.jpg)
លោក សួន សុផល (ទី២ រាប់ពីស្តាំ)ជួបពិភាក្សាជាមួយតំណាងក្រុមហ៊ុន CamkoInfracore កាលពីរសៀលថ្ងៃទី៩ ខែមករា ។ រូបថត CDC
ភ្នំពេញៈ ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានឱ្យដឹងថា វិនិយោគិនកូរ៉េបង្ហាញចំណាប់អារម្មណ៍យ៉ាងក្រៃលែងក្នុងការពង្រីកសកម្មភាពវិនិយោគលើវិស័យយានយន្ត ខណៈ CDC ចង់ឱ្យវិនិយោគិនកូរ៉េ គិតគូរពីការរៀបចំជាបណ្តុំកម្រងឧស្សាហកម្ម (Industrial Cluster Complex) ដែលនឹងបម្រើសេចក្តីត្រូវការរបស់សហគ្រាសដែលមានសែស្រឡាយពាក់ព័ន្ធ។
នេះបើយោងតាមខ្លឹមសារនៃជំនួបរវាងលោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា (គ.វ.ក.) ជាមួយតំណាងក្រុមហ៊ុន CamkoInfracore កាលពីរសៀលថ្ងៃទី៩ ខែមករា ឆ្នាំ២០២៤ ក្នុងគោលបំណងបង្កើនការឈ្វេងយល់អំពីការលើកទឹកចិត្តលើគម្រោងពង្រីកសកម្មភាពវិនិយោគលើវិស័យយានយន្ត។
តាមរយៈ CDC លោក សួន សុផល បានលើកឡើងថា កម្ពុជាពិតជាអរគុណសមភាគីកូរ៉េ ដែលមានចំណាប់អារម្មណ៍ក្នុងការបន្តពង្រីកខ្សែច្រវាក់ផលិតកម្មនៅកម្ពុជាក្រោយទទួលបានជោគជ័យប្រកបដោយផ្លែផ្កាពីគម្រោងវិនិយោគរបស់ខ្លួនកាលពីពេលកន្លងទៅ។
លោកក៏បានលើកឡើងផងដែរពីវត្តមាននៃតុកូរ៉េ (Korea Desk) ដែលជាយន្តការជួរមុខសម្រាប់ប្រចាំការផ្តល់កិច្ចសម្របសម្រួល និងផ្តល់សេវាវិនិយោគឯកជនប្រកបដោយទំនុកចិត្ត និងវិជ្ជាជីវៈជូនវិនិយោគិនកូរ៉េ។
លោក សួន សុផល បានបញ្ជាក់ថា៖«កម្ពុជាមានកញ្ចប់លើកទឹកចិត្តសម្រាប់គម្រោងវិនិយោគនិងគម្រោងនៃការពង្រីកការវិនិយោគដែលមានលក្ខណសម្បត្តិគ្រប់គ្រាន់ ជ្រកក្រោមរបបវិនិយោគនៃកម្ពុជា ដោយផ្តោតសំខាន់លើការលើកទឹកចិត្តមូលដ្ឋានការលើកទឹកចិត្តបន្ថែម និងការលើកទឹកចិត្តពិសេស»។
លោកក៏បានបំផុសគំនិតផ្តួចផ្តើមជូនតំណាងក្រុមហ៊ុនដើម្បីពិនិត្យលទ្ធភាពរៀបចំតំបន់សេដ្ឋកិច្ចពិសេសកម្ពុជា-កូរ៉េ ក្នុងគោលបំណងប្រែក្លាយទីតាំងនោះទៅជាបណ្តុំកម្រងឧស្សាហកម្ម (Industrial Cluster Complex) ដែលនឹងបម្រើសេចក្តីត្រូវការរបស់សហគ្រាសដែលមានសែស្រឡាយពាក់ព័ន្ធផងដែរ។
