កិច្ចប្រជុំពិភាក្សាទាក់ទងនឹងសន្តិសុខសាយប័រ ពីថ្ងៃទី២៦ កញ្ញា ។ រូបថត ក្រសួងប្រៃសណីយ៍
ភ្នំពេញៈស្ថាប័នពាក់ព័ន្ធ និងអង្គការដៃគូបានបើកកិច្ចប្រជុំពិភាក្សារួមគ្នា ដើម្បីជំរុញការលើកកម្ពស់វិស័យសន្តិសុខសាយប័រកម្ពុជា ឱ្យកាន់តែមានភាពធន់ ដោយបានចាត់ទុកវិស័យនេះថា មានសំខាន់ក្នុងការកាត់បន្ថយហានិភ័យ ដែលកើតឡើងពីការប្រើប្រាស់បចេ្ចកវិទ្យាព័ត៌មាន។
កិច្ចពិគ្រោះយោបល់នេះ រៀបចំឡើងដោយក្រសួងប្រៃសណីយ៍ និងទូរគមនាគមន៍ស្តីពី«ការវាយតម្លៃកម្រិតសន្តិសុខសាយប័រ»នៃគម្រោងលើកកម្ពស់ភាពធន់នៃសន្តិសុខសាយប័រកាលពីថ្ងៃទី២៦ ខែកញ្ញា ឆ្នាំ២០២៣ ដោយមានការចូលរួមពីតំណាងអន្តរក្រសួង ស្ថាប័នពាក់ព័ន្ធ សាកលវិទ្យាល័យ មន្ត្រីជំនាញ និងអ្នកជំនាញជប៉ុនដែលគាំទ្រដោយទីភ្នាក់ងារសហប្រតិបត្តិការអន្តរជាតិជប៉ុន (JICA)។ នេះបើតាមក្រសួងប្រៃសណីយ៍និងទូរគមនាគមន៍។
បើតាមក្រសួង នៅក្នុងឱកាសនោះ លោកខូវ មករា រដ្ឋលេខាធិការក្រសួងប្រៃសណីយ៍និងទូរគមនាគមន៍បានថ្លែងថា កិច្ចប្រជុំនេះគឺដើម្បីសិក្សាវាយតម្លៃកម្រិតសន្តិសុខសាយប័ររបស់កម្ពុជាតាមរយៈការជួបពិភាក្សាប្រមូលធាតុចូលជាមួយសាកលវិទ្យាល័យ ក្រសួង-ស្ថាប័នរដ្ឋ និងឯកជនពាក់ព័ន្ធ។
លោកបានបញ្ជាក់ថា៖«កិច្ចពិភាក្សានេះបានផ្តោតលើការជំរុញការលើកកម្ពស់កម្រិតសន្តិសុខសាយប័រដើម្បីចូលរួមចំណែកធ្វើឱ្យលម្អសាយប័ររបស់កម្ពុជាកាន់តែមានភាពធន់ខ្ពស់ សុវត្ថិភាព និងភាពជឿជាក់ពីសំណាក់ប្រជាពលរដ្ឋ ធុរកិច្ចជន និងមន្ត្រីសាធារណៈ»។
លោកបានបន្ដថា កិច្ចពិភាក្សានេះ ក៏នឹងចូលរួមចំណែកជាមួយដៃគូសហប្រតិបត្តិការសន្តិសុខសាយប័រក្នុងតំបន់ ក៏ដូចជាអន្តរជាតិដើម្បីរួមគ្នាឆ្លើយតបប្រកបដោយប្រសិទ្ធភាពនិងទាន់ពេលវេលាលើឧប្បត្តិហេតុសាយប័រ ដែលមានលក្ខណៈកាន់តែស្មុគស្មាញ និងគ្មានព្រំដែនកំណត់ផងដែរ។
