.jpg)
សំណល់គ្រោះថ្នាក់ដែលប្រមូលបាននាពេលកន្លងទៅ។ រូបថត ក្រសួងបរិស្ថាន
ភ្នំពេញៈ ក្រសួងបរិស្ថានសហការជាមួយក្រុមហ៊ុន អេកូបាត អេនើជី អ៊ិនវេសម៉ិន អ៊ិនធើណេសិនណល ឯ.ក ធ្វើការប្រមូលសំណល់អាគុយ ថ្មពិល ព្រមទាំងសំណល់ បរិក្ខារអគ្គិសនី និងអេឡិចត្រូនិក បានចំនួនជាង ៣០ តោន ក្នុងរយៈពេលជាង ១ ឆ្នាំ គិតចាប់ពីខែសីហា ឆ្នាំ២០២២ រហូតមកដល់ខែតុលា ឆ្នាំ ២០២៣ នេះ។
ក្រសួងបរិស្ថានបានឱ្យដឹងតាមរយៈហ្វេសប៊ុកថា ការប្រមូលសំណល់អាគុយ ថ្មពិល ព្រមទាំង សំណល់ បរិក្ខារអគ្គិសនី និងអេឡិចត្រូនិក មានដូចជា ទូរស័ព្ទ កុំព្យូទ័រ ទូរទស្សន៍ ទូទឹកកក ម៉ាស៊ីនត្រជាក់ ម៉ាស៊ីនបោកគក់ ម៉ាស៊ីនព្រីន និងម៉ាស៊ីនថតចម្លង ជាដើមនេះ គោលបំណងសំខាន់គឺ ដើម្បីយកមកទុកដាក់ឱ្យបានត្រឹមត្រូវ និងប្រកបដោយសុវត្ថិភាព កុំឱ្យមានការបង្កផលប៉ះពាល់ដល់បរិស្ថាន ជាពិសេសគឺសុខភាពប្រជាជន។
ប្រភពដដែលបានឱ្យដឹងថា សំណល់អាគុយ ថ្មពិល ព្រមទាំងសំណល់ បរិក្ខារអគ្គិសនី និងអេឡិចត្រូនិក ជាសំណល់គ្រោះថ្នាក់ ព្រោះសំណល់ទាំងនោះ មានផ្ទុកទៅដោយសារធាតុគ្រោះថ្នាក់មានកម្រិតពុលខ្លាំងដូចជា បារត សំណ កាត់ម៉្យូម អាសេនិក នីកែល ក្រូម ទង់ដែង បេរីល្យូម និងសារធាតុទប់ស្កាត់ការឆេះជាដើម ដែលអាចធ្វើឱ្យប៉ះពាល់ធ្ងន់ធ្ងរដល់សុខភាព បើសិនជាការទុកដាក់មិនបានត្រឹមត្រូវ។
ក្រសួងបរិស្ថានបញ្ជាក់ថា៖ «ការទុកដាក់ ឬបោះចោលសំណល់អាគុយ សំណល់ថ្មពិល និងសំណល់បរិក្ខារអគ្គិសនី និងអេឡិចត្រូនិកមិនបានត្រឹមត្រូវ នឹងធ្វើឱ្យមានការសាយភាយសារធាតុគ្រោះថ្នាក់ចូលក្នុងបរិស្ថាន និងបង្កផលប៉ះពាល់ធ្ងន់ធ្ងរដល់សុខភាពមនុស្សដូចជា ប៉ះពាល់ឆ្អឹង ខូចតម្រងនោម ខូចប្រព័ន្ធប្រសាទ ខូចចលនាសាច់ដុំ ខូចប្រព័ន្ធភាពស៊ាំ និងប៉ះពាល់ការបង្កកំណើតទារក និងទារកក្នុងផ្ទៃ ជាដើម»។
តាមរយៈហ្វេសប៊ុកក្រសួងបរិស្ថានអំពាវនាវដល់សាធារណជនចូលរួមរក្សាទុកសំណល់អាគុយ សំណល់ថ្មពិល និងសំណល់បរិក្ខារអគ្គិសនី អេឡិចត្រូនិក បណ្ដោះអាសន្នឱ្យបានត្រឹមត្រូវ។ សាធារណជនអាចយកសំណល់ទាំងនោះ ទៅទុកនៅទីតាំងដែលមានធុងប្រមូលដើម្បីទុកដាក់សំណល់ទាំងនោះ។
