ភ្ញៀវទេសចរពេលទៅទស្សនានៅប្រាសាទអង្គរវត្ដកាលពីថ្ងៃទី២៣ កញ្ញា ។ រូបថត Yousos-apdoulrashim
ភ្នំពេញៈតាមរយៈសារលិខិតលោកនាយករដ្ឋមន្ត្រី ហ៊ុន ម៉ាណែត បានចូលរួមអបអរសាទរទិវាទេសចរណ៍ពិភពលោកឆ្នាំ២០២៣ ក្រោមប្រធានបទ«ទេសចរណ៍ និងការវិនិយោគបៃតង» នាថ្ងៃទី២៧ ខែកញ្ញា ដោយបានបញ្ជាក់ថា ក្រោមយុទ្ធនាការឆ្នាំទស្សនាកម្ពុជា ២០២៣នេះ កម្ពុជារំពឹងទទួលបានទេសចរអន្តរជាតិប្រមាណ ៥ លាននាក់ កើនឡើង ១២០ ភាគរយ និងទេសចរជាតិប្រមាណ ១៧ លាននាក់ និងឆ្នាំ២០២៨ ទេសចរអន្តរជាតិអាចកើនដល់ ៨ លាននាក់។
លោកបានលើកឡើងតាមរយៈសារលិខិតដដែលថា ប្រធានបទនៃទិវាទេសចរណ៍ពិភពលោកឆ្នាំ២០២៣នេះ ពិតជាបានគូសរំលេចកាន់តែច្បាស់ថែមទៀតពីតួនាទីនៃវិស័យទេសចរណ៍ ក្នុងការទ្រទ្រង់ការអភិវឌ្ឍសេដ្ឋកិច្ចបៃតង ក៏ដូចជាការគិតគូរដល់គំរូនៃការវិនិយោគថ្មីដើម្បីអភិវឌ្ឍវិស័យទេសចរណ៍ប្រកបដោយភាពធន់ បរិយាប័ន្ន និងចីរភាពកាន់តែប្រសើរ។
ប្រភពដដែលបានលើកឡើងថា ជាការពិតណាស់ក្នុង ១ ទសវត្សរ៍ ចុងក្រោយនេះ វិស័យទេសចរណ៍កម្ពុជាបានរីកលូតលាស់គួរជាទីមោទនៈ ប៉ុន្តែជាអកុសលការរីកចម្រើនវិស័យនេះ ត្រូវបានបង្អាក់ស្ទើរតែទាំងស្រុងក្នុងរយៈពេលជាង៣ឆ្នាំចុងក្រោយ ដោយសារវិបត្តិនៃជំងឺកូវីដ១៩ ដែលបង្កផលប៉ះពាល់យ៉ាងធ្ងន់ធ្ងរដល់ការអភិវឌ្ឍសង្គម-សេដ្ឋកិច្ច នៅទូទាំងសកលលោក។ជាការកត់សម្គាល់ វិស័យទេសចរណ៍បានរងផលប៉ះពាល់ធ្ងន់ធ្ងរជាងគេដែលបានដាក់សម្ពាធយ៉ាងខ្លាំងដល់ប្រតិបត្តិករជាច្រើននៅក្នុងវិស័យនេះ។
រយៈពេល ៨ ខែ ឆ្នាំ២០២៣នេះ កម្ពុជាបានទទួលភ្ញៀវទេសចរអន្តរជាតិចំនួនជាង៣,៥លាននាក់ កើនឡើង ២៥០,៨ ភាគរយ ធៀបនឹងរយៈពេលដូចគ្នាឆ្នាំ២០២២ ក្នុងកម្រិត ៨០ ភាគរយ នៃឆ្នាំ២០១៩ មុនមានវិបត្តិជំងឺកូវីដ១៩ ។ រីឯទេសចរជាតិមានប្រមាណ ១២,៣៨ លាននាក់ កើនឡើង ៦២,៥ ភាគរយ។
