សេចក្តីប្រកាសរបស់មន្ទីរទេសចរណ៍ខេត្តបាត់ដំបង ។ រូបថត មន្ទីរទេសចរណ៍ខេត្តបាត់ដំបង
បាត់ដំបងៈ មន្ទីរទេសចរណ៍ខេត្តបាត់ដំបង បានចាប់ផ្ដើមរៀបចំឱ្យអ្នកបើកបរម៉ូតូកង់បីដឹកភ្ញៀវទេសចរ ត្រូវមានលិខិតអនុញ្ញាតប្រកបអាជីវកម្មដឹកភ្ញៀវ និងមានឯកសណ្ឋានសម្គាល់ច្បាស់លាស់សមជាអ្នកបើកបរ ក្នុងគោលបំណងផ្ដល់ទំនុកចិត្ត និងធានាសុវត្ថិភាពជូនភ្ញៀវទេសចរ។
លោក អ៊ុច អ៊ុភីនីសារ៉ា ប្រធានមន្ទីរទេសចរណ៍ខេត្តបាត់ដំបង បានប្រាប់ឱ្យដឹងនៅថ្ងៃទី ១២ ខែមីនាថា កន្លងមកលោកឃើញអ្នកប្រកបអាជីវកម្មដឹកភ្ញៀវទេសចរ នៅពេលមានគ្រោះថ្នាក់ គឺមិនមានអត្តសញ្ញាណច្បាស់លាស់នោះទេ ខណៈច្បាប់ស្ដីពីទេសចរណ៍ មាត្ រ៦១ កំណត់ថា «គ្មានមូលដ្ឋានអាជីវកម្មណាដែលប្រកបដោយគ្មានអាជ្ញាប័ណ្ណនោះទេ»។
លោកបានបន្តថា ដោយសារតែជីវភាពរបស់ប្រជាពលរដ្ឋ កន្លងមកនេះ មន្ទីរទេសចរណ៍មិនសូវម៉ឺងម៉ាត់ខ្លាំងទៅលើអ្នកប្រកបអាជីវកម្មដឹកជញ្ជូនភ្ញៀវទេសចរទេ ប៉ុន្តែទោះបីយ៉ាងណាសេវាដឹកជញ្ជូនភ្ញៀវនេះ សំខាន់ណាស់ ព្រោះនៅខេត្តបាត់ដំបង មានភ្ញៀវទេសចរចូលមកទស្សនាច្រើន និងមានតម្រូវការប្រើប្រាស់សេវាដឹកជញ្ជូន ដើម្បីអាចទៅទស្សនានៅតំបន់រមណីយដ្ឋាននានា។
ដោយសារសេវាដឹកជញ្ជូនសំខាន់ ជាហេតុធ្វើឱ្យមន្ទីរទេសចរណ៍ និងរដ្ឋបាលខេត្តបាត់ដំបង ចាប់ផ្ដើមរៀបចំស្នើឱ្យអ្នកបើកបរម៉ូតូកង់ ៣ ដែលប្រកបអាជីវកម្មដឹកភ្ញៀវទេសចរ ត្រូវមានលិខិតអនុញ្ញាត និងមានឯកសណ្ឋានសម្គាល់ដែលទទួលស្គាល់ដោយមន្ទីរទេសចរណ៍ឱ្យត្រឹមត្រូវ ដើម្បីជាការធានាសុវត្ថិភាពជូនភ្ញៀវទេសចរដែលមកទស្សនាខេត្តបាត់ដំបង។
លោក អ៊ុច អ៊ុភីនីសារ៉ា បានបញ្ជាក់ថា ៖ «អ្នកបើកបរម៉ូតូកង់បី ត្រូវមកសុំលិខិតអនុញ្ញាត និងឯកសណ្ឋាននៅមន្ទីរទេសចរណ៍ខេត្តបាត់ដំបង ចាប់ពីថ្ងៃជូនដំណឹងនេះរហូតដល់ដើមខែមេសា ឆ្នាំ ២០២៤ ខាងមុខ»។
