ក្មេងៗលេងទឹកតាមបណ្ដោយទន្លេបាសាក់ ក្នុងខណ្ឌច្បារអំពៅ នាពេលកន្លងទៅ។ រូបថត ហេង ជីវ័ន
ក្រចេះៈ លោក យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានថ្លែងនាឱកាសប្រារព្ធទិវាស្បៀងអាហារពិភពលោកឆ្នាំ ២០២៣ នាខេត្តក្រចេះថា ទិវាស្បៀងអាហារពិភពលោក នៅឆ្នាំ ២០២៣ ផ្តោតលើការគ្រប់គ្រងទឹកប្រកបដោយប្រសិទ្ធភាព បានដើរតួនាទីសំខាន់ សម្រាប់វិស័យកសិកម្ម ក្នុងការផ្ដល់ប្រភពចំណូលដល់គ្រួសារកសិករ។
នៅថ្ងៃទី ១៦ ខែតុលា ឆ្នាំ ២០២៣ ក្រសួងកសិកម្ម រុក្ខាប្រមាញ់ និងនេសាទ សហការជាមួយអង្គការស្បៀង និងកសិកម្មនៃសហប្រជាជាតិ (FAO) កម្មវិធីស្បៀងអាហារពិភពលោកប្រចាំកម្ពុជា (WFP) និងមជ្ឈមណ្ឌលកសិកម្មអន្តរជាតិកូរ៉េនៅកម្ពុជា (KOPIA) បានរៀបចំប្រារព្ធខួបលើកទី ៤៣ ទិវាស្បៀងអាហារពិភពលោកឆ្នាំ ២០២៣ ក្រោមប្រធានបទ «ទឹកជាជីវិត ទឹកជាអាហារ មិនទុកឱ្យនរណាអត់អាហារឡើយ»។
នាពិធីនេះ លោក យ៉ង សាំងកុមារ បានលើកឡើងថា ប្រធានបទនៃទិវានេះ មានគោលបំណងបំផុសស្មារតីឱ្យទាំងអស់គ្នាយល់ដឹង និងទទួលស្គាល់ពីតួនាទីដ៏មានសារៈសំខាន់មិនអាចខ្វះបាននៃទឹកដែលត្រូវបានគេចាត់ទុកជាចំណុចស្នូលនៃការអភិវឌ្ឍសេដ្ឋកិច្ច និងសង្គម។
លោកបញ្ជាក់ថា៖ «ទឹកក៏ជាធាតុជំរុញលើផ្នែកសុខភាព អាហារ បរិស្ថាន ការងារ និងនិរន្តរភាពសង្គម។ សម្រាប់វិស័យកសិកម្មទឹកដើរតួនាទីជាចលករក្នុងការធានាសុវត្ថិភាពស្បៀង និងអាហារូបត្ថម្ភ ដោយគិតគូរយ៉ាងល្អិតល្អន់ពីសុខុមាលភាពប្រជាជន និងបរិស្ថានដើម្បីធ្វើឱ្យប្រសើរឡើងដល់ជីវិតរស់នៅរបស់មនុស្សលោក»។
លោកបន្ថែមថា ទិវាឆ្នាំនេះ ផ្តោតលើសារៈសំខាន់នៃការគ្រប់គ្រងទឹកប្រកបដោយការប្រុងប្រយ័ត្នក្នុងបរិបទកំណើនប្រជាជន ការអភិវឌ្ឍសេដ្ឋកិច្ច នគរូបនីយកម្ម និងការប្រែប្រួលអាកាសធាតុ ខណៈដែលគោលនយោបាយកសិកម្មរបស់រាជរដ្ឋាភិបាលអាណត្តិទី ៧ ក៏មានគោលបំណង ដើម្បីរក្សាបាននូវកំណើនផលិតកម្ម ប្រសិទ្ធភាពសេដ្ឋកិច្ច គុណភាពនិងទីផ្សារ ធានាបាននូវសុវត្ថិភាពនិងសន្តិសុខស្បៀងដែលជួយដល់ការបង្កើនជីវភាពរបស់ប្រជាពលរដ្ឋ។
