ផ្ទះពេលរដ្ឋក្នុងខណ្ឌដង្កោពេលទឹកលិចកាលពីថ្ងៃទី១៩ តុលា ។ ហេង ជីវ័ន
ភ្នំពេញៈ ក្រសួងធនធានទឹក និងឧតុនិយម បានប្រកាសឱ្យដឹងថា ចាប់ពីថ្ងៃទី ២២ ដល់ថ្ងៃទី ២៥ ខែតុលា នៅតាមបណ្តាខេត្តមួយចំនួនដូចជា ខេត្តស្ទឹងត្រែង ព្រះវិហារ រតនគិរី និងខេត្តមណ្ឌលគិរី នៅតែមានភ្លៀងធ្លាក់ ហើយក្រសួងក៏បានអំពាវនាវឱ្យពលរដ្ឋបន្តប្រុងប្រយ័ត្នខ្ពស់ចំពោះជំនន់ទឹកភ្លៀង។
ក្រសួងបានជូនដំណឹងដូចនេះនៅពីថ្ងៃទី២២ ខែតុលា ដោយបានលើកឡើងថា ប្រព័ន្ធសម្ពាធខ្ពស់កម្រិតមធ្យម ដែលលាតសន្ធឹងពីប្រទេសចិន អូសបន្លាយដល់ប្រទេសថៃផ្នែកខាងលើនិងសមុទ្រចិនភាគខាងត្បូង បានរលាយបាត់។
ទន្ទឹមនឹងនេះខ្យល់មូសុង និរតី ដែលកំពុងមាននៅលើឈូងសមុទ្របេងហ្គាល់ (Bay of Bengal) និងនៅលើសមុទ្រអាដាំមែន (Andaman Sea) នឹងគ្របដណ្តប់លើឈូងសមុទ្រថៃ បានកើនឥទ្ធិពលខ្លាំង។
ក្រសួងបានបញ្ជាក់ថា៖«នៅរាជធានីភ្នំពេញ តំបន់មាត់សមុទ និងតំបន់ទំនាបកណ្តាល នឹងមានភ្លៀងធ្លាក់នៅក្នុងកម្រិតបង្គួរលាយឡំនឹងផ្គររន្ទះជាមួយនឹងទំហំទឹកភ្លៀងធ្លាក់គ្របដណ្តប់លើផ្ទៃដីពី៥០ភាគរយទៅ៦០ភាគរយ»។ សូមប្រជាពលរដ្ឋត្រូវប្រុងប្រយ័ត្នខ្ពស់ចំពោះស្ថានភាពនេះ ដែលអាចបង្កជាជំនន់ទឹកភ្លៀង»។
ទាក់ទងនឹងជំនន់ទឹកភ្លៀងនេះដែរកាលពីរសៀលថ្ងៃទី២១ ខែតុលា លោក ឃួង ស្រេង អភិបាលរាជធានីភ្នំពេញ ដែលបានដឹកនាំមន្ទីរជំនាញនិងអាជ្ញាធរចុះពិនិត្យមើលស្ថានភាពទឹកជំនន់តាមបណ្ដោយសណ្តស្ទឹងព្រែកត្នោត ក្នុងខណ្ឌដង្កោបានថ្លែងអំពាវនាវឱ្យប្រជាពលរដ្ឋមានការប្រុងប្រយ័ត្នខ្ពស់ បើទោះបីជាទឹកមានសភាពនឹងនរនិងឈានទៅរកភាពស្រកវិញក៏ដោយ។
លោកថ្លែងប្រាប់អ្នកសារព័ត៌មាននាពេលនោះថា ៖ «ស្ថានភាពទឹកជំនន់ទឹកភ្លៀងនៅព្រៃកត្នោត គិតមកទល់ពេលនេះ មានសភាពនៅទ្រឹង ប៉ុន្តែទោះបីជាយ៉ាងណាក្តី សូមបងប្អូនប្រជាពលរដ្ឋទាំងអស់ដែលទទួលរងការលិចលង់នេះត្រូវមានការប្រុងប្រយ័ត្នឱ្យបានខ្ពស់ ពិសេសក្មេងតូចៗ»។
លោកបានបន្តថា ៖ «តាមពិតទឹកនេះវាធំ ប៉ុន្តែមិនបានបាចសាចលិចដូចទៅនឹងឆ្នាំមុនៗទេ ដោយសារយើងធ្វើទំនប់ទប់ស្កាត់មួយនៅជិតភូមិភាគពិសេស ហើយសម្រាប់ពលរដ្ឋនៅតាមសណ្តដែលពួកគាត់សុំាហើយដែលឆ្នាំណាក៏លិចដែរ»។
បើគិតមកទល់ពេលនេះសង្កាត់ចំនួន១០ នៅតាមបណ្ដោយស្ទឹងព្រែកត្នោត ក្នុងខណ្ឌដង្កោបានទទួលរងការលិចលង់ និងបានធ្វើឱ្យប្រជាពលរដ្ឋ ២ ០៧៥គ្រួសារ ទទួលរងគ្រោះដោយការលិចលង់នេះ ប៉ុន្តែមិនមានផលប៉ះពាល់ធ្ងន់ធ្ងរដល់អាយុជីវិតទេ ហើយអាជ្ញាធរក៏បានត្រៀមផ្តល់អំណោយដល់ពួកគាត់ផងដែរ។
