មន្ត្រីសុខាភិបាល នៅក្នុងវគ្គបណ្ដុះបណ្ដាល ស្ដីពីបច្ចេកទេសបង្ការ និងកម្ចាត់ជំងឺគ្រុនចាញ់ កាលពីថ្ងៃទី២៣តុលា។ រូបថត ក្រសួងសុខាភិបាល
ភ្នំពេញៈកម្ពុជា និងចិន បានសហការគ្នារៀបចំវគ្គបណ្ដុះបណ្ដាលស្ដីពីបច្ចេកទេសបង្ការ និងកម្ចាត់ជំងឺគ្រុនចាញ់ ទៅដល់មន្ត្រីសុខាភិបាលកម្ពុជាមកពីខេត្តចំនួន ២១ ដើម្បីផ្ដល់ចំណេះដឹង និងជំនាញបន្ថែមក្នុងការតាមដានគ្រប់គ្រងនិងព្យាបាលជំងឺគ្រុនចាញ់ ឱ្យកាន់តែមានភាពប្រសើរឡើង។
តាមរយៈហ្វេសប៊ុកក្រសួងសុខាភិបាល នៅថ្ងៃទី២៣ ខែតុលា បានលើកឡើងថា វគ្គបណ្ដុះបណ្ដាលនេះរៀបចំដោយមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ រួមនឹងអគ្គនាយកដ្ឋានរដ្ឋបាលផ្នែកបង្ការ និងគ្រប់គ្រងជំងឺនៃខេត្តហៃណាន ប្រទេសចិន ជូនដល់មន្ត្រីសុខាភិបាលកម្ពុជាសរុបចំនួន ៣០នាក់ ដែលមកពីបណ្ដាខេត្តចំនួន២១។
វគ្គបណ្ដុះបណ្ដាលនេះត្រូវបានធ្វើឡើងរយៈពេល ៥ ថ្ងៃ គឺចាប់ពីថ្ងៃទី២៣ ដល់ថ្ងៃទី២៧ ខែតុលា ដោយមានការសិក្សាដោយផ្ទាល់ ជាមួយអ្នកជំនាញសុខភាពសាធារណៈ និងការចុះធ្វើទស្សនកិច្ចនៅមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ និងទស្សនកិច្ចនៅខេត្តកំពង់ស្ពឺ មន្ទីរពេទ្យបង្អែកខេត្ត មណ្ឌលសុខភាពចំបក់ និងជួបជាមួយអ្នកស្ម័គ្រចិត្តចុះព្យាបាលជំងឺគ្រុនចាញ់នៅភូមិរំដួលថ្មីផងដែរ។
លោក ហុក គឹមចេង អគ្គនាយកបច្ចេកទេស នៃក្រសួងសុខាភិបាល បានលើកឡើងពីគោលបំណងនៃវគ្គបណ្ដុះបណ្ដាលនេះថា ជាការចែករំលែកចំណេះដឹង និងបទពិសោធន៍ដល់មន្ត្រីសុខាភិបាលកម្ពុជាដើម្បីបង្កើនចំណេះដឹង និងជំនាញបន្ថែមទៀត ក្នុងការតាមដានគ្រប់គ្រងនិងព្យាបាលជំងឺគ្រុនចាញ់ឱ្យកាន់តែមានភាពប្រសើរឡើងថែមទៀត។
លោកក៏បានអំពាវនាវដល់មន្ត្រីសុខាភិបាលទាំងអស់ ដែលបានចូលរួម ត្រូវខិតខំយកចិត្តទុកដាក់បន្ថែមទៀត ដើម្បីកម្ពុជាឈានទៅសម្រេចគោលដៅជាតិក្នុងការលុបបំបាត់ជំងឺគ្រុនចាញ់ក្នុងឆ្នាំ២០២៥។
ទាក់ទងរឿងនេះ លោក នុត សម្បត្តិ ប្រធានវិទ្យាស្ថានវេជ្ជសាស្ត្រ ជីវសាស្ត្រ និងកសិកម្ម នៃរាជបណ្ឌិត្យសភាកម្ពុជា បានថ្លែងនៅថ្ងៃទី២៤ ខែតុលាថា ការបណ្តុះបណ្តាលនេះ ពិតជាល្អណាស់ ពីព្រោះភាគីចិនមានបទពិសោធន៍ច្រើនទៅលើការងារគ្រប់គ្រង និងព្យាបាលជំងឺគ្រុនចាញ់ជាយូរមកហើយ។
ការងារកម្ចាត់ជំងឹគ្រុនចាញ់នេះ ចិនក៏បានធ្វើការស្រាវជ្រាវ និងផលិតថ្នាំសម្រាប់ព្យាបាលជំងឺគ្រុនចាញ់បានដោយខ្លួនឯងផងដែរ ខណៈដែលលោកអះអាងថា ថ្នាំព្យាបាលជំងឺគ្រុនចាញ់របស់ចិន គឺមានប្រសិទ្ធភាពខ្ពស់ណាស់។
លោកបានថ្លែងថា៖ «វាជាការសំខាន់ និងមានប្រយោជន៍ណាស់សម្រាប់កម្ពុជាយើង ដោយសារការសហការរបស់ចិន នឹងជួយកម្ពុជាលុបបំបាត់ជំងឺគ្រុនចាញ់ ខណៈប្រទេសយើងក៏សម្បូរអ្នកកើតជំងឺគ្រុនចាញ់ដែរ ដូច្នេះខ្ញុំជឿថា វាមានប្រសិទ្ធភាពខ្ពស់ ក្នុងការជួយយើងលុបបំបាត់ជំងឺគ្រុនចាញ់»។
សូមរំឭកដែរថា កាលពីខែសីហាកន្លងមក ក្រសួងសុខាភិបាល បានចេញសារាចរណែនាំឱ្យគ្រប់ភាគីពាក់ព័ន្ធទាំងអស់ ត្រូវយកចិត្តទុកដាក់ខ្ពស់ ក្នុងការគ្រប់គ្រងករណីជំងឺគ្រុនចាញ់ដែលនាំចូលពីបណ្ដាប្រទេសផ្សេងៗមកប្រទេសកម្ពុជា ដើម្បីបង្ការការចម្លង និងទប់ស្កាត់ការវិលត្រឡប់មកវិញនៃជំងឺគ្រុនចាញ់។
របាយការណ៍របស់កម្មវិធីជាតិប្រយុទ្ធនឹងជំងឺគ្រុនចាញ់ បានឱ្យដឹងដែរថា ក្នុងឆ្នាំ២០២១ អត្រាឈឺជំងឺគ្រុនចាញ់សរុប មាន ៤ ២៧៩ករណី ដែលចំនួននេះបានបន្តថយចុះ ៥៤ភាគរយ បើធៀបនឹងឆ្នាំ២០២០ ដែលមាន ៩ ២៣៤ករណី។
កម្មវិធីជាតិប្រយុទ្ធនឹងជំងឺគ្រុនចាញ់ បង្ហាញថា ប្រទេសកម្ពុជាធ្លាប់មានករណីជំងឺគ្រុនចាញ់ជាង ១៧ម៉ឺនករណី នាទសវត្សរ៍ឆ្នាំ៨០ និងស្លាប់ជិត ១ ០០០នាក់។ ក្នុងឆ្នាំ២០១៨ ករណីស្លាប់ដោយសារជំងឺគ្រុនចាញ់លែងមានរហូតមកដល់បច្ចុប្បន្ន មានន័យថា កម្ពុជាសម្រេចបានជោគជ័យមុនគោលដៅគ្រោងទុក ឆ្នាំ២០២០៕