លោកបានបញ្ជាក់ថា៖ «ក្នុងករណីដែលម្ចាស់កង់បីប្រកបអាជីវកម្មដឹកភ្ញៀវទេសចរ ដែលមិនមានលិខិតអនុញ្ញាត និងមិនមានឯកសណ្ឋានសម្គាល់ត្រឹមត្រូវ គឺមិនអនុញ្ញាតឱ្យប្រកបអាជីវកម្មដឹកភ្ញៀវទេសចរឡើយ ព្រមទាំងអាចនឹងត្រូវរងការផាកពិន័យផ្សេងៗតាមច្បាប់ផងដែរ ព្រោះសុវត្ថិភាពភ្ញៀវទេសចរជាគោលការណ៍ចម្បងរបស់យើង»។
បើតាមលោក អ៊ុច អ៊ុភីនីសារ៉ា ការរៀបចំឯកសណ្ឋានដល់អ្នកបើកបរម៉ូតូកង់បីនេះ ក៏ជាការរួមចំណែកជួយទាក់ទាញភ្ញៀវទេសចរមកប្រើប្រាស់សេវាដឹកជញ្ជូនរបស់ពួកគាត់ តាមរយៈការមានអត្តសញ្ញាណត្រឹមត្រូវ មានក្រមសីលធម៌ក្នុងការបើកបរ ជាពិសេសពេលមានបញ្ហាអ្វីមួយ ភ្ញៀវទេសចរអាចទាក់ទងមកកាន់អាជ្ញាធរបានលឿន។
លោកបានប្រាប់ថា៖ «ការងារសុវត្ថិភាពទេសចរ និងការងារទាក់ទងនឹងការធ្វើដំណើររបស់ភ្ញៀវ វាជាភាពចាំបាច់របស់យើង ដែលត្រូវទទួលខុសត្រូវក្នុងនាមជាមន្ទីរទេសចរណ៍។ ទៅថ្ងៃអនាគត យើងនឹងរួបរួមអ្នកដែលរកស៊ីក្នុងវិស័យនេះឱ្យជួយលើកកម្ពស់គ្នាទៅវិញទៅមក ព្រោះវិស័យនេះបើសិនមានផ្នែកណាមួយមិនល្អហើយ វានឹងប៉ះពាល់ដល់បណ្ដុំផ្នែកទាំងមូល»។
ជុំវិញរឿងនេះ លោក ម៉ម រិទ្ធី ប្រធានសហព័ន្ធសហជីពវិស័យទេសចរណ៍ និងសេវាកម្មកម្ពុជា យល់ឃើញថា ការរៀបចំបែបនេះរបស់អាជ្ញាធរខេត្ត គឺជារឿងល្អ ព្រោះវាបានរួមចំណែកជួយឱ្យមានសណ្ដាប់ធ្នាប់ និងមានអត្តសញ្ញាណសម្គាល់ច្បាស់លាស់សម្រាប់អ្នកដែលប្រកបរបរដឹកជញ្ជូនភ្ញៀវទេសចរ ជាពិសេសបានជួយរក្សាសន្តិសុខសម្រាប់ភ្ញៀវនៅពេលដែលមានបញ្ហា។
លោកថ្លែងថា៖ «ខ្ញុំគិតថា ការរៀបចំបែបនេះ វាអត់ខុសទេ ដើម្បីសណ្ដាប់ធ្នាប់ ក៏ប៉ុន្តែជាទូទៅខ្ញុំកត់សម្គាល់ឃើញថា ការរៀបចំហ្នឹង ច្រើនតែតម្រូវឱ្យគាត់បង់ប្រាក់ទៅលើការរៀបចំទាំងអស់នោះ។ ដូច្នេះកន្លែងហ្នឹងយើងគួរតែពិចារណារកវិធីណាមួយដើម្បីកុំឱ្យប៉ះពាល់ជីវភាពរបស់ពួកគាត់»៕
.jpg)
