ភ្ញៀវទេសចរ កំពុងថតថ្ងៃរះចំកំពូលប្រាសាទអង្គរវត្ត កាលពីឆ្នាំ ២០១៦។ រូបថត ហុង មិនា
ភ្នំពេញៈ អាជ្ញាធរជាតិអប្សរាឱ្យដឹងថា ជាគោលការណ៍ការថតរូបភាព ឬវីដេអូ សម្រាប់ចងក្រងជាអនុស្សាវរីយ៍ផ្ទាល់ខ្លួន ឬលក្ខណៈទេសចរណ៍ នៅតាមប្រាសាទនានាក្នុងរមណីយដ្ឋានអង្គរ គឺមិនមានការហាមឃាត់ ហើយក៏មិនមានការបង់ប្រាក់ដែរ។
អាជ្ញាធរជាតិអប្សរា បានប្រកាសដូចនេះ បន្ទាប់ពីសាធារណជន ជាពិសេសអ្នកចូលចិត្តថតរូប បានបញ្ចេញមតិនៅលើបណ្តាញសង្គម ដោយលើកឡើងថា អាជ្ញាធរជាតិអប្សរា មានការរឹតត្បិតចំពោះការថតវីដេអូ ឬថតរូបនៅតាមប្រាសាទនានាក្នុងរមណីយដ្ឋានអង្គរ ទោះបីជាពួកគេថតបែបលក្ខណៈអាពាហ៍ពិពាហ៍ទេសចរណ៍ ឬចងក្រងជាអនុស្សាវរីយ៍ផ្ទាល់ខ្លួនក្តី។
អាជ្ញាធរជាតិអប្សរា បានបញ្ជាក់តាមរយៈសេចក្តីជូនដំណឹងចុះថ្ងៃទី ២៦ ខែកញ្ញាថា ជាគោលការណ៍ មិនមានការហាមឃាត់ទេ ចំពោះការថតរូបភាព ឬវីដេអូ សម្រាប់ចងក្រងជាអនុស្សាវរីយ៍ផ្ទាល់ខ្លួន ឬលក្ខណៈទេសចរណ៍ ដើម្បីផ្សព្វផ្សាយសិល្បៈ និងវប្បធម៌ ឱ្យពិភពលោកបានស្គាល់ពីភាពទាក់ទាញ និងសម្បត្តិវប្បធម៌ដ៏អស្ចារ្យរបស់កម្ពុជា។
ប្រភពដដែលបន្តថា៖ «ជាក់ស្តែង ការថតរូបភាព និងវីដេអូ តាមទម្រង់ទាំងនេះ ត្រូវបានភ្ញៀវទេសចរជាតិ-អន្តរជាតិ បង្ហោះផ្សព្វផ្សាយនៅតាមបណ្តាញសង្គមនានា ដូចជាហ្វេសប៊ុក,តិកតុក និងបណ្ដាញសង្គមជាច្រើនផ្សេងទៀតរួចមកហើយ»។
ដោយឡែកក្នុងគោលបំណងកុំឱ្យមានកំហុសឆ្គងដោយអចេតនាកើតចេញពីការផ្សព្វផ្សាយ និងអាចធ្វើឱ្យប៉ះពាល់គុណតម្លៃនៃប្រាសាទបុរាណ មរតកមិនអាចកាត់ថ្លៃបានរបស់បុព្វបុរសខ្មែរ និងជាសម្បត្តិបេតិកភណ្ឌពិភពលោក ភ្ញៀវទេសចរជាតិ-អន្តរជាតិ និងសាធារណជនទាំងអស់ តម្រូវឱ្យដាក់ពាក្យស្នើសុំមកអាជ្ញាធរជាតិអប្សរា ចំពោះគោលបំណងមួយចំនួនដើម្បីអនុញ្ញាតឱ្យមន្ត្រីជំនាញមានលទ្ធភាពពិនិត្យជាមុន នូវទិដ្ឋភាពបច្ចេកទេស និងសម្ភារប្រើប្រាស់ជាដើម។
អាជ្ញាធរជាតិអប្សរាបានលើកឡើងថា លក្ខខណ្ឌដែលត្រូវឱ្យដាក់ពាក្យស្នើសុំជាមុននោះរួមមាន ការថតរូបភាព ថតភាពយន្ត ឬវីដេអូ ក្នុងគោលបំណងផ្សព្វផ្សាយពាណិជ្ជកម្ម ផលិតផល ឬបង្កើតអាជីវកម្មនានា និងការប្រកបអាជីវកម្មថតសម្លៀកបំពាក់ប្រពៃណីបុរាណ (ថតរូបមុនអាពាហ៍ពិពាហ៍) ដើម្បីពិនិត្យ ភាពសមស្របនៃសម្លៀកបំពាក់ប្រពៃណីបុរាណ ហើយការថតបែបនេះ មិនមានការបង់ប្រាក់ទេ។
ពាក់ព័ន្ធការថតនៅក្នុងរមណីយដ្ឋានអង្គរនេះដែរ តារាចម្រៀងអ្នកនាង ទេព បូព្រឹក្ស បានបង្ហោះនៅលើបណ្តាញសង្គមមុនពេលដែលអាជ្ញាធរជាតិអប្សរា ចេញផ្សាយសេចក្តីជូនដំណឹងថា៖ «បើសិនជាផ្តល់ឱកាសឱ្យខ្ញុំបានថត MV បទទេវរាជ និងមហានគរនៅប្រាសាទអង្គរវត្តបាន ពួកខ្ញុំនឹងមិនធ្វើឱ្យអ្នកទាំងអស់គ្នាខកបំណងឡើយ»។
លោក ហូ វណ្ឌី ប្រធានក្រុមប្រឹក្សាភិបាលសមាគមទេសចរណ៍កម្ពុជាបានថ្លែង ការជូនដំណឹងជាថ្មីរបស់អាជ្ញាធរជាតិអប្សរា បង្ហាញពីការបន្ធូរបន្ថយការរឹតបន្តឹងជុំវិញការចូលទៅថតរូប ឬវីដេអូនានា ក្នុងរមណីយដ្ឋានអង្គរ។
លោក ហូ វណ្ឌី បានថ្លែងបន្តថា៖ «ពីមុនមកសាធារណជនតែងត្អូញត្អែរ ពីការរឹតបន្តឹងក្នុងការថតរូប តែការជូនដំណឹងថ្មីនេះ គឺជាការបើកច្រកដល់សាធារណជន ដោយមិនចាំបាច់សុំលិខិតស្មុគស្មាញនោះទេ។ ប៉ុន្តែបើថតរូបលក្ខណៈធ្វើអាជីវកម្ម ឬថតកុនអី ពិតណាស់ត្រូវមានការសុំច្បាប់»។
លោក ហូ វណ្ឌី បានថ្លែងបន្ថែមទៀតថា ជាមួយនឹងការបន្ទន់ឥរិយាបថរបស់អាជ្ញាធរជាតិអប្សរានេះ នឹងជំរុញដល់សាធារណជនឱ្យចូលមកថតរូបស្អាតៗក្នុងបរិវេណអង្គរ បង្កើនការផ្សព្វផ្សាយតាមវិធីសាស្ត្ររបស់ពួកគេនៅលើបណ្តាញសង្គម ដែលនឹងជួយលើកទឹកចិត្តភ្ញៀវទេសចរត្រឡប់មកវិញ៕
