![](https://pppkhmer.sgp1.digitaloceanspaces.com/image/main/20245/27_5_2024_election.jpg)
សមាជិកក្រុមប្រឹក្សាឃុំ សង្កាត់បោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ នាថ្ងៃទី២៦ ខែឧសភា។ NEC
ភ្នំពេញៈ អ្នកបោះឆ្នោតជាង ៩៩ ភាគរយដែលជាសមាជិកក្រុមប្រឹក្សាឃុំ សង្កាត់ដែលមានចំនួនជាង១ម៉ឺននាក់បានចេញទៅបោះឆ្នោតជ្រើសរើសក្រុមប្រឹក្សារាជធានី ខេត្ត ដែលមានជាង ៥០០អាសនៈ និងក្រុមប្រឹក្សាក្រុង ស្រុក ខណ្ឌ ដែលមានជាង ៣ ០០០អាសនៈ សម្រាប់អាណត្តិទី៤ កាលពីថ្ងៃទី២៦ ឧសភា។ នេះបើយោងតាមការប្រកាសរបស់គណៈកម្មាធិការជាតិរៀបចំការបោះឆ្នោត (គ.ជ.ប)។
គ.ជ.ប បញ្ជាក់ក្នុងសេចក្ដីប្រកាសព័ត៌មាននាថ្ងៃទី២៦ ឧសភា ថា៖ «តាមតួលេខបណ្ដោះអាសន្ននៃអ្នកបោះឆ្នោតដែល គ.ជ.ប ទទួលបាន បង្ហាញថាអ្នកបានទៅបោះឆ្នោតសរុបមានចំនួន ១១ ៥៩៨នាក់ ស្មើនឹង ៩៩,៧៩ ភាគរយ នៃអ្នកមានឈ្មោះក្នុងបញ្ជីបោះឆ្នោតចំនួនសរុប ១១ ៦២២នាក់»។
គ.ជ.ប លើកឡើងថា៖ «នៅថ្ងៃបោះឆ្នោតបានប្រព្រឹត្តទៅយ៉ាងរលូនក្នុងបរិយាកាសស្ងប់ស្ងាត់ សន្តិសុខ សុវត្ថិភាព និងមានសណ្ដាប់ធ្នាប់ល្អ។ ទោះបីនៅតាមស្រុក ក្រុង នៃខេត្តមួយចំនួន មានអាកាសធាតុអួអាប់ដោយកន្លែងក្តី ក៏មិនបង្កការរំខាន និងរាំងស្ទះដល់ការបើកការិយាល័យបោះឆ្នោត និងការបោះឆ្នោតឡើយ»។
គ.ជ.ប លើកឡើងថា អ្នកបោះឆ្នោតបានចេញទៅបោះឆ្នោតនៅតាមការិយាល័យបោះឆ្នោត នៅទូទាំងប្រទេសដែលមានចំនួនសរុប ២០៩ ការិយាល័យ ដោយទឹកមុខរីករាយ និងជឿជាក់។ គណបក្សនយោបាយនានាបានរក្សាភាពស្ងប់ស្ងាត់ ដើម្បីជំរុញឱ្យការបោះឆ្នោត ប្រព្រឹត្តទៅ ដោយរលូន និងពុំមានព័ត៌មានអំពីការបំភិតបំភ័យ ការគំរាមកំហែង និងទិញទឹកចិត្តអ្នកបោះឆ្នោតឡើយ។
គ.ជ.ប បន្ថែមថា កម្លាំងសន្តិសុខបោះឆ្នោតបានដាក់ពង្រាយតាមគោលដៅនានាដែលធានាបាននូវសន្តិសុខ សុវត្ថិភាព និងសណ្ដាប់ធ្នាប់ល្អ។
លោក ប្រាជ្ញ ចន្ទ ប្រធាន គ.ជ.ប. ថ្លែងក្នុងកិច្ចប្រជុំជាមួយភាគីពាក់ព័ន្ធ ក្រោយបិទបញ្ចប់ការឆ្នោតនេះថា៖ «បរិយាកាសទូទៅជុំវិញការបោះឆ្នោតមានសភាពល្អប្រសើរ ដែលបង្កលក្ខណៈដល់ការបោះឆ្នោតប្រព្រឹត្តទៅដោយរលូន គ្មានអំពើហិង្សា គ្មានការគំរាមកំហែង និងពុំមានសកម្មភាពធ្វើឱ្យរាំងស្ទះដល់ដំណើរការបោះឆ្នោតឡើយ ដែលយើងអាចចាត់ទុកថាការបោះឆ្នោតនេះ បានប្រព្រឹត្តទៅដោយសេរី ត្រឹមត្រូវ យុត្តិធម៌ និងទទួលបានលទ្ធផលជោគជ័យគួរជាទីមោទនៈ»។
