![](https://pppkhmer.sgp1.digitaloceanspaces.com/image/main/20245/27_5_2024_20_anniversary_of_ccf_on_may_26_in_steung_meanchey_photo_ccf_3.jpg)
លោកស្រី ពេជ ចន្ទមុនី ភរិយាលោកនាយករដ្ឋមន្ត្រី ហ៊ុន ម៉ាណែត បានចូលរួមក្នុងកម្មវិធីអបអរខួប ២០ ឆ្នាំអង្គការមូលនិធិកុមារកម្ពុជា (CCF)កាលពីថ្ងៃទី២៦ ខែឧសភា។ CCF
ភ្នំពេញ: អង្គការមូលនិធិកុមារកម្ពុជា (CCF) បានប្រារព្ធខួបលើកទី ២០ របស់ខ្លួនជាមួយនឹងការបង្ហាញពីសមិទ្ធផលដ៏គួរឱ្យកត់សម្គាល់រយៈពេលពីរទសវត្សរ៍ក្នុងការជួយដល់កុមារដែលមានហានិភ័យបំផុតនៅក្នុងប្រទេសកម្ពុជា។
បង្កើតឡើងដោយ លោក ស្កុត នីសុន អតីតនាយកប្រតិបត្តិហូលីវូដ អង្គការ CCF បានជះឥទ្ធិពលយ៉ាងខ្លាំងទៅលើជីវិតអ្នករស់នៅតំបន់ ស្ទឹងមានជ័យជាង ១៥ម៉ឺននាក់ តាមរយៈកម្មវិធីអប់រំ ការថែទាំសុខភាព និងការគាំទ្រសហគមន៍យ៉ាងទូលំទូលាយរបស់ខ្លួន។
ដំណើរនេះបានចាប់ផ្តើមនៅឆ្នាំ ២០០៤ នៅពេលលោក ស្កុត នីសុន បានបោះបង់ការរស់នៅដ៏ហ៊ឺហាក្នុងហូលីវូដ ហើយបានមកជួបក្មេងស្រីអាយុ ៨ ឆ្នាំម្នាក់ឈ្មោះ ស្រីនិច នៅទីលានចាក់សំរាមស្ទឹងមានជ័យ ក្នុងរាជធានីភ្នំពេញ មុនពេលពង្រីកខ្លួនទៅបង្កើតសេវាថែទាំសុខភាព និងសុខុមាលភាពរបស់កុមារចំនួន ៤៥ នាក់។
ឆាកជីវិត ស្រីនិច និងក្រុមគ្រួសាររបស់នាងនៅលើគំនរសំរាមប្រកបដោយគ្រោះថ្នាក់ បានធ្វើឱ្យលោកស្កុត នីសុន ជំរុញការបង្កើតអង្គការ CCF។
សព្វថ្ងៃនេះ អង្គការបានពង្រីកដើម្បីជួយដល់កុមារ ៤៣០០នាក់ដែលមានហានិភ័យខ្ពស់បំផុត ដោយផ្តល់ឱ្យពួកគេនូវលទ្ធភាពទទួលបានសេវា និងការអប់រំសំខាន់ៗ។
លោកស្រី ពេជ ចន្ទមុនី ភរិយាលោកនាយករដ្ឋមន្ត្រី ហ៊ុន ម៉ាណែត បានចូលរួមក្នុងកម្មវិធីអបអរខួប ២០ ឆ្នាំនេះ ដោយគូសបញ្ជាក់ពីសារៈសំខាន់នៃបេសកកម្មរបស់ CCF។
![](https://pppkhmer.sgp1.cdn.digitaloceanspaces.com/image/main/20245/27_5_2024_20_anniversary_of_ccf_on_may_26_in_steung_meanchey_photo_ccf_5.jpg)
លោកស្រី ពេជ ចន្ទមុនី ភរិយាលោកនាយករដ្ឋមន្ត្រី ហ៊ុន ម៉ាណែត បានចូលរួមក្នុងកម្មវិធីអបអរខួប ២០ ឆ្នាំអង្គការមូលនិធិកុមារកម្ពុជា (CCF)កាលពីថ្ងៃទី២៦ ខែឧសភា។ CCF
