ក្រុមម៉ូតូទឹកកម្ពុជា ពេលទៅប្រកួតនៅប្រទេសបារាំង កន្លងមក ។ រូបថត ហ្វេសប៊ុក
ភ្នំពេញៈក្រុមម៉ូតូទឹកកម្ពុជា ចំនួន ៩ នាក់ ដឹកនាំដោយវីរកីឡាករ សាលី អ៊ូមើត បានធ្វើដំណើរទៅកាន់សហរដ្ឋអាមេរិកកាលពីថ្ងៃទី២៤ ខែកញ្ញា ដើម្បីចូលរួមការប្រកួតកម្រិតពិភពលោក WGP#1 World Series នៅទីនោះ ដែលនឹងចាប់ផ្តើមប្រកួតពីថ្ងៃទី៤ ដល់ទី៨ ខែតុលា ខាងមុខ។
ការប្រកួត WGP#1 World Series ដែលធ្វើនៅសហរដ្ឋអាមេរិកនេះ វាជាការប្រកួតជុំទី៣ បន្ទាប់ពីព្រឹត្តិការណ៍ពិភពលោកមួយនេះ បានបញ្ចប់ការប្រកួតជុំទី១ នៅប្រទេសប៉ូឡូញ កាលពីថ្ងៃ១៨ ដល់ទី២១ ខែឧសភា និងជុំទី២ នៅប្រទេសបារាំងកាលពីថ្ងៃទី២៧ ដល់ទី៣០ ខែកក្កដា ខណៈការប្រកួតជុំទី៤ ផ្តាច់ព្រ័ត្រ គ្រោងធ្វើនៅប្រទេសថៃ ពីថ្ងៃទី១៣ ដល់ទី១៧ ខែធ្នូ ឆ្នាំ២០២៣។
យ៉ាងណាក៏ដោយ សម្រាប់ការប្រកួតជុំទី១ នៅប្រទេសប៉ូឡូញ ក្រុមម៉ូតូទឹកកម្ពុជា មិនបានចូលរួមការប្រកួតទេ ដោយសារពួកគេជាប់ភារកិច្ចប្រកួតស៊ីហ្គេមលើកទី៣២ ឆ្នាំ២០២៣ នៅលើទឹកដីខ្លួនឯង ហើយក៏ជាពេលដែលពួកគេបានឈ្នះមេដាយមាស១ ប្រាក់១ និងសំរឹទ្ធ២ ជូនប្រទេសជាតិផងដែរ ដោយក្នុងនោះកីឡាករ សាលី អ៊ូមើត បានឈ្នះមេដាយមាស១ និងសំរឹទ្ធ១។
ចំណែកការប្រកួតជុំទី២ នៅប្រទេសបារាំង ក្រុមម៉ូតូទឹកកម្ពុជា បានចូលរួមដោយពួកគេដណ្តើមបានមេដាយមាស២ ប្រាក់១ និងសំរឹទ្ធ១។ ចំណែកការប្រកួតជុំទី៣នេះលោក ណុះ ស្លេះ ប្រធានសហព័ន្ធកីឡាម៉ូតូទឹកកម្ពុជា បានបង្ហាញការជឿជាក់ថា ក្រុមម៉ូតូទឹកកម្ពុជានឹងដណ្តើមបានមេដាយមាសជាថ្មីម្តងទៀត ដោយលោកបានផ្តល់ទំនុកចិត្តខ្លាំងទៅលើកីឡាករវ័យក្មេង កៃ វ៉ាន់ស៊ីដែន។
លោក ណុះ ស្លេះ បានថ្លែងប្រាប់ភ្នំពេញប៉ុស្តិ៍ កាលពីថ្ងៃទី២៧ ខែកញ្ញាថា៖ «សម្រាប់ការប្រកួត World Series នៅសហរដ្ឋអាមេរិកនេះ កាលពីឆ្នាំមុន ហើយលើកនេះ ខ្ញុំសង្ឃឹមថា គាត់នឹងរក្សាតំណែងការឈ្នះបានមេដាយមាស ទៀត ហើយកីឡាកររបស់យើងមួយចំនួនទៀត ក៏អាចនឹងដណ្តើមបានមេដាយឬចំណាត់ថ្នាក់ល្អផងដែរ ព្រោះកាលពីឆ្នាំមុន ពួកគាត់ដណ្តើមបានលេខ៤ និងលេខ៥ ដែរ អ៊ីចឹងឱកាសឈ្នះមេដាយ អាចនឹងកើតមានសម្រាប់ការប្រកួតលើកនេះ»។
យ៉ាងណាក៏ដោយ ប្រធានសហព័ន្ធរូបនេះ បានឱ្យដឹងថា ការប្រកួតជុំទី៣ នៅអាមេរិកនេះ មានអ្នកចូលរួមច្រើន ហើយកម្ពុជា ក៏នៅមានក្តីកង្វល់ទៅលើម៉ូតូទឹករបស់ខ្លួនផងដែរ ដែលចាស់ជាងគេក៏ប៉ុន្តែ បើស្ថានភាពប្រកួត នៅលើផ្ទៃទឹកដែលមានរលកធំៗ គឺឱកាសឈ្នះមេដាយរបស់កីឡាករកម្ពុជា នៅតែមានច្រើនដោយសារពួកគេ មានភាពស្ទាត់ជំនាញនិងមានទិចនិកខ្ពស់ជាងកីឡាករបរទេស។