លោក ឃួង ស្រេង បានថ្លែងថា សម្រាប់ការត្រៀមកងកម្លាំងក្នុងការជួយប្រជាពលរដ្ឋគឺបានត្រៀមជាប់ជាប្រចាំសម្រាប់ជួយពលរដ្ឋនៅពេលជួបការលំបាក ឬគ្រោះថ្នាក់អ្វីមួយ។
បើតាមរដ្ឋបាលរាជធានីភ្នំពេញ សង្កាត់ទាំង១០របស់ខណ្ឌដង្កោ ដែលបានទទួលរងការលិចលង់នេះ រួមមាន សង្កាត់គងនយ,សង្កាត់ទៀន, សង្កាត់សាក់សំពៅ,សង្កាត់ព្រៃស,សង្កាត់ដង្កោ,សង្កាត់ក្រាំងពង្រ,សង្កាត់ជើងឯក,សង្កាត់ព្រែកកំពឹស, សង្កាត់ស្ពានថ្ម និងសង្កាត់រលួស ដែលសង្កាត់ទាំងនេះរងការលិចលង់មួយផ្នែកខ្លះនៃសង្កាត់ប៉ុណ្ណោះ។
លោក វ៉ី សំណាង អភិបាលខេត្តកំពង់ស្ពឺ នៅថ្ងៃទី២២ ខែតុលា បានឱ្យដឹងដែរថា ស្ថានភាពជំនន់ទឹកភ្លៀងនៅក្នុងខេត្តកំពង់ស្ពឺគិតត្រឹមថ្ងៃទី២២ ខែតុលា បានស្រកទៅវិញច្រើនហើយនិងមិនមានអ្វីជាផលប៉ះពាល់ធំដុំទេ។
រីឯទឹកនៅតាមសណ្តស្ទឹងព្រែកត្នោតវិញ ក៏ត្រូវបានបិទ ដើម្បីរក្សាទឹកទុក ព្រោះកន្លែងខ្លះស្ថិតនៅក្នុងកម្រិតដែលត្រូវរក្សាទុកសម្រាប់ប្រើប្រាស់។
លោក វ៉ី សំណាង បានថ្លែងថា៖«ខ្ញុំគិតថា មិនជាបញ្ហាទេ ដូចយប់មិញអី ភ្លៀងធ្លាក់ស្ទើរគ្រប់ស្រុក ក្រុង ហើយនៅពេលព្រលឹមឡើង យើងបូកសរុប មិនមានកន្លែងណាមួយរងផលប៉ះពាល់នោះទេ ហើយទឹកស្ទឹងក៏អាចឱ្យយើងរៀបចំបុណ្យអុំទូកនៅពេលខាងមុខបានដែរ»។
នៅថ្ងៃទី២២ ខែតុលានោះដែរ ថ្នាក់ដឹកនាំកាកបាទក្រហម បានចុះចែកអំណោយមនុស្សធម៌ដល់ប្រជាពលរដ្ឋរងគ្រោះដោយទឹកជំនន់ទឹកភ្លៀងចំនួន២ ១០១គ្រួសារនៅខណ្ឌដង្កោ រាជធានីភ្នំពេញ ដែលកំពុងស្នាក់នៅបណ្តោះអាសន្នលើទីទួលសុវត្ថិភាព។
យោងតាមហ្វេសប៊ុកក្រសួងធនធានទឹកកាលពីថ្ងៃទី២១ ខែតុលា លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានចុះពិនិត្យស្ថានភាពប្រឡាយ៩៤ និង៩៦ ស្ថិតក្នុងសង្កាត់កំពង់
សំណាញ់ ក្រុងតាខ្មៅ ខេត្តកណ្តាល។
ឆ្លៀតឱកាសនោះ លោក ថោ ជេដ្ឋា ក៏បានអំពាវនាវដល់ប្រជាពលរដ្ឋបន្តការប្រុងប្រយ័ត្ន និងថែរក្សាសុខភាព ដោយការផឹកស្អាត ហូបស្អាត និងរស់នៅស្អាត និងបានណែនាំដល់មន្ត្រីពាក់ព័ន្ធទាំងអស់ ជាពិសេសមន្ទីរធនធានទឹក និងឧតុនិយមបន្តសហការជាមួយអាជ្ញាធរមូលដ្ឋានតាមដានដោយយកចិត្តទុកដាក់និងឆ្លើយតបឱ្យបានទាន់ពេលវេលាប្រកបដោយការទទួលខុសត្រូវខ្ពស់បំផុត៕
