និងបច្ចុប្បន្នកាលត្រូវបានរៀបចំឡើង។
ពិព័រណ៍ «(ទស្សនវិស័យ) លើអនាគតកាលសម្រាប់ថ្ងៃនេះ» បង្កើតឡើងវិញនូវទស្សនៈថ្មីអំពីអនាគតចំពោះសិល្បៈសហសម័យនៅកម្ពុជា ហើយសារមន្ទីរបើកទ្វារជារៀងរាល់ថ្ងៃចាប់ពីម៉ោង ១០ ព្រឹកដល់ម៉ោង ១១ យប់សម្រាប់អ្នកស្វែងយល់ និងចូលរួមជាមួយស្នាដៃសិល្បៈប្រកបដោយចក្ខុវិស័យទាំងនេះ។
នៅទីនេះ បង្អួចឈើចាស់ពណ៌ទឹកសមុទ្រ ត្រូវបានដាក់តាំងក្នុងស៊ុម ដែលបានប្រែក្លាយជាស្នាដៃថ្មីនៃសិល្បៈសហសម័យ។ វាព្យួរនៅលើជញ្ជាំងវិចិត្រសាល ជាសក្ខីភាពមួយចំពោះភាពទាក់ទាញអ្នកទស្សនាឱ្យចាប់ ផ្តើមដំណើរកម្សាន្តតាមពេលវេលា។
ស្នាដៃបង្អួចចាស់ក្នុងស៊ុមព្យួរលើជញ្ជាំងនេះកើតចេញពីគំនិតសិល្បករ សួស សូដាវី ដែលដកស្រង់ក្នុងព្រឹត្តិការណ៍ A-N-T-O-P-I-A Phnom Penh 2023 នៅ Seekers រៀបចំដោយ Metaestetica Lab និង Meta House ដោយបានសរសេរថា៖ «នៅពេលដែលអ្នកក្រឡេកមើលទៅក្រៅបង្អួច អ្នកអាចមើល ឃើញពិភពលោក»។
Metaestetica Lab@Museum គឺជាការខិតខំប្រឹងប្រែងប្រកបដោយមហិច្ឆតាក្នុងគោលបំណងបង្កើតសារមន្ទីរសិល្បៈសហសម័យតែ១គត់នៅក្នុងរាជធានីភ្នំពេញ។
ពិព័រណ៍សហសម័យ ត្រូវបានបង្កើតឡើង និងគ្រប់គ្រងដោយ លោក កាឡូ សាន់តូរ៉ូ ជាអ្នកទស្សនវិស័យនៅពីក្រោយសារមន្ទីរទំហំបន្ទប់តែ ១០ ម៉ែត្រការ៉េនៅក្នុងមជ្ឈមណ្ឌលវប្បធម៌កម្ពុជា-អាល្លឺម៉ង់ ដែលគេស្គាល់ថា «Meta House» ដែលបានទទួលការឧបត្ថម្ភពីសមាគមធុរកិច្ចអ៊ីតាលី-កម្ពុជា (ICBA)។
លោក សាន់តូរ៉ូ បាននិយាយថា៖ «បន្ទប់តូចក្នុងវិចិត្រសាល ត្រូវបានប្រើប្រាស់ជាសារមន្ទីរបណ្ដោះអាសន្ន Metaestetica Lab ដោយស្វាគមន៍រាល់កិច្ចសន្ទនាអំពីអត្ថន័យ និងសារៈសំខាន់នៃសិល្បៈ ក៏ដូចជា វប្បធម៌ទាក់ទងនឹងជីវិតរស់នៅ និងបទពិសោធន៍ឌីជីថលនៅក្នុងសង្គមសហសម័យចម្រុះរបស់យើង»។
លោកនិយាយថា វារួមបញ្ចូលទាំងការស្រាវជ្រាវ ការចែករំលែកចំណេះដឹង សិក្ខាសាលា និងការបង្ហាញពីការរកឃើញតាមរយៈប្រព័ន្ធផ្សព្វផ្សាយផ្សេងៗ។ វាបង្ហាញពីស្នាដៃវីដេអូ ការបោះពុម្ព ការដំឡើង និងការងារសិល្បៈដ៏ល្អតាមរយៈការចូលរួមព្រឹត្តិការណ៍ដ៏អស្ចារ្យ និងការសម្តែងផ្ទាល់។