លោក ណុះ ស្លេះ បានបញ្ជាក់ថា៖ «ចំពោះបច្ចេកទេស និងសមត្ថភាពផ្ទាល់ខ្លួនរបស់កីឡាករយើងគឺល្អ ដោយពួកគាត់មានទិចនិកខ្ពស់ ជាពិសេសជំនាញបញ្ជាប្រភេទម៉ូតូឈរតែម្តង ដែលយើងមានសមត្ថភាពប្រកួតប្រជែងជាមួយពិភពលោកបាន ក្នុងការស្វែងរកមេដាយ គឺយើងមានការបារម្ភតែទៅលើគ្រឿងម៉ាស៊ីនទេ ព្រោះម៉ូតូរបស់យើងចាស់ដោយធ្លាប់ជួសជុលច្រើនលើកហើយ អ៊ីចឹងល្បឿនអាចចាញ់គេបន្តិច»។
ជាមួយគ្នានេះ លោក ណុះ ស្លេះ បានចាត់ទុកការចូលរួមប្រកួតជើងឯកពិភពលោកនេះថា ជាពេលវេលាដ៏សំខាន់ ដែលក្រុមម៉ូតូទឹកកម្ពុជា អាចតេស្តសមត្ថភាពខ្លួនឯង និងដកស្រង់បាននូវបច្ចេកទេសថ្មីៗដើម្បីយកមកអភិវឌ្ឍសមត្ថភាពឱ្យបានកាន់តែល្អថែមទៀត។
លោកបានថ្លែងថា៖«ការទៅចូលរួមការប្រកួតពិភពលោកនេះពិតជាមានសារៈសំខាន់ណាស់ក្នុងការតេស្តសមត្ថភាព ក៏ដូចជាបង្វឹកកីឡាកររបស់យើងឱ្យគាត់កាន់តែខ្លាំងថែមទៀត តាមស្តង់ដាពិភពលោក ព្រោះបើយើងមិនសម្រួចសមត្ថភាពរបស់ពួកគាត់ទេគឺពី១ឆ្នាំទៅ១ឆ្នាំ សមត្ថភាពរបស់គាត់កាន់តែធ្លាក់ គ្រាន់តែថា វាចំណាយច្រើនបន្តិច សម្រាប់ការចូលរួមនេះ»។
ជុំវិញការចំណាយនេះ លោក ណុះ ស្លេះ បានទទួលស្គាល់ថា សហព័ន្ធ ពិតជាមិនមានលទ្ធភាពបញ្ជូនក្រុមម៉ូតូទឹកកម្ពុជាទៅចូលរួមមែន ប៉ុន្តែសហព័ន្ធបានជួយសម្រួលផ្លូវច្បាប់ដើម្បីបានទៅចូលរួមចំណែកការចំណាយ យើងបានស្នើសុំទៅលោក Karl Heinrich Knauf ប្រធានក្លិប Flamingo Jet Ski និងជាអនុប្រធានសហព័ន្ធកីឡាម៉ូតូទឹកកម្ពុជាឱ្យជួយដល់កីឡាកររបស់យើងទាំងលើការហ្វឹកហាត់ និងការចេញទៅប្រកួតផ្សេងៗ។
លោកបានបញ្ជាក់ថា៖ «កន្លងមក មានការយល់ច្រឡំថា សហព័ន្ធ អត់មានបានធ្វើអ្វីទេ គឺមានតែលោក Karl Heinrich Knauf ជាអ្នកជួយ ប៉ុន្តែតាមពិតសហព័ន្ធបានជជែក និងពិភាក្សាឱ្យគាត់ផ្តល់ការជួយផ្ទាល់ទៅកីឡាករ តែម្តង មិនចាំបាច់ជួយមកសហព័ន្ធទេ គឺជួយត្រឹមការងារបច្ចេកទេសបានហើយ អ៊ីចឹងនៅពេលក្លិប Flamingo បានផ្តល់ដំណឹងពីការត្រៀមបញ្ជូនកីឡាករយើងទៅប្រកួតកម្មវិធីផ្សេងៗ គឺសហព័ន្ធបានជួយសម្រួលខាងផ្នែកផ្លូវច្បាប់ទៅរាជរដ្ឋាភិបាលដើម្បីឱ្យមានការទទួលផ្លូវការនូវលទ្ធផលប្រកួតនោះក្នុងនាមជាអត្តពលិកប្រកួតតំណាងឱ្យកម្ពុជា»៕
