កិច្ចប្រជុំកំពូលធុរកិច្ចអាស៊ាន-កម្ពុជានៅថ្ងៃទី២៨ កញ្ញា ។ រូបថត CCC
ភ្នំពេញៈកម្ពុជាបានអំពាវនាវឱ្យមានការពង្រឹងការតភ្ជាប់ធុរកិច្ចក្នុងតំបន់អាស៊ានដើម្បីចូលរួមដោះស្រាយបញ្ហាប្រឈមក្នុងរង្វង់សមាជិកសហគមន៍សេដ្ឋកិច្ចអាស៊ានដើម្បីសម្រេចការនាំចេញផលិតផលទៅកាន់ទីផ្សារពិភពលោក និងសម្រេចកំណើនសេដ្ឋកិច្ចតំបន់ ហើយបានស្នើឱ្យដៃគូស្វែងរកលទ្ធភាពធ្វើធុរកិច្ចនៅកម្ពុជាដែលកំពុងមានអំណោយផល។
ការអំពាវនាវដូច្នេះ ធ្វើឡើងនៅក្នុងកិច្ចប្រជុំកំពូលធុរកិច្ចអាស៊ាន-កម្ពុជា និងពិធីប្រកាសជាផ្លូវការនូវសៀវភៅស ឆ្នាំ២០២៤របស់សភាពាណិជ្ជកម្មអឺរ៉ុបនៅកម្ពុជានៅថ្ងៃទី២៨ ខែកញ្ញា ឆ្នាំ២០២៣ ក្រោមអធិបតីលោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោកគិត ម៉េង ប្រធានសភាពាណិជ្ជកម្មកម្ពុជានិងជាសហប្រធានក្រុមប្រឹក្សាពិគ្រោះយោបល់ ធុរកិច្ចអាស៊ាន។
បន្ថែមពីនេះក៏មានវត្តមានចូលរួមពីឯកអគ្គរដ្ឋទូតបារាំង ឯកអគ្គរដ្ឋទូតអាល្លឺម៉ង់ តំណាងសហភាពអឺរ៉ុបប្រចាំនៅកម្ពុជា អ្នកជំនាញ និងធុរជនមកពីបណ្តាប្រទេសអាស៊ាន អឺរ៉ុប និងតំបន់មេគង្គ។ នេះបើយោងតាមសេចក្តីប្រកាសរបស់សភាពាណិជ្ជកម្មកម្ពុជា។
បើតាមសេចក្តីប្រកាស ក្នុងកិច្ចប្រជុំនោះ លោកគិត ម៉េង បានថ្លែងថា តំបន់មេគង្គជាតំបន់មានសក្តានុពល និងកំណើនសេដ្ឋកិច្ចខ្ពស់ហើយប្រទេសនីមួយៗមានវប្បធម៌ស្រដៀងគ្នា មានមិត្តភាពរឹងមាំនិងសក្តានុពលដោយមានធនធាននិងរចនាសម្ព័ន្ធឧស្សាហកម្ម ហើយសមត្ថភាពបំពេញឱ្យគ្នាទៅវិញទៅមក។
លោកលឹម ហេង អនុប្រធានសភាពាណិជ្ជកម្មកម្ពុជា បានឱ្យដឹងថា កិច្ចប្រជុំនេះផ្តោតសំខាន់លើការតភ្ជាប់ផ្នែកធុរកិច្ចក្នុងតំបន់ដោយផ្តើមចេញពីតំបន់មេគង្គដែលមានប្រទេសចំនួន៤ រួមមាន កម្ពុជា វៀតណាម ឡាវ និងថៃ ទៅកាន់តំបន់អាស៊ាន ដែលសង្កត់ធ្ងន់ទៅលើការធ្វើសមាហរណកម្មអាស៊ាន។
លោកបានបញ្ជាក់ថា ក្រៅពីនេះ ភាគីកម្ពុជាក៏ឆ្លៀតស្នើដល់បណ្តាប្រទេសអាស៊ាន អឺរ៉ុប និងអនុតំបន់មេគង្គឱ្យ ស្វែងរកលទ្ធភាពធ្វើធុរកិច្ចនៅកម្ពុជា តួយ៉ាងបង្កើតរោងចក្រ និងនាំចេញផលិតផលទៅកាន់ទីផ្សារពិភពលោក ក្រោមយន្តការកិច្ចព្រមព្រៀងសេរីនានាដែលកម្ពុជាមាន ខណៈកម្ពុជាមានវេទិការាជរដ្ឋាភិបាល-ផ្នែកឯកជនជាប់ចំណាត់លេខ១ នៅទូទាំងពិភពលោកដែលជាវេទិកាដ៏មានប្រសិទ្ធភាពក្នុងការអភិវឌ្ឍវិស័យឯកជន។
លោកបានបន្តថា៖«យើងឥឡូវធ្វើតែ៤ប្រទេសសិន តែតទៅមុខទៀតយើងបន្តធ្វើបន្ថែមជាមួយបណ្តាប្រទេសសមាជិកសហគមន៍សេដ្ឋកិច្ចអាស៊ាន។ នេះជាការបោះជំហានក្នុងពង្រីកនិងការតភ្ជាប់សេដ្ឋកិច្ចសម្រាប់ទីផ្សារពិភពលោក ដោយសារអាស៊ានមានសក្តានុពលសេដ្ឋកិច្ចធំក្នុងលោក»។
ជាមួយនេះដែរ លោកលឹម ហេង បានបង្ហាញសុទិដ្ឋនិយមខ្ពស់ចំពោះការតភ្ជាប់គ្នាក្នុងតំបន់អាស៊ានជាមួយដៃគូ ខណៈសហគមន៍អាស៊ានកំពុងមានសក្តានុពលសេដ្ឋកិច្ច បូករួមជាមួយដៃគូក្នុងកិច្ចព្រមព្រៀងជាទីផ្សារធំជាងគេក្នុងពិភពលោក ជាពិសេសការតភ្ជាប់ក្នុងចំណោមប្រទេសនៃកិច្ចព្រមព្រៀងដៃគូសេដ្ឋកិច្ចគ្រប់ជ្រុងជ្រោយតំបន់(RCEP) ដែលមានប្រទេសអាស៊ាន១០ ចិន ជប៉ុន កូរ៉េ អូស្ត្រាលី និងនូវែលសេឡង់៕
.jpg)