ក្នុងនាមជាអគ្គស្នងការនៃសមាគមកាយឬទ្ធិកម្ពុជា (GGAC) លោកស្រី ចន្ទមុនី បានកោតសរសើរចំពោះការលះបង់ឥតងាករេរបស់លោក ស្កុត នីសុន និងថ្លែងអំណរគុណចំពោះអ្នកគាំទ្ររបស់ CCF។
លោកស្រី ចន្ទមុនី អញ្ជើញចូលជាអធិបតីក្នុងពិធីកាលពីថ្ងៃទី២៦ ខែឧសភា នៅស្ទឹងមានជ័យ បានថ្លែងថា៖ «ថ្ងៃនេះជាឱកាសដ៏រីករាយ និងមោទនភាពមួយដែលខ្ញុំជាអធិបតីក្នុងខួប២០ឆ្នាំនៃមូលនិធិកុមារកម្ពុជា»។
លោកស្រីដែលជាអនុប្រធានក្រុមប្រឹក្សាភិបាលនៃសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ផងដែរ បានបន្ដថា៖ «វាជាពេលវេលាប្រវត្តិសាស្ត្រដែលមិនអាចបំភ្លេចបានសម្រាប់អង្គការ CCF ក្នុងបុព្វហេតុដ៏គួរឱ្យកត់សម្គាល់ក្នុងរយៈពេលពីរទសវត្សរ៍កន្លងមកនេះ។ ក្តីមេត្តាពិតចំពោះកុមារកម្ពុជា និងការលះបង់របស់លោក ស្កុត នីសុន បានបំផុសគំនិតខ្ញុំ និងស្វាមីខ្ញុំឱ្យគាំទ្របេសកកម្មរបស់ CCF»។
លោកស្រីបានថ្លែងទៀតថា៖ «អរគុណចេញពីបេះដូងរបស់ខ្ញុំចំពោះលោក ស្កុត នីសុន។ ក្នុងនាមសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ខ្ញុំសូមថ្លែងអំណរគុណយ៉ាងស្មោះអស់ពីដួងចិត្តចំពោះស្ថាបនិក ថ្នាក់ដឹកនាំ និងអ្នកពាក់ព័ន្ធទាំងអស់ក្នុងមូលនិធិកុមារកម្ពុជា ចំពោះទឹកចិត្តសប្បុរសធម៌ និងការខិតខំប្រឹងប្រែងមិនចេះនឿយហត់»។
លោក ស្កុត នីសុន ដែលបានបោះបង់អាជីពដើម្បីចាប់ផ្តើមអង្គការ CCF បាននិយាយថា លោកមិននឹកស្រមៃថានឹងសម្រេចបានអ្វីដូចសព្វថ្ងៃនោះទេ។
លោកបានឱ្យដឹងថា៖ «វាចាប់ផ្តើមពីក្មេងស្រីអាយុប្រាំបីឆ្នាំម្នាក់ឈ្មោះ ស្រីនិច ដែលរស់នៅ និងរើសអេតចាយក្នុងស្ថានភាពដ៏អាក្រក់បំផុតនៅលើទីលានចាក់សំរាមជាមួយម្តាយ និងបងស្រីរបស់នាង។ សព្វថ្ងៃនេះ យើងមានកុមារប្រហែល ២ពាន់នាក់ដែលកំពុងធ្វើការឆ្ពោះទៅរកជីវិតកាន់តែប្រសើរឡើងសម្រាប់ខ្លួនគេ និងក្រុមគ្រួសាររបស់ពួកគេ»។
លោកបានថ្លែងថា៖ «យើងបានពង្រីកលទ្ធភាពរបស់យើងក្នុងការផ្តល់ការអប់រំ ការថែទាំសុខភាព និងការគាំទ្រសហគមន៍ដើម្បីជះឥទ្ធិពលដល់ជីវិតមនុស្សជាង ១សែន ៥ម៉ឺន ៥ពាន់នាក់ ដែលជារឿងគួរឱ្យកត់សម្គាល់»។
