.jpg)
សិស្សានុសិស្សកំពុងអង្គុយរៀនក្នុងថ្នាក់ នាពេលកន្លងទៅ។ រូបថត ហុង មិនា
ភ្នំពេញៈ រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានចេញសេចក្តីណែនាំមិនឱ្យសិស្សប្រើទូរស័ព្ទដៃ ឬឧបករណ៍អេឡិចត្រូនិក ក្នុងថ្នាក់រៀន ឬម៉ោងសិក្សា ដែលមិនបម្រើឱ្យសកម្មភាពសិក្សាដោយគ្មានការអនុញ្ញាតពីគ្រូកំពុងបង្រៀននោះឡើយ។
លោកបានចេញសេចក្ដីណែនាំកាលពីថ្ងៃទី ២៤ ខែតុលា ឆ្នាំ ២០២៣ ថា ក្នុងបរិបទនៃការអប់រំឌីជីថល ឧបករណ៍អេឡិចត្រូនិកប្រព័ន្ធអ៊ីនធឺណិត និងមាតិកាឌីជីថលមានសារៈសំខាន់ណាស់សម្រាប់បម្រើដល់ការបង្រៀន ការរៀន និងការស្រាវជ្រាវ។ ប៉ុន្តែក្នុងគោលដៅពង្រឹងវិន័យ និងបង្កើនប្រសិទ្ធភាព នៃការប្រើប្រាស់ឧបករណ៍អេឡិចត្រូនិកក្នុងបរិវេណគ្រឹះស្ថានសិក្សាសាធារណៈ ក្រសួងណែនាំដល់មន្ទីរអប់រំរាជធានី-ខេត្ត គណៈគ្រប់គ្រងគ្រឹះស្ថានសិក្សាសាធារណៈ លោកគ្រូ អ្នកគ្រូ និងសិស្សានុសិស្សទាំងអស់ ហាមឃាត់ការប្រើប្រាស់ទូរស័ព្ទដៃ ឬឧបករណ៍អេឡិចត្រូនិកក្នុងថ្នាក់រៀនដែលមិនបម្រើដល់ការសិក្សា។
លោករដ្ឋមន្ត្រីបញ្ជាក់ថា៖ «ការប្រើប្រាស់ទូរស័ព្ទដៃឬឧបករណ៍អេឡិចត្រូនិកក្នុងថ្នាក់រៀន ឬម៉ោងសិក្សាដែលមិនបម្រើឱ្យសកម្មភាពសិក្សាត្រូវហាមឃាត់ជាដាច់ខាត បើគ្មានការអនុញ្ញាតពីគ្រូកំពុងបង្រៀនជាពិសេសការលេងហ្គេម និងបណ្តាញទំនាក់ទំនងសង្គម ដែលមិនពាក់ព័ន្ធនឹងសកម្មភាពសិក្សា»។ ក្រសួងបានណែនាំឱ្យគ្រូកំពុងបង្រៀនក្នុងថ្នាក់ និងប្រធានថ្នាក់ត្រូវណែនាំសិស្សក្នុងថ្នាក់កុំប្រើឧបករណ៍អេឡិចត្រូនិកនាំឱ្យខាត ឬរំខានដល់ការសិក្សា។
ចំណែកសម្រាប់សកម្មភាពក្នុងបរិវេណសាលារៀនវិញ ក្រសួងក៏បានណែនាំឱ្យគណៈគ្រប់គ្រងគ្រឹះស្ថានសិក្សា ត្រូវណែនាំជាប្រចាំពីវិន័យនិងបទបញ្ជាផ្ទៃក្នុងរបស់សាលារៀនដល់សិស្សានុសិស្សពាក់ព័ន្ធនឹងការប្រើប្រាស់ទូរស័ព្ទដៃ និងឧបករណ៍អេឡិចត្រូនិក ឱ្យស្របនឹងគោលបំណងនៃការអប់រំ។
