ភ្ញៀវទេសចរទៅទស្សនាប្រាសាទអង្គរវត្តកាលពីខែមករាឆ្នាំ២០២៤។ ហេង ជីវ័ន
សៀមរាបៈ លោកនាយករដ្ឋមន្រ្តី ហ៊ុន ម៉ាណែត បានថ្លែងថា វិស័យទេសចរណ៍នឹងនៅតែជាវិស័យចន្ទល់សេដ្ឋកិច្ចមួយដ៏សំខាន់ ក្នុងការបង្កើតឱកាសការងារ មុខរបរ ប្រាក់ចំណូល និងរួមចំណែកការសម្រេចបាននូវគោលដៅ នៃយុទ្ធសាស្ត្របញ្ចកោណដំណាក់កាលទី១។
ការថ្លែងរបស់លោកនាយករដ្ឋមន្រ្តីនេះ បានធ្វើឡើងនៅក្នុងពិធីបើកជាផ្លូវការពិធីបុណ្យទន្លេលើកទី៨ ក្រោមប្រធានបទ «ទន្លេដើម្បីសន្តិភាព និងការអភិវឌ្ឍ» និងការប្រកាសបើកយុទ្ធនាការ «ទស្សនាសៀមរាបឆ្នាំ ២០២៤» កាលពីយប់ថ្ងៃទី ១៦ ខែមីនា។
លោកបានលើកឡើងថា សុខសន្តិភាពបានធ្វើឱ្យកម្ពុជា ក្លាយជាគោលដៅទេសចរណ៍ វិនិយោគនិងពាណិជ្ជកម្មដ៏គួរឱ្យទាក់ទាញមួយនៅក្នុងតំបន់អាស៊ី ជាពិសេសបានធ្វើឱ្យវិស័យទេសចរណ៍ក្លាយជាកម្លាំងចលករដ៏សំខាន់ នៅក្នុងរយៈពេល ៣០ ឆ្នាំ ចុងក្រោយនេះ ក្នុងការចូលរួមជំរុញវឌ្ឍនភាពសេដ្ឋកិច្ច ឱ្យកើនឡើងប្រមាណ១៣ដង នៅក្នុង ១៩៩៣ ដល់ឆ្នាំ ២០២៣។
ក្នុងរយៈពេល ១ ទសវត្សរ៍ចុងក្រោយនេះ វិស័យទេសចរណ៍កម្ពុជា បានរីកលូតលាស់គួរជាទីមោទនៈដោយបានចូលរួមចំណែកយ៉ាងច្រើននៅក្នុងផលិតផលក្នុងស្រុកសរុបរបស់កម្ពុជា (ផ.ស.ស) ប៉ុន្តែកំណើននេះត្រូវបានបង្អាក់ស្ទើរតែទាំងស្រុងដោយសារតែការរីករាលដាលនៃវិបត្តិជំងឺកូវីដ ១៩ ដែលបានជះឥទ្ធិពលជាអវិជ្ជមានដល់សុខភាពសាធារណៈនិងបង្កផលប៉ះពាល់យ៉ាង ធ្ងន់ធ្ងរដល់ការអភវិឌ្ឍសេដ្ឋកិច្ច សង្គម និងពាណិជ្ជកម្មអន្តរជាតិនៅទូទាំងសកលលោក។
លោក ហ៊ុន ម៉ាណែត បានបញ្ជាក់ថា៖ «វិស័យទេសចរណ៍បានរងផលប៉ះពាល់ធ្ងន់ជាងគេបំផុត ជាក់ស្តែងនៅខេត្តសៀមរាប ដែលជាកន្លែងប៉ះពាល់ធំបំផុតតែម្តង»។
លោបន្តថា៖ «ទោះបីជាវិបត្តិជាសកលនេះកំពុងស្រាកស្រាន្តជាបន្តបន្ទាប់ តែស្ថានភាពនិងទស្សនវិស័យសេដ្ឋកិច្ចជាសកលនៅតែមានភាពផុយស្រួយ និងងាយរងនូវវិបត្តិថ្មី ដែលការណ៍នេះធ្វើឱ្យយើងបន្តនូវការប្រឈមនូវបញ្ហាថ្មីៗកាន់តែស្មុគស្មាញ ដែលកំពុងតែកើតឡើងជាបន្តបន្ទាប់ទាំងក្នុងទិដ្ឋភាពសេដ្ឋកិច្ចសង្គម បរិស្ថាន និងភូមិសាស្រ្តនយោបាយ ដែលបន្តជះឥទ្ធិពលអវិជ្ជមានមកលើ វិស័យទេសចរណ៍សកលលោក រួមទាំងកម្ពុជាផងដែរ»។
