ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ឡាយព្រះហស្ថលេខានាពេលកន្លងទៅ។ រូបថត Royal du Cambodge
ច្បាប់ស្តីពីការបង្កើតរដ្ឋលេខាធិការដ្ឋានអាកាសចរណ៍ស៊ីវិល ត្រូវបានព្រះករុណាព្រះបាទសម្ដេចព្រះបរមនាថ នរោត្ដម សីហមុនី ចេញព្រះរាជក្រមប្រកាសឱ្យប្រើជាប្រញាប់ កាលពីថ្ងៃទី ២ ខែវិច្ឆកា ឆ្នាំ ២០២៣ ដែលរដ្ឋលេខាធិការដ្ឋាននេះ មានសមត្ថកិច្ចដឹកនាំ និងគ្រប់គ្រងគ្រប់វិស័យអាកាសចរណ៍ស៊ីវិលកម្ពុជា។
ព្រះមហាក្សត្រ ទ្រង់បានចេញព្រះរាជក្រមប្រកាសឱ្យប្រើជាប្រញាប់នេះ បន្ទាប់ពីស្ថាប័នរដ្ឋសភាបានអនុម័តកាលពីថ្ងៃទី ៩ ខែតុលា ឆ្នាំ ២០២៣ នាសម័យប្រជុំរដ្ឋសភាលើកទី១ នីតិកាលទី៧ ហើយព្រឹទ្ធសភាបាន ពិនិត្យចប់សព្វគ្រប់លើទម្រង់ និងគតិច្បាប់នេះទាំងស្រុងកាលពីថ្ងៃទី ១៧ ខែតុលា ឆ្នាំ ២០២៣ នាសម័យប្រជុំពេញអង្គលើកទី១១ នីតិកាលទី៤ ព្រមទាំងត្រូវបានក្រុមប្រឹក្សាធម្មនុញ្ញប្រកាសថាស្របនឹងរដ្ឋធម្មនុញ្ញ ក្នុងសេចក្តីសម្រេចលេខ ២២៧/០០៩/២០២៣ កបធ.ច ចុះថ្ងៃទី ២៤ ខែតុលា ឆ្នាំ ២០២៣។
នៅក្នុងព្រះរាជក្រមប្រកាសឱ្យប្រើបានបង្ហាញថា៖ «រដ្ឋលេខាធិការដ្ឋានអាកាសចរណ៍ស៊ីវិលត្រូវដឹកនាំ និងគ្រប់គ្រងដោយរដ្ឋមន្ត្រីមួយរូប អមដោយរដ្ឋលេខាធិការនិងអនុរដ្ឋលេខាធិការមួយចំនួន តាមការចាំបាច់។ រដ្ឋលេខាធិការនិងអនុរដ្ឋលេខាធិការបំពេញភារកិច្ចតាមការប្រគល់ពីរដ្ឋមន្ត្រីទទួលបន្ទុករដ្ឋលេខាធិការអាកាសចរណ៍ស៊ីវិល។ ក្នុងការអនុវត្តសមត្ថកិច្ចរបស់ខ្លួន រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិលទទួលខុសត្រូវចំពោះនាយករដ្ឋមន្ត្រីនិងចំពោះរដ្ឋសភា»។
លោក ស៊ីន ច័ន្ទសេរីវុត្ថា អ្នកនាំពាក្យអាកាសចរណ៍ស៊ីវិល បានប្រាប់ឱ្យដឹងនៅថ្ងៃទី ៤ ខែវិច្ឆកា ឆ្នាំ ២០២៣ នេះថា មិនមានអ្វីប្រែប្រួលសម្រាប់ភារកិច្ចការងាររបស់ថ្នាក់ដឹកនាំ និងមន្ត្រីនៃរដ្ឋលេខាធិការដ្ឋានអាកាសចរណ៍ស៊ីវិលនោះទេ អ្វីដែលប្រែប្រួលនោះគឺមានមួយប៉ុណ្ណោះ គឺកាលពីមុនអាកាសចរណ៍ស៊ីវិលត្រូវនៅក្រោមចំណុះរបស់ទីស្តីការគណៈរដ្ឋមន្ត្រី។
លោកបានបញ្ជាក់ថា៖ «កាលពីអតីតកាល គឺយើងស្ថិតនៅក្រោមចំណុះទីស្តីការគណៈរដ្ឋមន្ត្រី ដឹកនាំដោយរដ្ឋលេខាធិការមួយរូប ប៉ុន្តែពេលនេះគឺមានការផ្លាស់ប្តូរ ដោយយើងមិនស្ថិតនៅក្រោមចំណុះរបស់ទីស្តីការទៀតទេ គឺយើងស្ថិតនៅក្រោមរាជរដ្ឋាភិបាលដោយផ្ទាល់តែម្តង ដូចក្រសួងស្ថាប័នដទៃទៀតដែរ ដែលដឹកនាំដោយរដ្ឋមន្ត្រីមួយរូប»។
តាមច្បាប់ស្តីពីការបង្កើតរដ្ឋលេខាធិការដ្ឋានអាកាសចរណ៍ស៊ីវិលបានបញ្ជាក់ថា រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល មានសិទ្ធិចេញប្រកាស សេចក្តីសម្រេច សារាចរ និងសេចក្ដីណែនាំនានា ស្របតាមច្បាប់ស្តីពីការរៀបចំនិងការប្រព្រឹត្តទៅនៃគណៈរដ្ឋមន្ត្រី។
ស្ថាប័ននេះ ក៏មានកញ្ចប់ថវិការបស់ខ្លួនដែលផ្គត់ផ្គង់ដោយថវិកាជាតិ និងមានមន្ត្រីរាជការក្របខ័ណ្ឌនិងមន្ត្រីជាប់កិច្ចសន្យា ដើម្បីដំណើរការការងាររបស់ខ្លួន ដោយអនុលោមតាមច្បាប់និងលិខិតបទដ្ឋានគតិយុត្តជាធរមាន៕