សេចក្តីណែនាំបន្តថា៖ «ក្រុមប្រឹក្សាកុមារនិងក្រុមប្រឹក្សាយុវជនត្រូវចូលរួមណែនាំសមាជិក ឱ្យផ្តោតលើការសិក្សារៀនសូត្រ ជាជាងការចំណាយពេលលើការលេងហ្គេមនិងការប្រើប្រាស់បណ្តាញទំនាក់ទំនងសង្គម ដែលមិនពាក់ព័ន្ធនឹងសកម្មភាពសិក្សា ដោយធ្វើយ៉ាងណាជំរុញ និងលើកទឹកចិត្តឱ្យសិស្សមានទម្លាប់ធ្វើស្វ័យសិក្សា អាន និងស្រាវជ្រាវក្នុងបណ្ណាល័យ និងបង្កើត និងអនុវត្តការអប់រំក្រៅម៉ោងសិក្សា ដូចជាក្លិបសិក្សាតាមកម្រិតថ្នាក់ និងតាមមុខវិជ្ជា»។
លោក គង់ សំនៀង ប្រធានសហព័ន្ធសេវាអប់រំកម្ពុជា នៅថ្ងៃទី ២៥ ខែតុលា បានថ្លែងថា បើនិយាយពីការប្រើប្រាស់ទូរស័ព្ទ ឬឧបករណ៍អេឡិចត្រូនិក គឺមានទាំងផលវិជ្ជមាននិងអវិជ្ជមាន។ ជាមួយគ្នានេះលោកបានគាំទ្រចំពោះការណែនាំរបស់រដ្ឋមន្ត្រីក្រសួងអប់រំ ដើម្បីពង្រឹងការរឹតបន្តឹងទៅលើវិន័យ និងគុណភាពអប់រំនៅតាមគ្រឹះស្ថានអប់រំបន្ថែមទៀត។
លោកថា៖ «បើយើងនិយាយពីទូរស័ព្ទមួយរយៈនេះ ឃើញថា មានភាពអនាធិបតេយ្យច្រើនសិស្សខ្លះគាត់យកទូរស័ព្ទរបស់គាត់ទៅថតសកម្មភាពវាយតប់គ្នា គំរាមកំហែងគ្នារហូតធ្វើឱ្យរូបភាពចេញមកខាងក្រៅបង្ហាញពីភាពអវិជ្ជមាន។ ដូច្នេះនៅក្នុងបរិបទថ្មីនៃការប្រើប្រាស់ប្រព័ន្ធឌីជីថលសម្រាប់បម្រើឱ្យការរៀន និងការបង្រៀន គឺត្រូវតែមានភាពបទបែននិងមានការគ្រប់គ្រងឱ្យបានច្បាស់លាស់»។
អ្នកជំនាញអប់រំរូបនេះក៏បានស្នើឱ្យថ្នាក់ក្រោមជាតិ យកចិត្តទុកដាក់ និងអនុវត្តសេចក្តីណែនាំនេះ ដើម្បីកុំឱ្យសិស្សខាតពេលវេលាក្នុងការសិក្សា និងកាត់បន្ថយការចំណាយនានារបស់គ្រួសារពិសេសកុំឱ្យប៉ះពាល់ដល់ធនធានមនុស្សកម្ពុជាផងដែរ។
ជាមួយគ្នានេះក្រសួងអប់រំ ក៏បានណែនាំមាតាបិតានិងអ្នកអាណាព្យាបាលត្រូវចូលរួមតាមដាន និងជំរុញការប្រើប្រាស់ទូរស័ព្ទដៃនិងឧបករណ៍អេឡិចត្រូនិករបស់កូនចៅ ឱ្យស្របតាមគោលបំណងនៃការអប់រំ។ ទន្ទឹមគ្នានេះមន្ទីរអប់រំ រាជធានី-ខេត្ត ការិយាល័យអប់រំ យុវជន និងកីឡា នៃរដ្ឋបាលក្រុងស្រុក ខណ្ឌ និងអាជ្ញាធរពាក់ព័ន្ធ ក៏ត្រូវផ្ដល់កិច្ចសហការ និងគាំទ្រដល់សាលារៀន ក្នុងការពង្រឹងវិន័យ និងការអនុវត្តបទបញ្ជាផ្ទៃក្នុងឱ្យបានម៉ឺងម៉ាត់ផងដែរ៕