ទោះជាយ៉ាងណា លោកនាយករដ្ឋមន្រ្តីក៏បញ្ជាក់ដែរថា រាជរដ្ឋាភិបាលអាណត្តិទី៧ បន្តចាត់ទុកវិស័យទេសចរណ៍ ជាវិស័យអាទិភាពដែលរួមចំណែកក្នុងការអភិវឌ្ឍសង្គម សេដ្ឋកិច្ចជាតិ តាមរយៈការបង្កើតឱកាសការងារ ការបង្កើតប្រាក់ចំណូលជូនប្រជាពលរដ្ឋដោយផ្ទាល់និងដោយប្រយោល ការជំរុញការនាំចេញនៅនឹងកន្លែង ការទ្រទ្រង់កំណើនសេដ្ឋកិច្ច ការបង្កើនចំណូលជាតិ ការចូលរួមនិងការអភិរក្សវប្បធម៌ និងការថែទាំ រក្សា ការពារបរិស្ថាន ធនធានធម្មជាតិ ប្រកបដោយប្រសិទ្ធភាពនិងការទទួលខុសត្រូវខ្ពស់។
កម្ពុជាបានទទួលភ្ញៀវទេសចរអន្តរជាតិសរុប ៥,៤៥ លាននាក់ ក្នុងឆ្នាំ ២០២៣ ហើយសង្ឃឹមថា ភ្ញៀវទេសចរអន្តរជាតិ មកកម្ពុជានឹងវិលត្រលប់ទៅរកស្ថានភាពមុនវិបត្តិកូវីដ ១៩ ត្រឹមឆ្នាំ ២០២៥។
ក្នុងបរិបទនេះ លោកនាយករដ្ឋមន្ត្រី នៅតែមានសុទិដ្ឋិនិយមថា វិស័យទេសចរណ៍ នឹងនៅតែជាវិស័យចន្ទល់សេដ្ឋកិច្ច មួយដ៏សំខាន់ ក្នុងការបង្កើតឱកាសការងារ មុខរបរ ប្រាក់ចំណូល និងរួមចំណែកសម្រេចបាននូវគោលដៅ នៃយុទ្ធសាស្រ្តបញ្ចកោណ ដំណាក់កាលទី១ ជាពិសេសរួមចំណែកដល់ការសម្រេចបានចក្ខុវិស័យកម្ពុជា ជាប្រទេសចំណូលមធ្យមកម្រិតខ្ពស់ក្នុងឆ្នាំ ២០៣០ និងជាប្រទេសដែលមានចំណូលខ្ពស់នៅឆ្នាំ ២០៥០។
លោក សុខ សូកេន រដ្ឋមន្រ្តីក្រសួងទេសចរណ៍ ក៏បានថ្លែងនាពិធីនោះដែរថា វិស័យទេសចរណ៍ ជាវិស័យអាទិភាព ដែលត្រូវបានរាជរដ្ឋាភិបាលប្រសិទ្ធនាមថា «ជាមាសបៃតង» ដែលចូលរួមអភិវឌ្ឍសេដ្ឋកិច្ចសង្គមតាមរយៈការបង្កើតឱកាសការងារ បង្កើនប្រាក់ចំណូលជូនប្រជាពលរដ្ឋដោយផ្ទាល់និងដោយប្រយោល ទាក់ទាញការវិនិយោគ និងគាំទ្រដល់ការអភិរក្ស និងអភិវឌ្ឍធនធានវប្បធម៌ ធម្មជាតិ និងបរិស្ថាន ជាពិសេសរួមចំណែកក្នុងការកសាងកម្ពុជា ឱ្យមានភាពប្រកួតប្រជែងខ្ពស់ និរន្តរភាព បរិយាបន្ន និងពង្រឹងភាពធន់នៃការអភិវឌ្ឍសេដ្ឋកិច្ចសង្គម។
