លោកនាយករដ្ឋមន្ត្រី ហ៊ុន ម៉ាណែត និងឯកអគ្គរដ្ឋទូតអាមេរិក លោក W.Patrick Murphy នៅក្នុងជំនួបពិភាក្សាកាលពីម្សិលមិញ។ រូប STPM
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត និងលោកផាទ្រីក មើហ្វី (W. Patrick Murphy) ឯកអគ្គរដ្ឋទូតសហរដ្ឋអាមេរិកប្រចាំកម្ពុជា នៅថ្ងៃទី ២៧ កញ្ញា បានជួបសំណេះសំណាលគ្នា ដោយក្នុងនោះភាគីទាំង ២ បានប្តេជ្ញារួមគ្នាបន្តពង្រឹងនូវទំនាក់ទំនងនិកិច្ចសហប្រតិបត្តិការទ្វេភាគីបន្ថែមទៀត ដោយក្នុងនោះលោកមើហ្វី បានសង្កត់ធ្ងន់ថា«ទំនាក់ទំនងនៃប្រទេសទាំង ២ ផ្តោតជាសំខាន់ទៅលើការការពារសេរីភាពជាមូលដ្ឋាន និងការអនុវត្តគោលការណ៍សិទ្ធិមនុស្ស»។
ជំនួបនេះធ្វើឡើងប៉ុន្មានថ្ងៃ បន្ទាប់ពីលោក ហ៊ុន ម៉ាណែត បានជួបពិភាក្សាជាមួយលោកស្រីវ៉ិចតូរីយ៉ា នូលលែន អនុរដ្ឋមន្ត្រីការបរទេសស្ដីទីសហរដ្ឋអាមេរិកនៅទីក្រុងញូវយ៉ក អំឡុងពេលមហាសន្និបាតលើកទី៧៨ របស់អង្គការសហប្រជាជាតិ។ នេះបើយោងតាមសេចក្តីប្រកាសព័ត៌មានពីខុទ្ទកាល័យនាយករដ្ឋមន្ត្រីនៅក្រោយជំនួប។
ក្នុងជំនួបនេះលោក ហ៊ុន ម៉ាណែត ក៏បានថ្លែងអំណរគុណដល់ភាគីអាមេរិកដែលបានផ្តល់ជំនួយដល់កម្ពុជាឡើងវិញតាមរយៈទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) ក្នុងទំហំទឹកប្រាក់ ១៨ លានដុល្លារ ដែលបានប្រកាសផ្អាកក្រោយការបោះឆ្នោតជាតិខែកក្កដា កន្លងទៅ។
លោកនាយករដ្ឋមន្ត្រីបានបញ្ជាក់ថា៖ «កម្ពុជានឹងប្រើប្រាស់ជំនួយនេះសម្រាប់វិស័យសំខាន់ៗចំនួន ៤៖ កែលម្អការផ្ដល់សេវាសុខាភិបាលទាំងក្នុងផ្នែករដ្ឋ និងផ្នែកឯកជន,ការពារបរិស្ថានប្រកបដោយចីរភាព,ការពារ និងការប្រយុទ្ធនឹងជំងឺរបេង និងចុងក្រោយគឺការបណ្ដុះបណ្ដាលផ្នែកសហគ្រិនភាពដល់យុវជនកម្ពុជា»។
ក្រៅពីនេះ លោក ហ៊ុន ម៉ាណែត និងលោក ផាទ្រីក មើហ្វី បានឯកភាពគ្នាលើការបន្តសម្របសម្រួលនីតិវិធីលើការធ្វើមាតុភូមិនិវត្តន៍ពលរដ្ឋខ្មែរ ដោយកិច្ចសហប្រតិបត្តិការជិតស្និទ្ធដោយការពន្លឿននីតិវិធីលើការកំណត់អត្តសញ្ញាណ និងការរៀបចំបញ្ជូនការធ្វើសាមញ្ញកម្មនីតិវិធីលើការបញ្ជូន ជាពិសេសការរៀបចំផែនការគាំទ្រ និងធ្វើសមាហរណកម្មពលរដ្ឋខ្មែរដែលធ្វើមាតុភូមិនិវត្តន៍អាចបន្ស៊ាំជាមួយសង្គមកម្ពុជាឡើងវិញ។
