.jpg)
កសិករកំពុងហាលគ្រាប់ស្វាយចន្ទី។ ហុង មិនា
ភ្នំពេញៈ ថ្នាក់ដឹកនាំសមាគមស្វាយចន្ទីកម្ពុជា បានឱ្យដឹងថា មានក្រុមហ៊ុនចិន ៦ បានមកពិភាក្សាជាមួយខ្លួនពីការបើករោងចក្រកែច្នៃគ្រាប់ស្វាយចន្ទីនៅកម្ពុជា ខណៈក្រុមហ៊ុន ១ ក្នុងចំណោមនោះ គឺជាក្រុមហ៊ុនកៀបយកប្រេងពីសម្បកស្វាយចន្ទី។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានប្រាប់ឱ្យដឹងនៅថ្ងៃទី ១ ខែមករា ឆ្នាំ ២០២៤ ថា នៅក្នុងពិធីបញ្ចុះបឋមសិលាសាងសង់រោងចក្រកែច្នៃគ្រាប់ស្វាយចន្ទីរបស់វិនិយោគិនសិង្ហបុរី កាលពេលកន្លងមក លោកបានអញ្ជើញវិនិយោគិនចិនមកចូលរួមក្នុងកម្មវិធីនេះ ហើយវិនិយោគិនទាំងនោះបានបង្ហាញបំណងក្នុងការបើករោងចក្រកែច្នៃគ្រាប់ស្វាយចន្ទីជាពិសេសរោងចក្រកៀបយកប្រេងពីសម្បកស្វាយចន្ទី។
លោកបន្ថែមថា ថ្នាក់ដឹកនាំក្រុមហ៊ុនចិនបានចាប់អារម្មណ៍ខ្លាំងចំពោះបរិមាណស្វាយចន្ទីដែលកម្ពុជាមានច្រើន ដោយសារតែក្រុមហ៊ុនមានតម្រូវការសម្បកស្វាយចន្ទីសម្រាប់កៀបយកប្រេងដើម្បីនាំទៅលក់នៅបណ្តាប្រទេសដែលគិតគូរដល់បរិស្ថាន ដូចជាតំបន់អឺរ៉ុប ជប៉ុន និងកូរ៉េខាងត្បូង ជាដើម។
លោក ស៊ីឡុត បានបញ្ជាក់ថា៖«វាជាសញ្ញាវិជ្ជមានសម្រាប់កម្ពុជា ដោយខ្ញុំសង្ឃឹមថា ខាងក្រុមហ៊ុនគាត់នឹងបន្តទាក់ទងជាមួយយើងបន្តទៀត ព្រោះបើគាត់ចង់បើករោងចក្រ គឺយើងមានដីសម្រាប់ឱ្យពួកគាត់គ្រប់គ្រាន់ក្នុងការវិនិយោគ»។
លោកបញ្ជាក់ថា៖«សមាគមស្វាយចន្ទីសូមស្វាគមន៍ ដោយយើងក៏មានការលើកទឹកចិត្តពីរាជរដ្ឋាភិបាល និង CDC ក៏ដូចជាអាជ្ញាធរខេត្ត ដែលតែងយកចិត្តទុកដាក់ក្នុងការវិនិយោគផ្នែកកសិ-ឧស្សាហកម្ម។ ខ្ញុំជឿថា ក្រុមហ៊ុនទាំងអស់នោះនឹងសម្រេចចិត្តជាវិជ្ជមាននៅក្នុងឆ្នាំ ២០២៤-២០២៥ នេះ»។
លោកបន្ថែមថា ក្រុមហ៊ុនចិនដែលបានជួបជាមួយតំណាងសមាគមទាំងអស់ គឺមានរោងចក្រនៅវៀតណាមរួចហើយ ដោយពួកគាត់ចង់ពង្រីកមកកម្ពុជាបន្ថែម ពីព្រោះក្រុមហ៊ុនមើលឃើញកម្ពុជាមានសក្តានុពលដែលអាចផលិតគ្រាប់ឆៅបានច្រើនក្នុង ១ ឆ្នាំៗ។