![](https://pppkhmer.sgp1.cdn.digitaloceanspaces.com/image/main/20245/27_5_2024_20_anniversary_of_ccf_on_may_26_in_steung_meanchey_photo_ccf_2.jpg)
សិស្សជិត ២ពាន់នាក់ឥឡូវនេះកំពុងធ្វើការឆ្ពោះទៅរកអនាគតដ៏ល្អប្រសើរសម្រាប់ខ្លួនឯង និងក្រុមគ្រួសាររបស់ពួកគេ។
លោកស្កុត នីសុន បាននិយាយថា កុមារចំនួន ៤៣០០នាក់ត្រូវបានចាត់ទុកថាមានហានិភ័យពីការព្រងើយកណ្ដើយ កង្វះអាហារូបត្ថម្ភ ឬការរំលោភបំពានដោយសារតែភាពក្រីក្រ។
លោក ស្កុត នីសុន បានប្រាប់ភ្នំពេញប៉ុស្ដិ៍ថា៖ «បើគ្មានការអន្តរាគមន៍ទេ ពួកគេមានហានិភ័យខ្ពស់ក្នុងការបោះបង់ការសិក្សាទៅធ្វើការ ដើម្បីផ្តល់ប្រាក់ចំណូលដល់គ្រួសាររបស់ពួកគេ ឬមើលថែទាំប្អូនស្រីតូចៗ ខណៈដែលឪពុកម្តាយរបស់ពួកគេចេញធ្វើការខាងក្រៅ»។
លោកបន្ដថា៖ «កុមារក៏ប្រឈមនឹងហានិភ័យនៃការចេញទៅក្រៅតាមដងផ្លូវក្នុងបរិយាកាសដែលមិនមានសុវត្ថិភាព ខណៈពេលដែលឪពុកម្តាយរបស់ពួកគេកំពុងធ្វើការ»។
អង្គការ CCF ផ្តល់ការគាំទ្រ និងការថែទាំដើម្បីរក្សាកុមារទាំងនេះនៅក្នុងសាលារៀន និងមានសុវត្ថិភាពជាមួយនឹងការអប់រំប្រកបដោយគុណភាពខ្ពស់ និងកម្មវិធីគាំទ្រសហគមន៍។
លោកស្រី ចន្ទមុនី ដែលមានទំនាក់ទំនងពិសេសជាមួយដូនចាស់ក្នុងសហគមន៍របស់ CCF បានចូលរួមក្នុងពិធីកម្មវិធីអបអរនេះ ចូលរួមជាមួយភ្ញៀវ និងទស្សនាស្តង់ ក៏ដូចជាការបង្ហាញផ្សេងៗ។
នៅក្នុងសុន្ទរកថា លោកស្រីបានសង្កត់ធ្ងន់លើសារៈសំខាន់នៃការបន្តការគាំទ្រសម្រាប់បេសកកម្មរបស់ CCF ពីសប្បុរសជន និងអ្នកពាក់ព័ន្ធ។
![](https://pppkhmer.sgp1.cdn.digitaloceanspaces.com/image/main/20245/27_5_2024_20_anniversary_of_ccf_on_may_26_in_steung_meanchey_photo_ccf_4.jpg)
លោកស្រីបានអំពាវនាវថា៖ «ជំនួយរបស់លោកអ្នកគ្រប់ទម្រង់ មិនថាតាមរយៈការរួមចំណែកផ្នែកហិរញ្ញវត្ថុដល់ប្រតិបត្តិការផ្តល់មូលនិធិ ការបរិច្ចាគសម្ភារៈ និងឧបករណ៍អប់រំ ឬការចែករំលែកគំនិត ជំនាញ និងចំណេះដឹង គឺមានតម្លៃមិនអាចកាត់ថ្លៃបានក្នុងការធានាឱ្យទទួលបានភាពជោគជ័យជាបន្តបន្ទាប់នៃកិច្ចខិតខំប្រឹងប្រែងរបស់មូលនិធិ»។
