តំណាងរដ្ឋកាលីហ្វ័រនីញ៉ា លោកស្រី Fiona Ma និងលោកឧកញ៉ា ស្រី ចាន់ថន (កណ្ដាល)។ រូបថត ស្រី ចាន់ថន
ភ្នំពេញៈតំណាងរដ្ឋកាលីហ្វ័រនីញ៉ាលោកស្រី Fiona Ma បានសន្យាថា លោកស្រីនឹងជួយជ្រោមជ្រែងការងារគុនខ្មែរឱ្យអស់ពីលទ្ធភាព ដើម្បីផ្សព្វផ្សាយក្បាច់គុនអត្តសញ្ញាណជាតិរបស់កម្ពុជានេះ នៅសហរដ្ឋអាមេរិក។ នេះបើតាមអ្វីដែលប្រធានក្លិបប្រដាល់គុនខ្មែរអន្តរជាតិ (KKIF) លោកឧកញ៉ា ស្រី ចាន់ថន បានប្រកាសឱ្យដឹង កាលពីថ្ងៃទី ១១ ខែវិច្ឆិកា។
ការប្រកាសដំណឹងដ៏ល្អនេះ ដោយតែលោក ស្រី ចាន់ថន បានជួបពិភាក្សាដោយផ្ទាល់ជាមួយលោកស្រី Fiona Ma ក្នុងកម្មវិធី «ពិព័រណ៍ធុរកិច្ច និងពាណិជ្ជកម្មកម្ពុជា» លើកទី១ ប្រចាំឆ្នាំ ២០២៣ ដែលធ្វើនៅ The Holiday Inn នៅទីក្រុងឡុងប៊ិច រដ្ឋកាលីហ្វ័រនីញ៉ា កាលពីថ្ងៃទី៩ និងទី១០ ខែវិច្ឆិកា ហើយនៅក្នុងពិព័រណ៍នោះ លោក ចាន់ថន ក៏បាននាំយកកីឡាករ ឈឿង ល្វៃ និងគ្រូជំនួយរបស់ក្លិប KKIFលោក ស្រី រាជបុត្រ ទៅបង្ហាញក្បាច់គុនខ្មែរ ឱ្យអ្នកចូលរួមទាំងអស់ បានឃើញផងដែរ។
ជាលទ្ធផលនៃកិច្ចខិតខំប្រឹងប្រែងនេះ លោក ស្រី ចាន់ថន បានប្រាប់តាមរយៈការបង្ហោះសារនៅលើផេចហ្វេសប៊ុកផ្លូវការរបស់លោកថា៖ «ថ្ងៃនេះខ្ញុំពិតជាមានកិត្តិយសណាស់ ដែលលោកស្រី Fiona Ma តំណាងឱ្យរដ្ឋកាលីហ្វ័រនីញ៉ា ដែលមានតួនាទីជាហេរញ្ញិករដ្ឋកាលីហ្វ័រនីញ៉ាមួយនេះ បានផ្តល់ជូនលិខិតថ្លែងអំណរគុណ និងកោតសរសើរខ្ញុំបាទ ដែលបាននាំសិល្បៈគុនខ្មែរទៅផ្សព្វផ្សាយនៅសហរដ្ឋអាមេរិក»។
ប្រធានក្លិប Kun Khmer International Fight Gym (KKIF) លោក ចាន់ថន បានស្រង់សម្តីរបស់លោកស្រី Fiona Ma មកបញ្ជាក់ដូច្នេះថា៖ «គាត់បាននិយាយអរគុណដល់ខ្ញុំ ដែលបានភ្ជាប់ទំនាក់ទំនងរវាងមនុស្ស និងវប្បធម៌តាមរយៈសិល្បៈក្បាច់គុនបុរាណខ្មែរ ហើយលោកស្រីបានបញ្ជាក់បន្ថែមថា លោកស្រីនឹងជួយជ្រោមជ្រែងការងារគុនខ្មែរឱ្យអស់ពីលទ្ធភាព ដើម្បីផ្សព្វផ្សាយគុនខ្មែរ នៅសហរដ្ឋអាមេរិក»។
ជាមួយការគាំទ្ររបស់លោកស្រី Fiona Ma នេះ បានបើកផ្លូវមួយយ៉ាងសំខាន់សម្រាប់ «គុនខ្មែរ» ក្នុងការឈានទៅដល់ការរៀបចំឱ្យមានការប្រកួត នៅលើទឹកដីប្រទេសមហាអំណាចមួយនេះ ព្រោះសម្រាប់ការធ្វើដំណើរទៅអាមេរិកលើកនេះ លោក ស្រី ចាន់ថន ក៏មានបំណងទៅពិនិត្យមើលទីតាំង ដើម្បីធ្វើកម្មវិធីគុនខ្មែរនៅទីនោះ ក្នុងពេលឆាប់ៗផងដែរ។
បន្ថែមលើនេះ ក្លិប KKIFរបស់លោក ចាន់ថន ក៏បានចងសម្ព័ន្ធភាពជាមួយក្លិបប្រដាល់គុនខ្មែរប្រដាល់សេរីរបស់លោកគ្រូ អ៊ុំ រី ដែលមានមូលដ្ឋាននៅរដ្ឋកាលីហ្វ័រនីញ៉ារួចរាល់ហើយដែរ ហើយជាមួយការចងសម្ព័ន្តមេត្រីភាពគ្នានេះ លោក ចាន់ថន បានដាក់ក្តីរំពឹងថា នឹងនាំឱ្យគុនខ្មែរ ត្រូវបានគេទទួលស្គាល់យ៉ាងទូលំទូលាយមួយកម្រិតបន្ថែមទៀត នៅសហរដ្ឋអាមេរិក។