ជុំវិញរឿងនេះ ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាលោក គិន ភា នៅថ្ងៃទី២៨ ខែកញ្ញា បានគាំទ្រចំពោះការជំរុញលើសន្តិសុខសាយប័រឱ្យកាន់តែខ្លាំងដោយលោកចាត់ទុកថាមានសារៈសំខាន់ណាស់ ខណៈកម្ពុជា និងពិភពលោកឈានមកដល់បដិវត្តន៍ឧស្សាហកម្ម៤.០ ដែលផ្តោតខ្លាំងលើព័ត៌មានវិទ្យា បច្ចេកវិទ្យាសម្រាប់គ្របការអភិវឌ្ឍសេដ្ឋកិច្ច និងសង្គម។
លោកបានបន្តថា៖«វិស័យសាយប័រគឺជាវិស័យសំខាន់ដែលទាមទារឱ្យមានការគិតគូរឱ្យមានសុវត្ថិភាពខ្ពស់ ដើម្បីបញ្ចៀសបញ្ហាប្រឈមពីការឆបោកតាមប្រព័ន្ធអនឡាញ បទល្មើសបច្ចេកវិទ្យានានា ពិសេសឈានទៅធានាដល់សណ្តាប់ធ្នាប់សង្គម សេដ្ឋកិច្ច នយោបាយ ហើយយើងក៏គួរតែជំរុញការអភិវឌ្ឍធនធានមនុស្សលើផ្នែកនេះឱ្យកាន់តែស៊ីជម្រៅបន្ថែមទៀត ដើម្បីជំរុញវិស័យសាយប័ររបស់យើងឱ្យមានសម្ទុះខ្លាំង»។
យ៉ាងណាក្ដី បើតាមក្រសួងប្រៃសណីយ៍ ការលើកកម្ពស់កម្រិតសន្តិសុខសាយប័រតម្រូវឱ្យមានការសិក្សាវាយតម្លៃអំពីស្ថានភាពបច្ចុប្បន្ន និងការរៀបចំផែនទីបង្ហាញផ្លូវសម្រាប់ការអភិវឌ្ឍសមត្ថភាពសន្តិសុខសាយប័រ ដោយផ្អែកលើគំរូរង្វាស់ដែលត្រូវបានប្រើប្រាស់ជាអន្តរជាតិ។
ក្រសួងបានបន្តថា ការវាស់វែងនេះនឹងផ្តល់ទិន្នន័យលក្ខណៈវិទ្យាសាស្ត្រឱ្យយើងសម្រាប់ការកំណត់ច្បាស់ពីស្ថានភាពបច្ចុប្បន្ន ធៀបនឹងប្រទេសក្នុងតំបន់និងអន្តរជាតិនិងការកំណត់គោលដៅ យុទ្ធសាស្ត្រ សកម្មភាព និងមធ្យោបាយក្នុងដំណើរអភិវឌ្ឍន៍សមត្ថភាពនិងការគ្រប់គ្រងហានិភ័យក្នុងលម្ហសាយប័រកម្ពុជាស្របតាមយុទ្ធសាស្ត្របញ្ចកោណដំណាក់កាលទី១នៃរាជរដ្ឋាភិបាលនីតិកាលទី៧ ។
យ៉ាងណាមិញ តាមរយៈកិច្ចប្រជុំពិភាក្សាខាងលើភាគីពាក់ព័ន្ធក៏បានបង្ហាញក្តីសង្ឃឹមថា កិច្ចប្រជុំនេះនឹងមានការចូលរួមយ៉ាងសកម្មដើម្បីផ្ដល់ធាតុចូលជាក់ស្តែងដែលនឹងអាចប្រើប្រាស់ជាចំណុចចាប់ផ្ដើមដ៏មានសារៈសំខាន់ក្នុងដំណើរការលើកកម្ពស់ភាពធន់សន្តិសុខសាយប័ររបស់កម្ពុជាឱ្យកាន់តែប្រសើរឡើងថែមទៀត៕
