.jpg)
កម្លាំងយោធាកម្ពុជាអំឡុងពេលចេញដំណើរទៅចិន។ រូបថត FN
ភ្នំពេញៈ មេបញ្ជាការតំបន់ភូមិភាគខាងត្បូងនៃកងទ័ពរំដោះប្រជាជនចិន លោក វ៉ាង ស៊ីវពីន បានថ្លែងអំណរគុណដល់កម្ពុជាដែលបានបញ្ជូនកងកម្លាំងចូលរួមសមយុទ្ធពហុសាសន៍ពីបណ្តាប្រទេសអាស៊ាន ដែលបានរៀបចំដោយប្រទេសចិន ដែលធ្វើឱ្យទំនាក់ទំនងទ្វេភាគីកម្ពុជា-ចិន នឹងបន្តរឹងមាំ និងស៊ីជម្រៅ
ថែមទៀត។
ការថ្លែងអំណរគុណពីមេទ័ពចិននេះ ធ្វើឡើងតាមរយៈជំនួបសម្តែងការគួរសមរវាងលោក វ៉ាង ស៊ីវពីន និងភាគីកម្ពុជាលោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទ កាលពីរសៀលថ្ងៃទី ២០ ខែវិច្ឆិកា ឆ្នាំ ២០២៣ នាប្រទេសចិន បន្ទាប់ពីពិធីបិទសមយុទ្ធពហុសាសន៍ «សន្តិភាពមិត្តភាពឆ្នាំ ២០២៣»។ នេះបើយោងតាមខ្លឹមសារនៃជំនួបដែលបានប្រកាសតាមរយៈហ្វេសប៊ុកអគ្គបញ្ជាការដ្ឋាននៃកងយោធពលខេមរភូមិន្ទ។
អគ្គបញ្ជាការដ្ឋាននៃកងយោធពលខេមរភូមិន្ទបានលើកឡើងថា ក្នុងជំនួបនេះ លោក វង្ស ពិសេន ប្រាប់សមភាគីចិនថា ការចូលរួមពិធីបិទសមយុទ្ធពហុសាសន៍នេះ គឺដើម្បីជួយពង្រឹងទំនាក់ទំនងល្អជាប្រពៃណី និងប្រវត្តិសាស្ត្ររវាងកងទ័ពនៃប្រទេសទាំង ២ ជាពិសេសដើម្បីលើកទឹកចិត្តនិងគាំទ្រដល់កិច្ចខិតខំប្រឹងប្រែងរបស់កងកម្លាំងនៃបណ្តាប្រទេសនានាចូលរួមក្នុងសមយុទ្ធនេះឱ្យបានជោគជ័យ ដែលជាចំណែកគាំទ្រស្ថិរភាព និងសន្តិភាពតំបន់។
តាមរយៈប្រភពដដែលនោះដែរ លោក វ៉ាង ស៊ីវពីន ក៏បានថ្លែងអំណរគុណដល់សមភាគីកម្ពុជាដែលបានបញ្ជូនកងកម្លាំងនៃកងយោធពលខេមរភូមិន្ទមកចូលរួមសមយុទ្ធយោធាដែលរៀបចំដោយចិននេះ ដែលសបញ្ជាក់យ៉ាងច្បាស់ពីការគាំទ្ររបស់កម្ពុជាចំពោះកងទ័ពរំដោះប្រជាជនចិន និងសម្រាប់តំបន់ភូមិភាគខាងត្បូង។
មេបញ្ជាការចិនបានបន្ថែមថា៖ «កម្ពុជា និងចិន នឹងបន្តកិច្ចសហប្រតិបត្តិការឱ្យកាន់តែរឹងមាំ និងស៊ីជម្រៅបន្ថែមទៀត»។
កម្ពុជាបានបញ្ជូនកងកម្លាំងទៅចូលរួមសមយុទ្ធពហុសាសន៍ «សន្តិភាពមិត្តភាពឆ្នាំ ២០២៣» នាប្រទេសចិនរយៈពេល ១០ ថ្ងៃ គឺចាប់តាំងពីថ្ងៃទី ១៣ ដល់ថ្ងៃទី ២២ ខែវិច្ឆិកា នៅទីក្រុងស៊ាន់ជាំង ខេត្តក្វាងតុង ដែលមានការចូលរួមពីបណ្តាប្រទេសអាស៊ានមួយចំនួនផ្សេងទៀតរួមមាន ឡាវ ម៉ាឡេស៊ី ថៃ និងវៀតណាម ក្រោមប្រធានបទ «ប្រតិបត្តិការយោធាចម្រុះលើការប្រឆាំងភេរវកម្ម និងការថែ រក្សាសន្តិសុខលម្ហសមុទ្រ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ថ្លែងថា ការថ្លែងអរគុណពីមេដឹកនាំយោធាចិន និងការលើកឡើងជាវិជ្ជមានរបស់មេដឹកនាំយោធាកម្ពុជាក្នុងជំនួបនេះ បង្ហាញពីការប្តេជ្ញាចិត្តជាសុច្ឆន្ទៈរៀងៗខ្លួនក្នុងការពង្រឹងចំណងកិច្ចសហប្រតិបត្តិការផ្នែកការពារជាតិនិងសន្តិសុខរវាងប្រទេសទាំង ២។
លោកថ្លែងថា សម្រាប់សមយុទ្ធយោធាពហុសាសន៍នេះវិញ កម្ពុជាបានបង្ហាញគោលការណ៍ពហុភាគីនិយម ខណៈសមយុទ្ធនេះមិនមែនធ្វើឡើងតែពីចិននិងកម្ពុជាឡើយ ដោយមានការចូលរួមពីបណ្តាប្រទេសអាស៊ានមួយចំនួន ព្រមទាំងការគាំទ្រពីអង្គការសហប្រជាជាតិផង។
លោកបានថ្លែងថា៖ «ក្នុងបញ្ហាសន្តិសុខ និងការពារជាតិនេះ មានរឿងច្រើនដែលទាមទារក្របខ័ណ្ឌកិច្ចសហប្រតិបត្តិការពហុភាគីពីបណ្តាប្រទេសទាំងអស់ ទាំងក្នុងតំបន់ និងពិភពលោក។ កន្លងមកកម្ពុជានិងចិនបានចូលរួមក្នុងរង្វង់ឯកសារមួយចំនួនដែលធានាដល់សន្តិសុខតំបន់ និងពិភពលោកដែលជាកង្វល់រួម ទាំងសន្តិសុខប្រពៃណី និងមិនប្រពៃណី»។
លោកបានថ្លែងបន្ថែមថា សមយុទ្ធយោធាពហុសាសន៍ដែលរៀបចំដោយចិននេះ បានបង្ហាញពីការប្តេជ្ញាចិត្តរៀងៗខ្លួនរបស់បណ្តាប្រទេសដែលបានចូលរួម ក្នុងគោលដៅពង្រឹង កិច្ចសហប្រតិបត្តិការផ្នែកសន្តិសុខ ហើយសមយុទ្ធនេះក៏បានចែករំលែកបទពិសោធន៍ពីគ្នាទៅវិញទៅមក ព្រមទាំងជាចំណែកជំរុញចរន្តពហុភាគីនិយមផងដែរ៕