ជាមួយគ្នានេះ លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានបង្ហាញការគាំទ្រ និងកោតសរសើរដល់លោក ស្រី ចាន់ថន ដែលបានខិតខំនាំយក «គុនខ្មែរ» ទៅផ្សព្វផ្សាយ នៅអាមេរិក ក្នុងអំឡុងពេលដែលក្បាច់គុនជាកេរមរតករបស់ដូនតាខ្មែរនេះ ត្រូវបាននាំយកទៅរៀបចំឱ្យមានការប្រកួត នៅប្រទេសបារាំង និងអូស្ត្រាលីរួចមកហើយ ហើយកីឡាករប្រដាល់កម្ពុជាក៏បានចូលរួមប្រកួត ក្នុងព្រឹត្តិការណ៍ធំៗជាច្រើនទៀត នៅលើឆាកអន្តរជាតិផងដែរ។
លោក តែម ម៉ឺន បានប្រាប់ភ្នំពេញប៉ុស្តិ៍ កាលពីព្រឹកថ្ងៃទី១២ ខែវិច្ឆិកាថា៖ «ចំពោះការគាំទ្រពីប្រទេសក្រៅ ឬជនជាតិបរទេស ពិតជាសំខាន់ណាស់ យើងចង់បានណាស់ ឱ្យតែការគាំទ្រនោះ ស្របតាមគោលការណ៍សិល្ប:វប្បធម៌ក្បាច់គុនបុរាណខ្មែររបស់យើង ក៏ដូចជាគោលការណ៍ច្បាប់នៃប្រទេសនីមួយៗ ឱ្យស្របទៅនឹងរាជរដ្ឋាភិបាលរបស់យើង គឺយើងស្វាគមន៍ទាំងអស់»។
លោកបានបន្ថែមថា៖ «រាល់សកម្មភាពទាំងអស់នោះ សហព័ន្ធ ពិតជាចង់បាន និងចង់ឱ្យមានការគាំទ្រ ហើយក្នុងនាមជាប្រធានសហព័ន្ធ ខ្ញុំសូមអរគុណដល់លោកឧកញ៉ា ស្រី ចាន់ថន ដែលបាននាំយកក្បាច់គុនបុរាណខ្មែររបស់យើង ទៅបង្ហាញនៅអាមេរិក ដើម្បីឱ្យគេស្គាល់ និងមានមូលដ្ឋានក្នុងការជួយគាំទ្រយើង។ ទន្ទឹមនឹងនេះ ខ្ញុំក៏សូមអរគុណដល់លោកស្រី Fiona Ma ដែលបានគាំទ្រដល់គុនខ្មែរ ដែលធ្វើឱ្យយើងរឹតតែមានកម្លាំង ក្នុងការផ្សព្វផ្សាយរបស់យើងទៅកាន់ពិភពលោក»។
យ៉ាងណាក៏ដោយ ប្រធានសហព័ន្ធកីឡាប្រដាល់គុនខ្មែររូបនេះ សុំឱ្យមានការជួយឱ្យបានកាន់តែខ្លាំងថែមទៀត ពីគ្រប់ភាគីពាក់ព័ន្ធទាំងអស់ ដើម្បីធ្វើឱ្យ «គុនខ្មែរ» កាន់តែទទួលបានការគាំទ្រខ្លាំង តែរាល់ការងារទាំងអស់នោះ ត្រូវតែស្របទៅតាមគោលនយោបាយរបស់រាជរដ្ឋាភិបាល និងសិល្ប:វប្បធម៌ក្បាច់គុនបុរាណខ្មែរ ព្រមទាំងស្របទៅតាមគោលការណ៍របស់ស្ថាប័នពាក់ព័ន្ធដូចជា ក្រសួងអប់រំ យុវជន និងកីឡា, គណៈកម្មាធិការជាតិអូឡាំពិកកម្ពុជា និងក្រសួងវប្បធម៌ និងវិចិត្រសិល្បៈ។
លោក តែម ម៉ឺន បញ្ជាក់ថា៖ «យើងត្រូវនាំគ្នាការពារ អភិរក្ស និងអភិវឌ្ឍឱ្យបានកាន់តែល្អប្រសើរ ដើម្បីឱ្យស័ក្តិសមទៅនឹងតម្លៃនៃក្បាច់គុនរបស់ដូនតាយើង ដែលបានបន្សល់ទុកឱ្យ ហើយយើងត្រូវតែមានការបង្រួបបង្រួម និងប្រមូលកម្លាំងឱ្យបានច្រើន ដើម្បីជួយគ្នានូវគ្រប់មធ្យោបាយឱ្យស្របទៅតាមគោលនយោបាយរបស់រាជរដ្ឋាភិបាល និងសិល្ប:វប្បធម៌ក្បាច់គុនបុរាណខ្មែរ ព្រមទាំងស្របទៅតាមគោលការណ៍របស់ស្ថាប័នពាក់ព័ន្ធ ដើម្បីបញ្ជាក់ច្បាស់ថា យើងធ្វើនេះ ពិតជាត្រឹមត្រូវ ដើម្បីលើកកម្ពស់ពីគុណតម្លៃ និងធ្វើឱ្យមានការគាំទ្រកាន់តែខ្លាំងដល់គុនខ្មែររបស់យើង»៕