លោកបញ្ជាក់ថា៖ «ការងើបឡើងវិញនៃវិស័យទេសចរណ៍កម្ពុជា អាចវិលត្រឡប់មករកភាពប្រក្រតីវិញ នាពេលដ៏ខ្លីខាងមុខ ដែលតម្រូវឱ្យភាគីពាក់ព័ន្ធទាំងអស់ រួមទាំងឧស្សាហកម្មទេសចរណ៍ ត្រូវត្រៀមលក្ខណៈក្នុងការផ្តល់សេវា ដែលមានគុណភាព និងឆ្លុះបញ្ចាំងពីភាពទាក់ទាញរបស់កម្ពុជា ជាគោលដៅទេសចរណ៍សកលឈានមុខ ដូចការរំពឹងទុក»។
លោក សុខ សូកេន បានបន្ថែមទៀតថា ក្រសួងទេសចរណ៍ បានដាក់ចេញការអភិឌ្ឍវិស័យទែសចរណ៍កម្ពុជា ដោយមានចក្ខុវិស័យច្បាស់លាស់ ដើម្បីរួមចំណែកដល់ការលើកកម្ពស់កិត្យានុភាព និងភាពធន់របស់កម្ពុជា តាមរយៈការប្រែក្លាយកម្ពុជាជាគោលដៅទេសចរណ៍ឈានមុខប្រកបដោយភាពសម្បូរបែប ពោរពេញដោយកាលានុវត្តភាព និងភាពកក់ក្តៅ។
ទាក់ទងនឹងការរៀបចំពិធីបុណ្យទន្លេ ដើម្បីជំរុញវិស័យទេសចរណ៍ក្នុងខេត្តសៀមរាប អភិបាលនៃគណៈអភិបាលខេត្តសៀមរាប លោក ប្រាក់ សោភ័ណ បាននិយាយថា សម្រាប់ខេត្តសៀមរាប នេះគឺជាលើកទី១ ហើយ ដែលបានធ្វើជាម្ចាស់ផ្ទះនៃការរៀបចំពិធីបុណ្យទន្លេ ស្របពេលក៏ដូចជាការគាំទ្រដល់យុទ្ធនាការទស្សនាសៀមរាបឆ្នាំ ២០២៤។
លោកថា៖ «ព្រឹត្តិការណ៍ដ៏អស្ចារ្យនេះ គឺជាឱកាសដ៏សំខាន់មួយសម្រាប់កម្ពុជាក្នុងការផ្សព្វផ្សាយពីសក្តានុពលទេសចរណ៍ខេត្តសៀមរាប និងបណ្តាខេត្តនានា តាមដងទន្លេនៃប្រទេសកម្ពុជា ព្រោះថា បុណ្យទន្លេនេះ មានការចូលរួមពីមន្រ្តីការទូត និងបវរកញ្ញាពិភពលោកមកចូលរួម និងភ្ញៀវទេសចរមកកម្សាន្តជាច្រើន ខណៈបច្ចុប្បន្នអត្រាកក់បន្ទប់ស្នាក់នៅស្ទើរតែអស់ហើយនោះ»។
យោងតាមស្ថិតិទេសចរណ៍ពីមន្ទីរទេសចរណ៍ខេត្តសៀមរាប ពិធីបុណ្យទន្លេលើកទី៨ នៅខេត្តសៀមរាប រយៈពេល ៣ ថ្ងៃ ចាប់ពីថ្ងៃទី១៥-១៧ ខែមីនា មានទេសចរសរុបប្រមាណ ៤៥៧ ៥៥១ នាក់ ក្នុងនោះទេសចរជាតិ ប្រមាណ ៤៣៥ ០០០ នាក់ ដែលក្នុងនោះប្រជាពលរដ្ឋក្នុងខេត្តសៀមរាបមានប្រហែល ២២៣ ០០០ នាក់ និងទេសចរបរទេសប្រហែល ២២ ៥២៧ នាក់។
គណៈកម្មការអន្តរក្រសួងរៀបចំពិធីបុណ្យទន្លេ បានបង្ហាញពីការរំពឹងទុកថា នៅក្នុងពិធីបុណ្យទន្លេរយៈពេល ៣ ថ្ងៃ ដែលរៀបចំជាលើកទី១ នៅលើទឹកដីខេត្តសៀមរាបនេះ នឹងទទួលបានភ្ញៀវទេសចរសរុបមិនក្រោម ៥០ ម៉ឺននាក់ឡើយ៕
.jpg)