លោក ហ៊ុន ម៉ាណែត បានបញ្ជាក់ថា៖ «ក្នុងនាមជាប្រមុខរាជរដ្ឋាភិបាលនីតិកាលទី៧ នៃរដ្ឋសភា ខ្ញុំសូមប្ដេជ្ញាបន្តនូវវីរភាពគំរូរបស់សម្តេចតេជោ ហ៊ុន សែន ក្នុងការបន្តស្តារ លើកស្ទួយ និងអភិវឌ្ឍ វិស័យទេសចរណ៍ឱ្យកាន់តែរីកចម្រើនថែមទៀត»។
ដើម្បីសម្រេចបានចក្ខុវិស័យទេសចរណ៍តាមរយៈការប្រែក្លាយកម្ពុជា ជាគោលដៅទេសចរណ៍សកលឈានមុខប្រកបដោយភាពសម្បូរបែប លោកនាយករដ្ឋមន្ត្រីបានផ្តល់ជាអនុសាសន៍មួយចំនួន ដោយក្នុងនោះ ត្រូវបង្កើនការវិនិយោគ និងបន្តកសាងមូលធនមនុស្ស,បង្កើនការវិនិយោគលើកកម្ពស់ប្រសិទ្ធភាពនៃការគ្រប់គ្រង និងការអភិវឌ្ឍទេសចរណ៍, ការជំរុញបរិវត្តកម្មឌីជីថល, បន្តជំរុញចលនាទេសចរផ្ទៃក្នុងនិងបន្តផ្ដល់កិច្ចសហការ និងជួយគាំទ្រដល់ក្រសួងទេសចរណ៍ពីសំណាក់ស្ថាប័នពាក់ព័ន្ធ និងដៃគូអភិវឌ្ឍន៍ទាំងអស់។
លោកបានបញ្ជាក់បន្ថែមថា ៖«សូមក្រសួងស្ថាប័នពាក់ព័ន្ធ ដៃគូអភិវឌ្ឍន៍ ផ្នែកឯកជន ជួយសហការគាំទ្រក្រសួងទេសចរណ៍ ក្នុងការបន្តពង្រឹងការអនុវត្តផែនការអភិវឌ្ឍន៍ធនធានមនុស្សស្របតាមយុទ្ធសាស្ត្របញ្ចកោណ ដំណាក់កាលទី១ ដោយផ្តល់អាទិភាពលើការបណ្តុះបណ្តាលជំនាញទេសចរណ៍ដល់បុគ្គលបម្រើការងារក្នុងសេវាទេសចរណ៍នៃសេដ្ឋកិច្ចក្រៅប្រព័ន្ធ»។
ទាក់ទងនឹងវិស័យទេសចរណ៍នេះដែរ ក្រសួងទេសចរណ៍បាននិងកំពុងគិតគូរអនុវត្តការងារស្នូលធំៗ៣រួមមាន៖បង្កើតផលិតផលទេសចរណ៍,ជំរុញបង្កើនឧស្សាហកម្មទេសចរណ៍ ដែលមានកម្រិតស្តង់ដាខ្ពស់ និងការខិតខំផ្សព្វផ្សាយទីផ្សារទេសចរណ៍។ ក៏ប៉ុន្តែការងារទាំងនោះគឺទាមទារឱ្យភាគីពាក់ព័ន្ធចូលរួមសហការរៀបចំដើម្បីធានាបាននូវកិច្ចសហការផ្តល់សេវាល្អ មានគុណភាព សុវត្ថិភាព និងភាពទាក់ទាញ ខណៈចាប់ពីខែតុលាខាងមុខទៅភ្ញៀវទេសចរអន្តរជាតិដែលមកទស្សនាកម្ពុជានឹងមានកំណើន។
ក្នុងពេលជួបជាមួយបណ្តាសមាគមនិងប្រតិបត្តិករទេសចរណ៍កាលពីថ្ងៃទី២៦ ខែកញ្ញា លោក សុខ សូកេន រដ្ឋមន្ត្រីក្រសួងទេសចរណ៍ និងភាគីពាក់ព័ន្ធក្នុងវិស័យឯកជនបានលើកយកបញ្ហាគន្លឹះដើម្បីរួមគ្នាដោះស្រាយ សហការផ្តល់សេវាទេសចរណ៍ល្អ និងផ្សព្វផ្សាយពីកម្ពុជា ឱ្យក្លាយជាគោលដៅទេសចរណ៍មួយសំខាន់របស់ពិភពលោក។ នេះបើតាមសេចក្តីប្រកាសរបស់ក្រសួងទេសចរណ៍។
