ទិដ្ឋភាពនៃការបាញ់កាំជ្រួច អបអរសាទរខួបលើកទី៧០ នៃទំនាក់ទំនងការទូតកម្ពុជា-ជប៉ុន នាយប់ថ្ងៃទី ១៩ ខែវិច្ឆិកា ។ រូបថត រដ្ឋបាលរាជធានីភ្នំពេញ
ភ្នំពេញៈ រដ្ឋបាលរាជធានីភ្នំពេញ និងស្ថានទូតជប៉ុនប្រចាំកម្ពុជា បានប្រារព្ធកម្មវិធីបាញ់កាំជ្រួច អបអរសាទរខួបលើកទី៧០ នៃទំនាក់ទំនងការទូតកម្ពុជា-ជប៉ុន នាយប់ថ្ងៃទី ១៩ ខែវិច្ឆិកា ឆ្នាំ ២០២៣ នៅមុខព្រះបរមរាជវាំង ដែលរៀបចំដោយសមាគមជប៉ុន-កម្ពុជា។
កម្មវិធីបាញ់កាំជ្រួច អបអរសាទរខួបលើកទី៧០ នៃទំនាក់ទំនងការទូតកម្ពុជា-ជប៉ុននេះ មានការចូលរួមពីលោក ឃួង ស្រេង អភិបាលរាជធានីភ្នំពេញ, លោក អ៊ូអិណូ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា និងលោក តាកាហាស៊ី ហ្វូមីអាគី ប្រធានសមាគមជប៉ុន-កម្ពុជា និងជាអតីតឯកអគ្គរាជទូតជប៉ុនប្រចាំព្រះរាជាណាចក្រកម្ពុជា រួមនឹងមន្រ្តីជាច្រើនរូបទៀត។ នេះបើយោងតាមការប្រកាសរបស់រដ្ឋបាលរាជធានីភ្នំពេញ។
លោក ឃួង ស្រេង អភិបាលរាជធានីភ្នំពេញបានថ្លែងថា ព្រឹត្តិការណ៍នេះ ពិតជាបានចូលរួមចំណែកបន្ថែមទៀត ក្នុងការពង្រឹង និងពង្រីកកិច្ចសហប្រតិបត្តិការក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ «កម្ពុជា-ជប៉ុន» ឱ្យកាន់តែមានប្រសិទ្ធភាព និងប្រកបដោយផ្លែផ្កា។
សូមបញ្ជាក់ថា កម្ពុជា និងជប៉ុនបានភ្ជាប់ទំនាក់ទំនងការទូតជាមួយគ្នាចាប់តាំងពីថ្ងៃទី ៩ ខែមករា ឆ្នាំ ១៩៥៣។ ផ្តើមចេញពីទំនាក់ទំនងការទូតរយៈពេល ៧០ ឆ្នាំកន្លងទៅនេះ កិច្ចសហប្រតិបត្តិការទ្វេភាគីរវាងប្រទេសទាំង ២ និងទីក្រុងសម្ព័ន្ធមេត្រីកាន់តែមានភាពស៊ីជម្រៅ ស្អិតល្មួតលើគ្រប់វិស័យចាប់តាំងពីកម្រិតកិច្ចសហប្រតិបត្តិការទ្វេភាគី រហូតដំឡើងដល់កម្រិតទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ ក្នុងឆ្នាំ ២០២៣។