នាឱកាសនោះដែរ លោកស្រី ថូវឡា មុនថាលី តំណាងអង្គការស្បៀងនិងកសិកម្មនៃសហប្រជាជាតិ (FAO) បានថ្លែងថា ទិវាស្បៀងអាហារពិភពលោក ឆ្នាំ ២០២៣ ប្រព្រឹត្តទៅស្របនឹងខួបទី៧៨ ឆ្នាំនៃការបង្កើតអង្គការស្បៀងនិងកសិកម្មនៃសហប្រជាជាតិ។
ព្រឹត្តិការណ៍ថ្ងៃនេះ គឺជាទិវាមួយដែលតែងតែប្រារព្ធឡើងរាល់ឆ្នាំក្នុងប្រតិទិនព្រឹត្តិការណ៍សំខាន់ៗរបស់អង្គការសហប្រជាជាតិ ដែលត្រូវបានរៀបចំរួមគ្នាដោយការិយាល័យប្រចាំប្រទេសរបស់អង្គការស្បៀង និងកសិកម្មនៃសហប្រជាជាតិ រដ្ឋាភិបាល និងអាជ្ញាធរមូលដ្ឋាន ព្រមទាំងដៃគូនានា នៅតាមបណ្តាប្រទេសជាង ១៥០ នៅទូទាំងពិភពលោក។
លោកស្រី ថូវឡា មុនថាលី បញ្ជាក់ថា៖ «ប្រធានបទឆ្នាំនេះ គឺទឹកជាប្រភពនៃជីវិត ទឹកជាប្រភពនៃអាហារ និងមិនទុកនរណាម្នាក់ចោល។ ទឹក គឺជាធនធានដ៏មានតម្លៃបំផុតរបស់ភពផែនដី ដែលត្រូវបានកំណត់ជាប្រធានបទសម្រាប់ការប្រារព្ធទិវាស្បៀង អាហារពិភពលោកឆ្នាំនេះ។ ទឹក គឺជាធនធានដ៏សំខាន់សម្រាប់ជីវិត និងជីវភាពរស់នៅ។ ទឹកបានជួយកាត់បន្ថយភាពស្រេកឃ្លាន និងភាពក្រីក្រព្រមទាំងជួយដល់ការសម្រេចបានគោលដៅអភិវឌ្ឍន៍ប្រកបដោយចីរភាព»។
បើតាមអង្គការស្បៀង និងកសិកម្មនៃសហប្រជាជាតិ (FAO) បញ្ហាបម្រែបម្រួលអាកាសធាតុ កំណើនប្រជាជន នគរូបនីយកម្ម ឧស្សាហូបនីយកម្ម និងការអភិវឌ្ឍសេដ្ឋកិច្ចសង្គម កំពុងដាក់សម្ពាធកាន់តែខ្លាំងចំពោះធនធានទឹក។ ការកើនឡើងកម្ដៅខ្លាំង គ្រោះរាំងស្ងួត និងទឹកជំនន់ កំពុងតែបង្កើនសម្ពាធដល់ប្រព័ន្ធអេកូឡូស៊ីរបស់យើងដែលការណ៍នេះផ្តល់ផលវិបាកដ៏ធ្ងន់ចំពោះសន្តិសុខស្បៀងសកល។
បច្ចុប្បន្នប្រជាជនជាង ១ ភាគ ៣ នៃពិភពលោក នៅតែបន្តរស់នៅដោយគ្មានទឹកស្អាតប្រើប្រាស់។ កសិករខ្នាតតូច ជាពិសេសស្ត្រី យុវជន ជនជាតិដើមភាគតិច ជនចំណាកស្រុក និងជនភៀសខ្លួន គឺជាអ្នកងាយរងគ្រោះបំផុត។
លោកស្រីតំណាង FAO បញ្ជាក់ថា៖ «យើងត្រូវទាញយកថាមពលផ្នែកវិទ្យាសាស្ត្រ ការច្នៃប្រឌិត ទិន្នន័យនិងបច្ចេកវិទ្យា ដើម្បីផលិតឱ្យបានកាន់តែច្រើនដោយប្រើប្រាស់ទឹកតិចជាងមុន។ ដើម្បីធ្វើឱ្យតំណក់ទឹកមានតម្លៃយើងទាំងអស់គ្នាត្រូវប្រើប្រាស់ និងគ្រប់គ្រងទឹកឱ្យមានប្រសិទ្ធភាព ជាងមុន។ កសិកម្មជាវិស័យដ៏សំខាន់ដែលបានប្រើប្រាស់ទឹកសាបរបស់ពិភពលោកប្រមាណ ៧០ ភាគរយ»៕
.jpg)