ជាមួយគ្នានេះភាគីកម្ពុជាបានជម្រាបភាគីអាមេរិក ពីការយកចិត្តទុកដាក់លើការរៀបចំសម្រួលសមាសភាពនៃគណៈកម្មការ POW/MIA ចំពោះបេសកកម្មស្រាវជ្រាវ និងជីករុករកអដ្ឋិធាតុជនជាតិអាមេរិកបាត់ខ្លួនឱ្យទាន់ពេលវេលានិងជោគជ័យប្រកបដោយកាយវិការគោរពដល់ក្រុមគ្រួសារនៃយុទ្ធជនដែលបានបាត់ខ្លួន។
ខ្លឹមសារនៃជំនួបបានបញ្ជាក់ថា៖ «កម្ពុជា និងអាមេរិក បានពិភាក្សាគ្នាលើការបន្តកិច្ចសហប្រតិបត្តិការលើវិស័យផ្សេងៗទៀត និងបានប្តេជ្ញាចិត្តក្នុងការពង្រឹងកិច្ចសហការនេះឱ្យកាន់តែជិតស្និទ្ធថែមទៀត ដើម្បីឧត្តមប្រយោជន៍នៃប្រទេសទាំង ២»។
ជាមួយគ្នានេះ យោងតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជា បានលើកឡើងពីខ្លឹមសារនៃកិច្ចពិភាក្សារវាង លោក ផាទ្រីក មើហ្វី ជាមួយលោក ហ៊ុន ម៉ាណែតថា ប្រកបដោយផ្លែផ្កា ពាក់ព័ន្ធនឹងផលប្រយោជន៍ទូលំទូលាយរួមនៃប្រទេសទាំង ២។
សេចក្តីប្រកាសបន្តថា លោកឯកអគ្គរដ្ឋទូត ក៏លើកឡើងពីជំនួយដែលសហរដ្ឋអាមេរិកផ្តល់ជូនកម្ពុជាក្នុងទំហំទឹកប្រាក់ប្រមាណ ៣ ពាន់លានដុល្លារ ក្នុងរយៈពេល ៣០ ឆ្នាំចុងក្រោយនេះ។ ជំនួយភាគច្រើនផ្តោតទៅលើការអភិវឌ្ឍលើវិស័យសុខាភិបាល ការអភិវឌ្ឍប្រកបដោយចីរភាព។ លោក មើហ្វី សង្កត់ធ្ងន់ថា៖ «ទំនាក់ទំនងនៃប្រទេសទាំង ២ ផ្តោតជាសំខាន់ទៅលើការការពារសេរីភាពជាមូលដ្ឋាន និងការអនុវត្តគោលការណ៍សិទ្ធិមនុស្ស»។
លោកឯកអគ្គរដ្ឋទូត ក៏បានជំរុញឱ្យរដ្ឋាភិបាលកម្ពុជាពិចារណាលើនយោបាយការទូតប្រកបដោយឯករាជភាពនិងតម្លាភាព ដោយការថ្លឹងថ្លែងជាពិសេស ទៅលើផលប្រយោជន៍របស់ប្រជាជនកម្ពុជា និងជំរុញឱ្យបង្កើនសកម្មភាពប្រឆាំងអំពើជួញដូរមនុស្សប្រឆាំងឧក្រិដ្ឋកម្មបោកប្រាស់តាមប្រព័ន្ធអនឡាញ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានសាទរដែលមានជំនួបបែបនេះ ដែលបង្ហាញពីសញ្ញាវិជ្ជមាន ប្រសិនជាភាគីទាំង ២ ពិតជាមានសុច្ឆន្ទៈក្នុងការលើកកម្ពស់ទំនាក់ទំនងកិច្ចសហប្រតិបត្តិការរវាងប្រទេសទាំង ២ ពិតមែន។