ព្រឹត្តិការណ៍នេះក៏បានលើកឡើងពីរឿងរ៉ាវជោគជ័យរបស់អតីតនិស្សិតអង្គការ CCF ដូចជា កញ្ញា រុន សុភី ដែលបានចេញពីការរស់នៅលើគំនរសំរាមរហូតដល់បញ្ចប់ការសិក្សានៅសាកលវិទ្យាល័យ Melbourne និង លោក ហាវ ញ៉ាញ់ ដែលបច្ចុប្បន្នជាអ្នកផលិតខ្សែភាពយន្តដ៏ជោគជ័យ។ រឿងរ៉ាវរបស់ពួកគេជាឧទាហរណ៍អំពីអំណាចផ្លាស់ប្តូរនៃកម្មវិធីរបស់ CCF។
កញ្ញា សុភី បាននិយាយពីដំណើរជីវិតពីកន្លែងភ្នំសំរាមដើម្បីសម្រេចបានជោគជ័យក្នុងការសិក្សាថា៖ «CCF បានជួយខ្ញុំជាច្រើន។ ខ្ញុំច្បាស់ជាគ្មានថ្ងៃនេះដោយមិនមានអង្គការ CCF នោះ។ ពួកគេបានផ្តល់ឱ្យខ្ញុំនូវអ្វីៗគ្រប់យ៉ាង។
លោក ញ៉ាញ់ បានចំណាយពេលប្រាំឆ្នាំរស់នៅ និងរើសអេតចាយលើទីលានចាក់សំរាមតាំងពីក្មេង ហើយមិនដែលជឿថា លោកនឹងចាកចេញពីទីលានចាក់សំរាមនោះទេ។ ដោយមានការគាំទ្រពី CCF លោកបានចាកចេញ ហើយឥឡូវនេះកំពុងចាប់អាជីពដ៏ជោគជ័យក្នុងការផលិតភាពយន្ត។
លោកនិយាយថា៖ «ខ្ញុំគិតថា ខ្ញុំនឹងក្លាយជាអ្នករើសសំរាមមួយជីវិត។ ខ្ញុំមិនបានគិតថា ខ្ញុំមានអនាគតទេ។ នៅពេលខ្ញុំគិតអំពីអតីតកាល ខ្ញុំមិនអាចជឿថា អ្វីៗបានផ្លាស់ប្តូរប៉ុន្មាននោះទេ។ ប្រសិនបើអ្នកមានឱកាសសិក្សាដូចខ្ញុំត្រូវបានផ្តល់ឱ្យ នោះអ្នកទទួលយកវា ហើយនោះជាឱកាសរបស់អ្នកក្នុងការផ្លាស់ប្តូរជោគវាសនារបស់អ្នក។ អ្នកមិនអាចផ្លាស់ប្តូរអតីតកាលបានទេ ប៉ុន្តែអ្នកអាចផ្លាស់ប្តូរអនាគតបាន»។
![](https://pppkhmer.sgp1.cdn.digitaloceanspaces.com/image/main/20245/27_5_2024_20_anniversary_of_ccf_on_may_26_in_steung_meanchey_photo_pich_chanmony_3_.jpg)
ពិធីអបអរខួប ២០ ឆ្នាំអង្គការនេះតាមដងផ្លូវសហគមន៍បានបើកទូលាយសម្រាប់សហគមន៍ស្ទឹងមានជ័យទាំងមូលជាមួយនឹងល្បែងកម្សាន្ត និងតន្ត្រី។
ព្រះនាងតូច នរោត្ដម ចេនណា គឺជាតួឯកសំខាន់ម្នាក់ក្នុងចំណោមតារាចម្រៀងល្បីឈ្មោះដែលសម្តែងនៅលើឆាកសហគមន៍។ សិល្បករផ្សេងទៀត រួមមាន លោក សាយ កញ្ញា វិស លោក ពុទ្ធិកា និងកញ្ញា សុខ សេរី។ នេះបើតាមអ្នកនាង ខេត ជីន អ្នកនិពន្ធជាន់ខ្ពស់នៃផ្នែកទំនាក់ទំនងរបស់អង្គការ CCF៕