លោក ឆឺយ បូណា អ្នកគ្រប់គ្រងកាកសំណល់ នៃក្រុមហ៊ុនអេកូបាតបានឱ្យដឹងនៅថ្ងៃទី ២៥ ខែតុលាថា ក្រុមហ៊ុនបានសហការជាមួយក្រសួងបរិស្ថានចាប់ពីខែសីហា ឆ្នាំ ២០២២ រហូតមកដល់បច្ចុប្បន្ន ដោយគ្រោងនឹងធ្វើការប្រមូលសំណល់ទាំងនោះនៅទូទាំងប្រទេស ប៉ុន្តែជំហានដំបូងនៅឆ្នាំ ២០២២ ដល់ឆ្នាំ ២០២៤ នេះ ក្រុមហ៊ុនផ្តោតការប្រមូលនៅរាជធានីភ្នំពេញជាមុន។ ចំណែកតាមបណ្តាខេត្ត ក្រុមហ៊ុន នឹងធ្វើការជាមួយក្រុមហ៊ុន ដែលបានចុះកិច្ចព្រមព្រៀងដើម្បីចុះទៅប្រមូល។
លោកបញ្ជាក់ថា ចាប់តាំងពីមានកិច្ចសហការជាមួយក្រសួងបរិស្ថាន ក្រុមហ៊ុនប្រមូលសំណល់អាគុយ ថ្មពិល ព្រមទាំងសំណល់បរិក្ខារអគ្គិសនី និងអេឡិចត្រូនិក បានជាង ៣០ តោន ក្នុងនោះមានសំណល់ថ្មពិល ជាង ២ តោន សំណល់អាគុយជាង ១២ តោន និងសំណល់បរិក្ខារអគ្គិសនី និងអេឡិចត្រូនិកជាង ១៧ តោន។
លោក បូណា ប្រាប់ថា ក្រោយការប្រមូលបានរាល់សំណល់ទាំងនោះ ក្រុមហ៊ុនមានក្រុមការងារដើម្បីធ្វើការបែងចែកសំណល់នីមួយៗ ផ្សេងៗពីគ្នា ចំពោះសំណល់ ដែលអាចកែច្នៃដើម្បីប្រើប្រាស់ឡើងវិញបានដាក់ ១ ផ្នែក។ ចំណែកសំណល់គ្រោះថ្នាក់ផ្សេងៗ ក្រុមហ៊ុននឹងរក្សាទុកឱ្យបានត្រឹមត្រូវដើម្បីផ្តល់ជូនក្រុមហ៊ុនដៃគូនៅក្រៅប្រទេសដែលមានសមត្ថភាពធ្វើការបំផ្លាញចោល។
លោកបញ្ជាក់ថា៖ «សំណល់គ្រោះថ្នាក់ដូចជាថ្មពិល និងអាគុយយើងទុកដាក់វាឱ្យបានត្រឹមត្រូវ តាមលក្ខណៈបច្ចេកទេសរបស់វា រហូតដល់គ្រប់ចំនួនណា ១ ទើបក្រុមហ៊ុននាំចេញទៅ ក្រុមហ៊ុននៅក្រៅប្រទេស ដែលជាដៃគូរបស់ Ecobatt ហើយពួកគេមានសមត្ថភាពក្នុងការបំផ្លាញសំណល់នេះបាន»។
លោកថ្លែងថា អ្នកមានសំណល់ទាំងនោះ មួយចំនួនមិនព្រមសហការដើម្បីទុកឱ្យបានត្រឹមត្រូវនោះទេ ហើយថែមទាំងយកសំណល់ទាំងនោះ ទៅបោះចោលនៅទីតាំងផ្សេងៗ ខណៈអ្នកខ្លះទៀតយកសំណល់ ដែលមានសារធាតុគ្រោះថ្នាក់ទាំងអស់នោះលក់ទៅតាមអ្នកប្រមូលទិញនៅមូលដ្ឋានហៅថា អេតចាយ ដែលអេតចាយនោះដោះប្រមូលយកតែកន្លែងមានតម្លៃ ចំណែកសំណល់គ្រោះថ្នាក់ត្រូវបានបោះចោលពាសវាលពាសកាល ដូច្នេះត្រូវគិតជាធំទៅលើផលប៉ះពាល់បរិស្ថាន៕