លោក តាន់ មុនីវណ្ណ ប្រធានសហព័ន្ធឧស្សាហកម្មយានយន្តកម្ពុជា (Cambodia Automotive Industry Federation) បានប្រាប់ឱ្យដឹងនៅថ្ងៃទី១០ ខែមករាថា កូរ៉េ ជាប្រទេសដែលមានឧស្សាហកម្មយានយន្តលូតលាស់ខ្លាំងដែរ ក្នុងចំណោមបណ្តាប្រទេសផលិតយានយន្តផ្សេងទៀត នៅលើពិភពលោក ដោយប្រទេសនេះបានផលិតនូវប្រភេទរថយន្ត គ្រឿងចក្រទំនើប ទូរស័ព្ទ និងឧបករណ៍អេឡិចត្រូនិកសម្រាប់ប្រើប្រាស់។
នៅក្នុងកិច្ចប្រជុំពិភាក្សាកន្លងមក ខាងសហព័ន្ធ ក៏បានស្នើដល់រាជដ្ឋាភិបាល ផ្តល់ការលើកទឹកចិត្តដល់អ្នកផលិតយានយន្តនៅក្នុងស្រុកលើផ្នែកសារពើពន្ធ ទាំងវិនិយោគិនក្នុងស្រុក និងក្រៅស្រុក ដើម្បីទាក់ទាញគេឱ្យមកវិនិយោគលើវិស័យយានយន្តនៅកម្ពុជា។
លោកតាន់ មុនីវណ្ណ បានបញ្ជាក់ថា៖«សម្រាប់កម្ពុជា វិស័យយានយន្តជាវិស័យមួយដែលរកចំណូលឱ្យរដ្ឋបានច្រើនណាស់ ហើយបើសិនជាអនុគ្រោះពន្ធខ្លាំងពេកធ្វើឱ្យប៉ះពាល់ដល់ចំណូលរដ្ឋ។ ដូច្នេះនៅពេលដែលប្រទេសខ្លាំងៗដូចជាកូរ៉េ គេមកចង់ វិនិយោគនៅស្រុកយើង លើវិស័យយានយន្តនេះ ខ្ញុំយល់ថា ជារឿងល្អបំផុតហើយ»។
ចំណែកលោក ហុង វណ្ណៈ អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជាវិញ យល់ឃើញថា បំណងនៃការវិនិយោគរបស់វិនិយោគិនបរទេស ដូចជាកូរ៉េជាដើម គឺជាដំណឹងល្អហើយ តែយើងក៏ត្រូវគិតគូរពីធនធានមនុស្សរបស់កម្ពុជាដែរ ថាតើមានផ្តល់ឱ្យគេគ្រប់គ្រាន់ឬអត់?
លោកបញ្ជាក់ដូច្នេះថា៖«កម្លាំងពលកម្មជំនាញនេះ គឺជារឿងសំខាន់ណាស់ ជួនកាលគេអាចនឹងមានការស្ទាក់ស្ទើរដោយសារបញ្ហាកង្វះកម្លាំងពលកម្មជំនាញនេះក៏ថាបាន។ ដូច្នេះហើយ ទើបបានជាខ្ញុំកោតសរសើរចំពោះគោលនយោបាយបណ្តុះបណ្តាលជំនាញវិជ្ជាជីវៈបច្ចេកទេស ១,៥លាននាក់ របស់រាជរដ្ឋាភិបាល ដោយខ្ញុំរំពឹងថា នាពេលអនាគតដ៏ខ្លីខាងមុខ យើងបណ្តុះបានធនធានមនុស្ស ដែលមានជំនាញច្បាស់លាស់ គ្រប់គ្រាន់ សម្រាប់បម្រើសេចក្តីត្រូវការក្នុងវិស័យឧស្សាហកម្មយានយន្តនេះ»។
របាយការណ៍ពីធនាគារជាតិនៃកម្ពុជា ស្តីពីស្ថានភាពវិនិយោគផ្ទាល់បរទេសនៅកម្ពុជា បានបង្ហាញថា គិតត្រឹមឆមាសទី១ ក្នុងឆ្នាំ២០២៣ សាធារណរដ្ឋកូរ៉េខាងត្បូង ជាប្រទេសដែលបានវិនិយោគនៅកម្ពុជាច្រើនជាងគេលំដាប់ទី២ ដែលមានទុនវិនិយោគប្រមាណ២២,៤ទ្រីលានរៀល បន្ទាប់ពីសាធារណរដ្ឋប្រជាមានិតចិន។ វិស័យសំខាន់ៗដែលវិនិយោគិនកូរ៉េបានបោះទុនវិនិយោគរួមមាន វិស័យហិរញ្ញវត្ថុ អចលនទ្រព្យ កម្មន្តសាល កសិកម្ម សណ្ឋាគារនិងភោជនីយដ្ឋាន វារីអគ្គិសនី និងសំណង់៕
