មន្ត្រីប្រជុំរៀបចំអនុក្រឹត្យពីថ្ងៃទី ២៣ តុលា។ រូបថត ក្រសួងមហាផ្ទៃ
ភ្នំពេញៈ ក្រសួងមហាផ្ទៃកំពុងរៀបចំសេចក្តីព្រាងអនុក្រឹត្យស្តីពីការប្រើប្រាស់កងកម្លាំង មធ្យោបាយ ដើម្បីការពារព្រឹត្តិការណ៍ជាតិ អន្តរជាតិ និងបុណ្យប្រពៃណីជាតិនានា ក្នុងនោះមានក្បួនយានយន្តហែអម ការប្រើប្រាស់ភ្លើងសញ្ញាពិសេស សូរសព្ទពិសេស និងសិទ្ធិអាទិភាពក្នុងការធ្វើចរាចរណ៍ជាដើម។
ការរៀបចំសេចក្តីព្រាងអនុក្រឹត្យនេះ នៅថ្ងៃទី ២៣ ខែតុលា ឆ្នាំ ២០២៣ លោក ម៉ៅ ច័ន្ទតារា រដ្ឋមន្ត្រីស្តីទីក្រសួងមហាផ្ទៃបានដឹកនាំកិច្ចប្រជុំពិនិត្យ និងពិភាក្សា ដោយមានការចូលរួមពីរដ្ឋលេខាធិការ អនុរដ្ឋលេខាធិការតំណាងអង្គភាពចំណុះក្រសួងមហាផ្ទៃ និងមន្ត្រីពាក់ព័ន្ធផងដែរ។នេះបើតាមហ្វេសប៊ុកក្រសួងមហាផ្ទៃ។
បើតាមប្រភពដដែល ក្នុងកិច្ចប្រជុំនោះ លោក ម៉ៅ ច័ន្ទតារា បានលើកឡើងថា កន្លងមកមិនទាន់មានឯកសារគតិយុត្ត ឬអនុក្រឹត្យណែនាំណាមួយឱ្យបានច្បាស់លាស់ពាក់ព័ន្ធនឹងការប្រើប្រាស់កម្លាំងនគរបាលជាតិដើម្បីឆ្លើយតបទៅនឹងព្រឹត្តិការណ៍នានានៅកម្ពុជានៅឡើយ គឺមានតែជាបទបញ្ជាដាក់ចេញតាមភាពជាក់ស្តែងប៉ុណ្ណោះ។
លោកបានថ្លែងថា៖ «ដូច្នេះថ្ងៃនេះយើងរៀបចំកិច្ចប្រជុំនេះឡើងដើម្បីពិនិត្យ និងពិភាក្សាប្រមូលធាតុចូលសំខាន់ៗដើម្បីរៀបចំសេចក្តីព្រាងអនុក្រឹត្យមួយឱ្យបានច្បាស់លាស់ និងមានភាពងាយស្រួលក្នុងការគ្រប់គ្រង ក៏ដូចជាប្រើប្រាស់កម្លាំងនគរបាលជាតិ ដើម្បីឆ្លើយតបទៅនឹងព្រឹត្តិការណ៍នានានៅកម្ពុជាឱ្យបានសមស្រប»។
លោក ឆាយ គឹមខឿន អគ្គស្នងការរងនិងជាអ្នកនាំពាក្យអគ្គស្នងការដ្ឋាននគរបាលជាតិ ដែលបានចូលរួមពិភាក្សាដែរ នោះ មិនអាចទាក់ទងសុំធ្វើ អត្ថាធិប្បាយបន្ថែមបានទេ នៅថ្ងៃទី ២៣ ខែតុលា ឆ្នាំ ២០២៣។
ចំណែក លោក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញបានប្រាប់ថា នៅពេលអនុក្រឹត្យនេះចេញមកនឹងធ្វើឱ្យការអនុវត្តរបស់កងកម្លាំងកាន់តែមានប្រសិទ្ធភាព និងមានការទទួលខុសត្រូវបន្ថែមទៀត ជាពិសេសអនុវត្តប្រកបដោយប្រសិទ្ធភាពថែមទៀត។
ទោះជាយ៉ាងណា លោកបានបញ្ជាក់ថា ការប្រើប្រាស់កងកម្លាំង មធ្យោបាយ ដើម្បីការពារព្រឹត្តិការណ៍ជាតិ អន្តរជាតិ និងបុណ្យប្រពៃណីជាតិនានា និងក្បួនយានយន្តហែអម រួមនឹងបញ្ហាផ្សេងទៀតកន្លងមក គឺកម្លាំងរបស់ស្នងការដ្ឋាននគរបាលរាជធានីភ្នំពេញបានអនុវត្តបានយ៉ាងខ្ជាប់ខ្ជួន និងប្រកបដោយប្រសិទ្ធភាព និងទទួលខុសត្រូវ ហើយកងកម្លាំងក៏បានរៀបចំសម្រាប់ត្រៀមចូលរួមក្បួនក្នុងពិធិបុណ្យឯករាជ្យជាតិនៅថ្ងៃទី ៩ ខែវិច្ឆិកា ខាងមុខ ផងដែរ។
លោក សំ វិច្ឆិកា បានបញ្ជាក់ថា៖ «អនុវត្តតាមគោលការណ៍ដឹកនាំរបស់អគ្គស្នងការដ្ឋាននគរបាលជាតិ ស្នងការដ្ឋាននគរបាលរាជធានីភ្នំពេញ យើងបានរៀបចំកងកម្លាំង និងកំពុងហ្វឹកហាត់ជាបណ្តើរៗ ដោយបានសហជាមួយសមត្ថកិច្ចគ្រប់ផ្នែកក្នុងការចូលរួមក្នុងពិធីបុណ្យ ឯករាជ្យជាតិ នៅពេលខាងមុខ»។
អ្នកនាំពាក្យដដែលបន្ថែមថា៖ «និយាយទៅ យើងបានត្រៀមខ្លួនទាំងអស់ក្នុងការចូលរួមការពារ និងចូលរួមបុណ្យជាតិ ព្រមទាំងបានអនុវត្តដោយទទួលបានជោគជ័យនាពេលកន្លងមករួចហើយ ហើយបើមានអនុក្រឹត្យថ្មីបន្ថែមទៀតវានឹងធ្វើឱ្យការបំពេញភារកិច្ចរបស់យើងកាន់តែមានការទទួលខុសត្រូវ និងអនុវត្តប្រកបដោយប្រសិទ្ធភាពថែមទៀត»៕