បើតាមលោក ឃួង ស្រេង សម្រាប់រាជធានីភ្នំពេញ រដ្ឋាភិបាលជប៉ុន បានផ្តល់នូវជំនួយអភិវឌ្ឍន៍ផ្លូវការលើគម្រោងសាងសង់ហេដ្ឋារចនាសម្ព័ន្ធរូបវន្តជាច្រើន ក្នុងនោះមានដូចជា គម្រោងការពារទឹកជំនន់ និងកែលម្អប្រព័ន្ធប្រឡាយ លូ ជំហានទី១ រហូតដល់ជំហានទី៤, គម្រោងសាងសង់ស្ថានីយប្រព្រឹត្តិកម្មទឹកកខ្វក់ជើងឯក, គម្រោងធ្វើឱ្យប្រសើរឡើងនូវសមត្ថភាពពន្លត់អគ្គិភ័យ តាមរយៈការផ្ដល់រថយន្តពន្លត់អគ្គិភ័យប្រើប្រាស់រួច, គម្រោងអភិវឌ្ឍន៍ប្រព័ន្ធគ្រប់គ្រងចរាចរណ៍, គម្រោងជំនួយក្នុងវិស័យអប់រំ និងវិស័យសុខាភិបាល ជាដើម។
លោក ឃួង ស្រេង មានប្រសាសន៍ថា ៖ «សម្រាប់ការរៀបចំកម្មវិធីបាញ់កាំជ្រួច អបអរសាទរខូបលើកទី៧០ នៃទំនាក់ទំនងការទូតកម្ពុជា-ជប៉ុននាឱកាសនេះ គឺមិនត្រឹមតែធ្វើឡើងដើម្បីអបអរសាទរខួបនេះប៉ុណ្ណោះទេ តែជាកាលានុវត្តភាពថ្មីមួយទៀត សម្រាប់ការស្វែងយល់ឱ្យបានកាន់តែស៊ីជម្រៅ និងដើម្បីឈានទៅពង្រឹងកិច្ចសហប្រតិបត្តិការ មិត្តភាព និងសាមគ្គីភាព សម្រាប់ជាគុណប្រយោជន៍នៃប្រជាជាតិយើងទាំង២ ក្នុងស្មារតីផ្តល់ការឧបត្ថម្ភគាំទ្រ និងការជួយគ្នាទៅវិញទៅមកលើគ្រប់វិស័យ»។
នាឱកាសនោះដែរ លោក អ៊ូអិណូ អាត់ស៊ូស៊ី ក៏បានថ្លែងថា ខួបលើកទី៧០ នៃទំនាក់ទំនងការទូតកម្ពុជា-ជប៉ុន ធ្វើឡើងដើម្បីរំឭកពីខួប មិនត្រឹមតែជាទំនាក់ទំនងរវាងរដ្ឋាភិបាល និងរដ្ឋាភិបាលប៉ុណ្ណោះទេ តែក៏ជាទំនាក់ទំនងរវាងក្រុមហ៊ុនឯកជន និងអង្គការនានារបស់ជប៉ុនឱ្យកាន់តែរឹងមាំថែមទៀត។
លោកមានប្រសាសន៍ថា៖ «ថ្ងៃនេះពិតជាបង្ហាញឱ្យឃើញកាន់តែច្បាស់ ពីភាពជាដៃគូយុទ្ធសាស្ត្រគ្រប់ជ្រុងជ្រោយ រវាងកម្ពុជា-ជប៉ុន សូមឱ្យទំនាក់ទំនងនេះកាន់តែរឹងមាំថែមទៀត»។
សូមរំឭកដែរថា កាលពីថ្ងៃទី១១ ខែវិច្ឆិកា កន្លងទៅ ឯកអគ្គរាជទូតជប៉ុនប្រចាំនៅកម្ពុជា ក៏បានចូលរួម «វេទិកាវិទ្យាសាស្ត្រអបអរសាទរខួបលើកទី៧០ នៃការបង្កើតទំនាក់ទំនងការទូតរវាងប្រទេសជប៉ុន និងកម្ពុជា»ផងដែរ ដែលរៀបចំឡើងដោយស្ថានទូតជប៉ុន និងរាជបណ្ឌិត្យសភាកម្ពុជា។
ក្នុងពិធីនោះ លោក អ៊ូអ៊ិណូ បានថ្លែងពីប្រវត្តិ៧០ឆ្នាំ នៃទំនាក់ទំនងការទូតជប៉ុន-កម្ពុជា ចាប់តាំងពីការបង្កើតទំនាក់ទំនងការទូត ស្ថានភាពបច្ចុប្បន្ន និងអនាគតនៃទំនាក់ទំនងទ្វេភាគីផងដែរ៕