នៅផ្នែកខាងឆ្វេងនៃច្រកចូលមានផ្ទាំងគំនូរដែលពិតជាទាក់ទាញចំណាប់អារម្មណ៍អ្នកដែលឆ្លងកាត់។ «សម្រែក» របស់សិល្បករ តូ វុត្ថា ដើមឡើយមានឈ្មោះថា «អ្នកទោស» នៅពេលដែលវាត្រូវបានដាក់តាំងបង្ហាញនៅវិទ្យាស្ថានបារាំងឆ្នាំ ២០២៣ គឺជាស្នាដៃដ៏ទាក់ទាញមួយ។
គំនូរប្រេង១ម៉ែត្រកន្លះបួនជ្រុង បង្ហាញពីទម្រង់មុខមនុស្ស ដែលហាក់ដូចជាបានបញ្ចេញការឈឺចាប់ និងកំហឹងរក្សាទុកជាច្រើនឆ្នាំ។ អ្វីដែលធ្វើឱ្យគំនូរនេះកាន់តែចាប់អារម្មណ៍គឺការផ្លាស់ប្តូររបស់វាក្នុងរយៈពេល១ទសវត្សរ៍។
ស្នាដៃលោក វុត្ថា ស្វាគមន៍អ្នកទស្សនាឱ្យគិតអំពីការវិវត្តនៃអត្តសញ្ញាណរបស់បុគ្គលម្នាក់ និងការបំបែកចេញពីស្រមោលនៃអតីតកាល ដែលជាការផ្លាស់ប្តូរគួរឱ្យកត់សម្គាល់នូវបញ្ហានៃការឈឺចាប់ និងភាពធន់។
ស្នាដៃសិល្បៈរបស់លោក ឈឹម សុធី មានចំណងជើងថា «ផលប៉ះពាល់» ជាការឆ្លុះបញ្ចាំងលើដំណើរដ៏ច្របូកច្របល់របស់ប្រទេសកម្ពុជាក្នុងសតវត្សរ៍ទី ២១។
កើតចេញពីលទ្ធផលនៃសង្គ្រាមស៊ីវិលដ៏បំផ្លិចបំផ្លាញ ប្រទេសកម្ពុជានៅតែជាដំណាក់កាលនៃជម្លោះសង្គមដ៏ជ្រាលជ្រៅ។ នៅក្នុងរូបភាពទម្រង់មនុស្សចម្រុះនេះ ដែលមានទំហំ១ម៉ែត្របួនជ្រុង បានបង្ហាញពីភាពស្មុគស្មាញដ៏ប្រទាក់ក្រឡា។
ក្នុងចំណោមរូបភាពដ៏ស្មុគស្មាញនេះ អ្នកទស្សនាអាចមើលដឹងពីមនុស្សម្នាក់ស្លៀកខោខូវប៊យពណ៌ខៀវ ជានិមិត្តរូបនៃការភ្ជាប់ទំនាក់ទំនងផ្ទាល់ខ្លួនរបស់វិចិត្រករទៅនឹងទេសភាពទីក្រុងដែលកំពុងវិវត្ត។
ពិព័រណ៍ «(ទស្សនវិស័យ) លើអនាគតកាលសម្រាប់ថ្ងៃនេះ» មានទីតាំងនៅ Meta House ផ្ទះលេខ ៤៨ ផ្លូវ ២២៨ បង្ហាញពីស្នាដៃដ៏គួរឱ្យចាប់អារម្មណ៍របស់សិល្បករដែលមានទេពកោសល្យ រួមមាន សួស សូដាវី លោកឈឹម សុធី លោក តូ វុត្ថា លោក គុន វណ្ណៈ លោក វុទ្ធ លីណូ លោក លីម សុខចាន់លីណា លោក ភេន រ៉ូប៊ីន លោក យ៉េន អេនធារ័ក្ស, Ernst Altmann, Gregory Gosselin រូមទាំងលោក កាឡូ សាន់តូរ៉ូ ក៏ដូចជាសិល្បករច្រើនទៀតដែលបានចូលរួមក្នុងព្រឹត្តិការណ៍ A-N-T-O-P-I-A ភ្នំពេញ៕
