រាជរដ្ឋាភិបាល ដំឡើងប្រាក់កម្រៃប្រចាំខែជូនមន្ត្រីជាប់កិច្ចសន្យាចាប់ពី ៧១ ម៉ឺនដល់ ៧៧ ម៉ឺនរៀល។ ក្រសួងមុខងារសាធារណៈ
រាជរដ្ឋាភិបាលកម្ពុជា បានចេញអនុក្រឹត្យដំឡើងប្រាក់កម្រៃប្រចាំខែជូនមន្ត្រីជាប់កិច្ចសន្យាពីចំនួន ៧១ ម៉ឺនរៀល ទៅ ៧៧ ម៉ឺនរៀល ដែលនឹងត្រូវអនុវត្តជាផ្លូវការចាប់ពីថ្ងៃទី១ ខែមករា ឆ្នាំ២០២៤ តទៅ។
យោងតាមអនុក្រឹត្យចុះហត្ថលេខាដោយលោកនាយករដ្ឋមន្រ្តី ហ៊ុន ម៉ាណែត ចុះថ្ងៃទី៤ ខែមករា ឆ្នាំ ២០២៤ បានឱ្យដឹងថា ការដំឡើងប្រាក់កម្រៃនេះ ត្រូវអនុវត្តចំពោះមន្ត្រីជាប់កិច្ចសន្យា ដែលបម្រើការងារនៅតាមក្រសួង ស្ថាប័នថ្នាក់ជាតិនិងថ្នាក់ក្រោមជាតិ អនុលោមតាមបទប្បញ្ញត្តិនៃអនុក្រឹត្យ លេខ២៦ អនក្រ.បក ចុះថ្ងៃទី១០ ខែកុម្ភៈ ឆ្នាំ២០១៦ ស្តីពីការគ្រប់គ្រង និងការប្រើប្រាស់មន្ត្រីជាប់កិច្ចសន្យា។
ការសម្រេចដំឡើងប្រាក់កម្រៃប្រចាំខែនេះ ដោយយោងតាមសំណើរបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន និងរដ្ឋមន្ត្រីក្រសួងមុខងារសាធារណៈលោក ហ៊ុន ម៉ានី។
រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ រដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងការពារជាតិ រដ្ឋមន្ត្រីក្រសួងមុខងារសាធារណៈ រដ្ឋមន្ត្រីគ្រប់ក្រសួង និងប្រធានគ្រប់ស្ថាប័ន ដែលពាក់ព័ន្ធ ត្រូវទទួលបន្ទុកអនុវត្តអនុក្រឹត្យនេះតាមភារកិច្ចរៀងៗខ្លួន ចាប់ពីថ្ងៃចុះហត្ថលេខា
តទៅ។
គួរជម្រាបថា កាលពីថ្ងៃទី២៣ខែធ្នូ ឆ្នាំ ២០២៣ រាជរដ្ឋាភិបាលកម្ពុជា បានចេញអនុក្រឹត្យដំឡើងរបបឧបត្ថម្ភប្រចាំខែសម្រាប់អ្នកនៅក្នុងបន្ទុករបស់សពមន្ត្រីរាជការស៊ីវិល សពអតីតមន្ត្រីរាជការស៊ីវិល និងសពអតីតយុទ្ធជន ដែលនឹងត្រូវអនុវត្តចាប់ពីថ្ងៃទី១ ខែមករា ឆ្នាំ២០២៤ តទៅ។
យោងអនុក្រឹត្យដដែលនេះ របបឧបត្ថម្ភប្រចាំខែសម្រាប់កូននៅក្នុងបន្ទុករបស់សពមន្ត្រីរាជការស៊ីវិល សពអតីតមន្ត្រីរាជការស៊ីវិល និងសពអតីតយុទ្ធជនត្រូវបានដំឡើងចាប់ពី ១០ ០០០ រៀល ទៅ ៣០ ០០០ រៀល ក្នុងកូនម្នាក់។ ប្រពន្ធ ឬប្ដីនៅក្នុងបន្ទុករបស់សពអតីតមន្ត្រីរាជការស៊ីវិល និងសពអតីតយុទ្ធជន ពី ១៥០០០ រៀល ទៅ ៣០ ០០០ រៀល។ ឪពុក ម្តាយ ឬអាណាព្យាបាលនៅក្នុងបន្ទុករបស់សពអតីតយុទ្ធជន ពី ៨ ០០០រៀល ទៅ ៣០ ០០០រៀល។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា យល់ឃើញថា ការដំឡើងរបបឧបត្ថម្ភប្រចាំខែសម្រាប់អ្នកនៅក្នុងបន្ទុកនេះ គឺជាតម្រូវការជាក់ស្តែង និងការវិវឌ្ឍន៍សង្គម និងជាការគិតគូររបស់រាជរដ្ឋាភិបាលអាណត្តិថ្មី ទៅដល់ពលរដ្ឋដែលជាសាច់ញាតិរបស់អតីតមន្ត្រីរាជការកងកម្លាំងប្រដាប់អាវុធដែលបានមរណកាល។
លោកថ្លែងថា៖ « រាជរដ្ឋាភិបាលបានយកចិត្តទុកដាក់ពួកគាត់ ដោយមិនអាចទុកចោលនូវសាច់ញាតិមន្ត្រីរាជការ ឬ អតីតមន្ត្រីរាជការ ឬកងកម្លាំងប្រដាប់អាវុធទាំងឡាយណាដែលបានមរណកាលនោះទេ។ នេះគឺជាការងារសង្គមកិច្ច ដែលសបញ្ជាក់ពីការយកចិត្តទុកដាក់របស់រាជរដ្ឋាភិបាលនីតិកាលទី៧នេះ»៕