លោកថ្លែងថា គណបក្សចំនួន៥បានចូលរួមប្រកួតប្រជែងការបោះឆ្នោតនេះ រួមមាន គណបក្សប្រជាជនកម្ពុជា ឈរឈ្មោះនៅមណ្ឌលបោះឆ្នោតរាជធានី ខេត្តទាំង២៥ និងមណ្ឌលក្រុង ស្រុក ខណ្ឌ ទាំង២០៩ និងមានបេក្ខជនជាង៨ ៦០០នាក់។ គណបក្សឆន្ទៈខ្មែរឈរឈ្មោះនៅមណ្ឌលចំនួន២៣រាជធានី ខេត្ត និង១៩២ក្រុង ស្រុក ខណ្ឌ និងមានបេក្ខជនជាង៧ ៩០០នាក់។
លោកបន្តថា គណបក្សកម្លាំងជាតិឈរឈ្មោះនៅមណ្ឌលចំនួន២២រាជធានី ខេត្ត និង៨១ក្រុង ស្រុក ខណ្ឌ និងមានបេក្ខជន ៤ ០០១នាក់។ គណបក្សហ៊្វុនស៊ិនប៉ិចឈរឈ្មោះនៅ១៨រាជធានី ខេត្ត និង ១២១ក្រុង ស្រុក ខណ្ឌ និងមានបេក្ខជនជាង៥ ៣០០នាក់។ គណបក្សខ្មែររួបរួមជាតិឈរឈ្មោះនៅ១៧រាជធានី ខេត្ត និង ៦៤ក្រុង ស្រុក ខណ្ឌ និងមានបេក្ខជនជាង៣ ២០០នាក់។
គ.ជ.ប បានទទួលស្គាល់អ្នកសង្កេតការណ៍ជាតិជាង ១ ៥០០នាក់ មកពី១២សមាគម និងអង្គការមិនមែនរដ្ឋាភិបាល អ្នកសង្កេតការណ៍អន្តរជាតិ៨នាក់មកពីសមាគមនិស្សិត និងសមាគមទំនាក់ទំនងយុវជនកម្ពុជា-ចិន និងភ្ញៀវពិសេស៣នាក់ជាសាស្ត្រាចារ្យមកពីសាកលវិទ្យាល័យ៣មកពីប្រទេសជប៉ុន។
រាជធានី ខេត្តមានចំនួនអាសនៈសមាជិកក្រុមប្រឹក្សាសរុប៥៥៩អាសនៈ។ ខេត្តដែលមានអាសនៈច្រើនជាងគេមាន៧ខេត្តគឺខេត្តបាត់ដំបង កំពង់ចាម កណ្ដាល ភ្នំពេញ ព្រៃវែង សៀមរាប តាកែវ ដែលខេត្តនីមួយៗមាន២៧អាសនៈ។ ខេត្តដែលមានអាសនៈតិចជាងគេមាន៣ខេត្ត គឺខេត្តមណ្ឌលគិរី កែប និងប៉ៃលិន ដែលខេត្តនីមួយៗមាន១៥អាសនៈ។
ចំនួនអាសនៈក្រុមប្រឹក្សាក្រុង ស្រុក ខណ្ឌ នៅទូទាំងប្រទេសសរុបមានចំនួន ៣ ៦៤១ អាសនៈ។
លទ្ធផលបឋមដែលប្រកាសដោយ គ.ជ.ប បានបង្ហាញថា សម្រាប់រាជធានីភ្នំពេញដែលមាន២៧អាសនៈជាសមាជិកក្រុមប្រឹក្សា គណបក្សប្រជាជនកម្ពុជាទទួលបាន ៨១៣ សំឡេងឆ្នោត គណបក្សឆន្ទៈខ្មែរទទួលបាន ៨០ សំឡេងឆ្នោត គណបក្សកម្លាំងជាតិទទួលបាន ១សំឡេងឆ្នោត ចំណែកគណបក្ស ២ផ្សេងទៀតមិនទទួលបានសំឡេងឆ្នោតនោះទេ។
លទ្ធផលបឋមបង្ហាញថា សម្រាប់ខេត្តកណ្ដាលដែលមាន ២៧អាសនៈជាសមាជិកក្រុមប្រឹក្សាដែរនោះ គណបក្សប្រជាជនកម្ពុជាទទួលបានសំឡេងច្រើនជាងគេគឺ ៧៦១សំឡេង បន្ទាប់មកគណបក្សឆន្ទៈខ្មែរទទួលបាន១២១សំឡេង៕
សម្រាប់ខេត្តព្រៃវែង ដែលមាន២៧អាសនៈជាសមាជិកក្រុមប្រឹក្សាដែរនោះ លទ្ធផលបឋមបង្ហាញថា គណបក្សប្រជាជនកម្ពុជាទទួលបានសំឡេងច្រើនជាងគេគឺ ៧៣៧សំឡេង បន្ទាប់មកគណបក្សឆន្ទៈខ្មែរទទួលបាន ១៤០សំឡេង៕