មន្ត្រីអន្តរក្រសួងនៅក្នុងកិច្ចប្រជុំ ពិភាក្សាលើសេចក្តីព្រាងអនុក្រឹត្យស្តីពីការពង្រីកវិសាលភាព របបសន្តិសុខសង្គមកាលពីថ្ងៃទី១២ខែធ្នូ។ រូបថត បសស
ភ្នំពេញៈ បេឡាជាតិរបបសន្តិសុខសង្គម និងក្រសួងពាក់ព័ន្ធ នឹងដាក់សេចក្តីព្រាងអនុក្រឹត្យស្តីពីការពង្រីកវិសាលភាព របបសន្តិសុខសង្គមផ្នែកហានិភ័យការងារ និងផ្នែកថែទាំសុខភាពសម្រាប់បុគ្គលដែលស្ថិតនៅក្នុងវិស័យសាធារណៈ ជូនរាជរដ្ឋាភិបាល ពិនិត្យ ក្រោយពីបញ្ចប់ការពិនិត្យចុងក្រោយសម្រេចមាន ៥ជំពូក និង៩មាត្រា។
លោក ហេង សុផាន់ណារិទ្ធ អគ្គនាយករងបេឡាជាតិរបបសន្តិសុខសង្គម (ប.ស.ស) បានប្រាប់ឱ្យដឹងនៅថ្ងៃទី១៣ ខែធ្នូថា នៅក្នុងកិច្ចប្រជុំកាលពីថ្ងៃទី១២ ខែធ្នូ ក្រុមការងារកិច្ចការច្បាប់នៃ ប.ស.ស រួមទាំងក្រសួងស្ថាប័នពាក់ព័ន្ធ បានបញ្ចប់ការត្រួតពិនិត្យចុងក្រោយលើសេចក្ដីព្រាងអនុក្រឹត្យស្ដីពីការពង្រីកវិសាលភាព របបសន្តិសុខសង្គមផ្នែកហានិភ័យការងារ និងផ្នែកថែទាំសុខភាព សម្រាប់បុគ្គលដែលស្ថិតនៅក្នុងវិស័យសាធារណៈ។
ក្រោយពីបញ្ចប់ការត្រួតពិនិត្យ ប.ស.ស និងក្រសួងពាក់ព័ន្ធ នឹងធ្វើរបាយការណ៍ស្នើទៅកាន់ក្រសួងសេដ្ឋកិច្ច និងហិរញ្ញវត្ថុ ហើយនៅពេលក្រសួងនេះពិនិត្យឯកភាពរួចហើយ នឹងបន្តដាក់ជូនរាជរដ្ឋាភិបាល ក្នុងការត្រួតពិនិត្យលើសេចក្ដីព្រាងអនុក្រឹត្យ ដើម្បីសម្រេចដាក់ឱ្យអនុម័ត។
លោកហេង សុផាន់ណារិទ្ធ បានឱ្យដឹងទៀតថា តាមរយៈសេចក្តីព្រាងអនុក្រឹត្យមួយនេះ ជាការបំពេញបន្ថែមលើចំណុចខ្វះខាតដែលមានចែងនៅក្នុងច្បាប់ស្ដីពីរបបសន្ដិសុខសង្គម ដែលការពង្រីកវិសាលភាពនេះ មានសារៈសំខាន់ក្នុងការផ្ដល់នូវការគាំពាររបបសន្ដិសុខសង្គម និងអត្ថប្រយោជន៍ផ្សេងៗពី ប.ស.ស ដល់មន្រ្តីនយោបាយគ្រប់ជាន់ថ្នាក់ គ្រប់និន្នាការនយោបាយដោយគ្មានការរើសអើងឡើយ។
លោកថា ជាពិសេសនោះ គឺក្រុមប្រឹក្សារាជធានីខេត្ត ក្រុង ស្រុក ខណ្ឌ ឃុំ សង្កាត់ និងមន្រ្ដីភូមិ ដែលជាអ្នកផ្ដល់សេវាដោយផ្ទាល់ជូនដល់ប្រជាពលរដ្ឋ ខណៈដែលបច្ចុប្បន្ននេះ ក្រុមពួកគាត់ បានទទួលតែបណ្ណមូលនិធិសមធម៌នោះទេ។
លោកបានបញ្ជាក់ថា៖ «ដូច្នេះដើម្បីឱ្យមានតម្លាភាព យើងស្នើសុំពីរាជរដ្ឋាភិបាល ដើម្បីផ្ដល់បណ្ណប.ស.ស ជូនពួកគាត់។ នៅក្នុងសេចក្ដីព្រាងអនុក្រឹត្យនេះដែរ គឺយើងចង់ពង្រីកវិសាលភាពទៅដល់សមាជិករាជរដ្ឋាភិបាល មានថ្នាក់រដ្ឋលេខាធិការ អនុរដ្ឋលេខាធិការ ទីប្រឹក្សា ជំនួយការ ដែលមិនស្ថិតក្រោមច្បាប់ស្ដីពីសហលក្ខន្តិកៈមន្ត្រីរាជការស៊ីវិលនៃប្រទេសកម្ពុជាយើងទេ»។
លោក ឈត ប៊ុនថង មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍នៃរាជបណ្ឌិត្យសភាកម្ពុជា បានថ្លែងថា អ្វីដែល ប.ស.ស តាក់តែងរៀបចំឡើងនេះ វាជាការគិតគូរ និងយកចិត្តទុកដាក់បន្ថែមទៀតរបស់រាជរដ្ឋាភិបាលពីសុខុមាលភាព សុខភាព និងជីវភាពរបស់ប្រជាពលរដ្ឋ។ ជាពិសេសអ្នកដែលបំពេញការងាររាជការដែលបម្រើសេវាជូនប្រជាពលរដ្ឋ ខណៈដែលកន្លងមកមានតែកម្មករ វិស័យឯកជន និងមន្ត្រីរាជស៊ីវិលប៉ុណ្ណោះដែលមានបណ្ណ ប.ស.ស សម្រាប់ប្រើប្រាស់។
លោកបានប្រាប់ថា៖ «ខ្ញុំគិតថា បើពង្រីកវិសាលភាពទៅដល់ហ្នឹងទៀត គឺវាជាការល្អមែនទែន ពីព្រោះមានការយកចិត្តទុកដាក់ពីសំណាក់រាជរដ្ឋាភិបាល ទៅលើប្រជាពលរដ្ឋរបស់ខ្លួន ដែលមានគុណបំណាច់បម្រើជាតិ តាំងពីថ្នាក់ជាតិ រហូតដល់ថ្នាក់មូលដ្ឋាន។ រាជរដ្ឋាភិបាល ក៏គួរតែឆាប់អនុម័ត ដើម្បីផ្ដល់ក្ដីសង្ឃឹមថ្មីសម្រាប់មន្ត្រីការ ក៏ដូចជាមន្ត្រីសាធារណៈផ្សេងទៀតផងដែរ»៕