លោកបានប្រាប់ថា ទំនាក់ទំនងរវាងប្រទេស ២ រវាងរដ្ឋាភិបាលទាំង ២ គឺវាទាមទារឱ្យមានសុច្ឆន្ទៈ និងការប្តេជ្ញាចិត្តរួមគ្នា មិនអាចមានតែភាគីម្ខាង ហើយភាគីម្ខាងទៀត មិនមានសុច្ឆន្ទៈ មិនមានភាពស្មោះត្រង់ វាមិនអាចធ្វើទំនាក់ទំនងមានភាពប្រសើរបានទេ។
លោក គិន ភាថា៖ «ជំនួបនេះល្អគឺភាគីទាំង ២ អាចស្វែងយល់ពីគ្នាទៅវិញទៅមក ស្វែងយល់ទៅលើផលប្រយោជន៍រួមនៃប្រទេសទាំង ២ អាចមានចំពោះគ្នាទៅវិញទៅមកហើយអាចស្វែងយល់ពីក្របខ័ណ្ឌនៃកិច្ចសហប្រតិបត្តិការដែលមិនទាន់ពេញលេញ ហើយយើងសម្លឹងមើលភាគីទាំង ២ អាចធ្វើអ្វីបានជាមួយគ្នា ដែលនេះគឺទាមទារឱ្យមានការជួបគ្នា ទាមទារឱ្យមានការជជែកគ្នាហើយក៏ទាមទារឱ្យមានភាពស្មោះត្រង់ គឺនិយាយត្រង់ទៅត្រង់មក»។
ជាមួយគ្នានោះដែរ លោក គិន ភា ក៏បានលើកឡើងដែរថា កម្ពុជាចង់មានទំនាក់ទំនងល្អ ស្មោះត្រង់ដោយគោរពនូវផលប្រយោជន៍អធិបតេយ្យ ឯករាជ្យ បូរណភាពទឹកដី ការមិនជ្រៀតជ្រែកកិច្ចការផ្ទៃក្នុងរបស់ផងគ្នាទៅវិញទៅមកជាមួយនឹងសហរដ្ឋអាមេរិក ប៉ុន្តែ លោកមិនច្បាស់ទេថា តើសហរដ្ឋអាមេរិក ពិតជាមានភាពស្មោះត្រង់ មានការប្តេជ្ញាចិត្តនៅក្នុងទំនាក់ទំនងរបស់ខ្លួនជាមួយកម្ពុជាឬយ៉ាងណា។
លោកបានសង្កត់ធ្ងន់ថា៖ «បើនិយាយពីជ្រុងវិជ្ជមាន នៃជំនួបនេះ គឺការដែលភាគីទាំង ២ នេះបោះដៃរកគ្នាគឺគ្រាន់តែចូលតុនិយាយគ្នា នេះគឺជាភាពវិជ្ជមានមួយស្រាប់ទៅហើយបើសិនជាយើងមិនជួបគ្នាសោះតែបែរជានាំគ្នាផ្ញើសារតែតាមសារព័ត៌មាន»។
លោក គិន ភា បន្តថា៖ «ខ្ញុំគិតថា ទំនាក់ទំនងរវាងសហរដ្ឋអាមេរិក និងកម្ពុជាគឺល្មមឈប់ផ្ញើសារនយោបាយតាមរយៈសារព័ត៌មាន គួរតែជួបគ្នាដោយផ្ទាល់ ហើយនិយាយពីអ្វីដែលជាកង្វល់របស់ខ្លួនរៀងៗខ្លួន អ្វីដែលជាផលប្រយោជន៍ ជាយុទ្ធសាស្ត្ររបស់ខ្លួនរៀងៗខ្លួន និងអ្វីដែលអាចលើកស្ទួយទំនាក់ទំនងរវាងប្រទេសទាំង ២ បាន។ ឈប់ផ្ញើសារតាមប្រព័ន្ធផ្សព្វផ្សាយ»៕
.jpg)