ដោយឡែក លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកហៅកាត់(PATA) ប្រចាំកម្ពុជា បានឱ្យដឹងនៅថ្ងៃទី២៧ ខែកញ្ញាថា នេះជាជំនួបលើកដំបូងរបស់វិស័យឯកជនផ្នែកទេសចរណ៍ជាមួយនឹងរដ្ឋមន្ត្រីក្រសួងទេសចរណ៍ថ្មី តែសមាគមនិងប្រតិបត្តិករទេសចរណ៍ មិនទាន់បានជជែកគ្នាពីបញ្ហាអ្វីនៅឡើយទេ។
បើទោះជា លោករដ្ឋមន្ត្រីក្រសួងទេសចរណ៍លើកឡើងថា ចាប់ពីខែតុលាទៅ ភ្ញៀវទេសចរអន្តរជាតិដែលមកទស្សនាកម្ពុជានឹងមានកំណើនជាបន្តបន្ទាប់ឡើងវិញក្ដី តែលោក ស៊ីណាន បានថ្លែងថា លោកមិនទាន់អាចនិយាយពីកំណើនភ្ញៀវទេសចរនាខែតុលាយ៉ាងណាទេ ដោយត្រូវរង់ចាំមើលពីស្ថានភាពសិន។លោកបានបន្ថែមថា វិស័យទេសចរណ៍ឯកជនសព្វថ្ងៃហាក់មិនបានរួញរាក្នុងការផ្សព្វផ្សាយពីគោលដៅទេសចរណ៍របស់កម្ពុជាទៅកាន់ពិភពលោកដោយលើកហេតុផលដូចៗគ្នាពីការចំណាយ។
លោកថា៖«ខ្ញុំសង្កេតឃើញថា ប្រតិបត្តិករទេសចរណ៍ ឬអ្នករកស៊ីនៅក្នុងវិស័យទេសចរណ៍របស់យើងហាក់នៅអង្គុយរង់ចាំភ្ញៀវ ច្រើនជាងរវៀសរវៃទាក់ទាញភ្ញៀវ ដែលនេះ ជាផលវិបាកមួយក្នុងវិស័យទេសចរណ៍ យើងសព្វថ្ងៃនេះ។ អ្នករកស៊ីយើងមួយចំនួន រង់ចាំតែរដ្ឋាភិបាលធ្វើ តែមិនព្រមចូលរួមបង្កើនសកម្មភាពផ្សព្វផ្សាយទាក់ទាញដោយខ្លួនឯង»។
លោក ធួន ស៊ីណាន បានបញ្ជាក់ថា ៖ «រឿងនេះ វាមិនមែនជាការទម្លាក់បន្ទុកទៅខាងណាទេ រដ្ឋជាអ្នកចេញគោលនយោបាយ ឯកជនជាអ្នកខិតខំផ្សព្វផ្សាយ ដោយត្រូវចូលរួមទាំងអស់គ្នាពីគ្រប់ភាគីពាក់ព័ន្ធ ដោយមិនត្រូវអង្គុយត្អូញត្អែរនោះទេ»។
បើតាមប្រធានសមាគមទេសចរណ៍អាស៊ីប៉ាស៊ីហ្វិករូបនេះ វិស័យទេសចរណ៍កម្ពុជាមានការពឹងផ្អែកខ្លាំងលើប្រទេសជិតខាង ដែលនេះធ្វើឱ្យកម្ពុជាខាតបង់ច្រើន ខណៈដែលវិស័យឯកជនក្នុងស្រុកមិនព្រមបង្កើនការប្រកួតប្រជែងនៅលើឆាកអន្តរជាតិ ។កត្តានេះមិនអាចធ្វើឱ្យវិស័យទេសចរណ៍កម្ពុជាស្មើមុខស្មើមាត់នៅលើឆាកអន្តរជាតិបានទេ៕
.jpg)