លោកអះអាងថា៖«រោងចក្ររបស់ក្រុមហ៊ុនចិនទាំង ៦ នោះមានជាប្រភេទរោងចក្រកែច្នៃគ្រាប់ស្វាយចន្ទី, រោងចក្រកៀបសម្បកគ្រាប់ស្វាយចន្ទីយកប្រេង និងរោងចក្រប្រើសំណល់ចុងក្រោយរបស់ស្វាយចន្ទី (រោងចក្រប្រើសំណល់ចុងក្រោយនេះ គេអាចផលិតទៅជាធ្យូងឧស្សាហកម្ម ព្រោះមានចំហេះខ្ពស់ និងធ្វើជាជីផងដែរ)»។យោងតាមប្រធានសមាគមស្វាយចន្ទីកម្ពុជា សម្បកគ្រាប់ស្វាយចន្ទី អាចផលិតបានជាជីវឥន្ធនៈ ដែលគេប្រើប្រាស់ជំនួសប្រេងម៉ាស៊ូតបាន។
លោក អួន ស៊ីឡុត បានកត់សម្គាល់ឃើញទៀតថា បច្ចុប្បន្ន MirathAgri Tech Co.,Ltd. ដែលជាក្រុមហ៊ុនជប៉ុន បានចាប់ផ្តើមពង្រីកដំណើរការពង្រីករោងចក្រនៅក្នុងខេត្តកំពង់ធំ និងខេត្តព្រះវិហារ ដើម្បីកែច្នៃគ្រាប់ស្វាយចន្ទី និងចម្រាញ់ជីវឥន្ធនៈពីសម្បកផ្លែស្វាយចន្ទី ដែលនេះជាការចូលរួមដំណើរឆ្ពោះទៅកាន់ប្រទេសអធិរាជស្វាយចន្ទី របស់កម្ពុជា។
ម្ចាស់សិប្បកម្មកែច្នៃគ្រាប់ស្វាយចន្ទីជ័យសម្បូរ លោកស្រី អ៊ិន ឡៃហួត បានប្រាប់ថា វាគឺជាដំណឹងល្អសម្រាប់កសិករបើមានវិនិយោគិនបរទេសមកបើករោងចក្រនៅកម្ពុជាកាន់តែច្រើន ព្រោះរោងចក្រកែច្នៃកាន់តែច្រើន ការនាំចេញគ្រាប់ឆៅទៅប្រទេសជិតខាងក៏អាចកាត់បន្ថយមួយចំណែក ដែលនឹងជួយឱ្យកម្ពុជាទទួលបានតម្លៃបន្ថែមច្រើនជាងមុន។
លោកស្រីបញ្ជាក់ថា៖«កាលពីមុនខាងសិប្បកម្មបានលក់សម្បកគ្រាប់ស្វាយចន្ទីឱ្យខាងវៀតណាម តែមួយរយៈក្រោយនេះសម្បកលក់បានថោកពេក យើងក៏សម្រេចថាមិនលក់ និងទុកលក់ក្នុងស្រុកយើងវិញ។ យើងបានពិភាក្សាជាមួយដៃគូយើងដែលជាក្រុមហ៊ុនជប៉ុនដែរលើកិច្ចការកែច្នៃសម្បកគ្រាប់ស្វាយចន្ទីនេះ ដោយមិនរំពឹងទីផ្សារវៀតណាមទៀតទេ»។
របាយការណ៍សមាគមស្វាយចន្ទីកម្ពុជា បង្ហាញថា នៅក្នុងរយៈពេល ១១ ខែ ឆ្នាំ ២០២៣ កម្ពុជាផលិតគ្រាប់ស្វាយចន្ទីឆៅបានចំនួន ៦,៥ សែនតោនក្នុងនោះនាំចេញទៅវៀតណាម ៦,១ សែន ស្មើទឹកប្រាក់ ៨៣៤ លានដុល្លារ ថយចុះ ១៦,៩ ភាគរយធៀបរយៈកាលដូចគ្នាឆ្នាំ ២០២២។ នៅក្នុងខែវិច្ឆិកាឆ្នាំ ២០២៣ គ្រាប់ស្វាយចន្ទីស្ងួត មានតម្លៃពី ៧ ០០០ រៀល ទៅ ៧ ៧០០ រៀល ក្នុង ១ គីឡូក្រាម ឬប្រហែល ១ ៩០០ ដុល្លារក្នុង ១ តោន៕
