បុគ្គលិកមណ្ឌលសុខភាពសែនរុងរឿង៤ នៅខេត្តព្រះវិហារធ្វើកាអប់រំសុខភាពអំពីជំងឺគ្រុនឈាម ដល់សិស្សានុសិស្ស។ រូបថត សហការី
ភ្នំពេញៈ ជំងឺគ្រុនឈាមបានកើនឡើងជិត ៣ពាន់ករណីក្នុងរយៈពេល ២០សប្តាហ៍ក្នុងឆ្នាំ ២០២៤នេះ បើធៀបទៅនឹងរយៈពេលដូចគ្នាកាលពីឆ្នាំ ២០២៣ កន្លងមក ខណៈពេលដែលវ៉ាក់សាំងការពារជំងឺគ្រុនឈាមមិនទាន់មាននោះទេ។
គិតត្រឹមសប្តាហ៍ទី២០ ដំបូងក្នុងឆ្នាំ ២០២៤នេះ មានករណីជំងឺគ្រុនឈាមរហូតដល់ទៅចំនួន ៥ ៦៩៥ករណី។ ប៉ុន្តែមានករណីធ្ងន់ធ្ងរតែ ៣ភាគរយប៉ុណ្ណោះ។ នេះបើយោងតាមលោក លាង ឫទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាមនៃក្រសួងសុខាភិបាល។
លោកក៏បានឱ្យដឹងផងដែរថា ក្នុងឆ្នាំ ២០២៤ នេះ ស្ថានភាពជំងឺគ្រុនឈាមមានការកើនឡើង។ ក្នុងរយៈពេល ២០ សប្តាហ៍ដូចគ្នាកាលពីឆ្នាំ ២០២៣ កន្លងមក ជំងឺគ្រុនឈាមមានចំនួន ២ ៧០៨ ករណីប៉ុណ្ណោះ។ បើធ្វើការប្រៀបធៀបរយៈពេលដូចគ្នា ជំងឺនេះបានកើនឡើងចំនួន ២ ៩៨៧ករណី។
កាលពីឆ្នាំ ២០២៣ កន្លងមក ជំងឺគ្រុនឈាមជាង ៣០ ០០០ករណី ត្រូវបានរកឃើញ ដែលចំនួនទាំងនេះមានការកើនឡើងជាងឆ្នាំមុនៗ។ បើទោះជាមានការកើនឡើងយ៉ាងណាក៏ដោយ ក៏ស្ថានភាពនេះគឺស្ថិតក្នុងកម្រិត ដែលអាចគ្រប់គ្រងបាន។
ទោះយ៉ាងណារហូតមកដល់ពេលបច្ចុប្បនេះ នៅមិនទាន់មានវ៉ាក់សាំងបង្ការជំងឺគ្រុនឈាមត្រូវបានទទួលស្គាល់នៅឡើយនោះទេ បើទោះបីជាមានការផ្សព្វផ្សាយតាមបណ្តាញសង្គមយ៉ាងណាក៏ដោយ។
ក្រសួងសុខាភិបាលកាលពីដើមឆ្នាំនេះបានប្រកាសឱ្យសាធារណៈជនប្រុងប្រយ័ត្នចំពោះវ៉ាក់សាំងបង្ការជំងឺគ្រុនឈាមមួយឈ្មោះ «Qdenga» ដែលបានផ្សព្វផ្សាយលើបណ្ដាញសង្គមឱ្យពលរដ្ឋប្រើប្រាស់ ព្រោះថា អង្គការសុខភាពពិភពលោក (WHO) នៅពុំទាន់ទទួលស្គាល់វ៉ាក់សាំងនេះនៅឡើយនោះទេ។
លោក លាង ឫទ្ធា បានបញ្ជាក់ថា៖«រហូតមកដល់នឹងពេលនេះ កម្ពុជាយើងពុំមានវ៉ាក់សាំងការពារជំងឺគ្រុនឈាមទេ»។
លោក គួង ឡូ ប្រធានមន្ទីរសុខាភិបាលខេត្តព្រះវិហារ និងជាទីប្រឹក្សាក្រសួង សុខាភិបាល បានឱ្យដឹងថា កម្មវិធីជាតិប្រយុទ្ធនឹងជំងឺគ្រុ តាមការទស្សន៍ទាយមើលតាមអេពីដេមីសាស្ត្រក្នុងឆ្នាំ ២០២៤នេះ នឹងមានការផ្ទុះជំងឺគ្រុនឈាមច្រើនជាងឆ្នាំ ២០២៣ ដែលមានតែជាង ៣ម៉ឺនករណី។ ចំណែកឯឆ្នាំ ២០២៤ នេះ ជំងឺគ្រុនឈាមអាចកើនឡើងដល់ទៅជាង ៤ម៉ឺនករណីឯនោះ។
លោក គួង ឡូ បានមានប្រសាសន៍ថា៖ «អញ្ជឹងជំងឺគ្រុនឈាមនឹងឡើងជាង ១ម៉ឺនករណីទៀតក្នុងឆ្នាំ ២០២៤នេះ។ ហ្នឹងបើយោងតាមការទស្សន៍ទាយ។ អញ្ជឹងនេះ គឺជាវដ្ត មិនមែនពាក់ព័ន្ធទៅនឹងការធ្លាក់ភ្លៀងលឿន ឬយឺតនោះទេ។ ឆ្នាំនេះធ្លាក់ភ្លៀងយឺតជាងឆ្នាំទៅ»។
យោងតាមនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានឱ្យដឹងដែរថា ជំងឺគ្រុនឈាមបង្កឡើងដោយវីរុសដាំង (Dengue Virus) ដែលមានបួនប្រភេទ DENV1 DENV2 DENV3 និង DENV4 តាមរយៈមូសខ្លាញីខាំចម្លងពីមនុស្សម្នាក់ទៅមនុស្សទៀត។ តាមការទស្សន៍ទាយតាមបែបអេពីដេមីសាស្ត្រឃើញថា ស្ថានភាពជំងឺគ្រុនឈាមមានការរាតត្បាតខ្លាំងម្តងនៅរៀងរាល់ ៥ ទៅ ៦ឆ្នាំម្តង។ តាមការកត់សម្គាល់ជំងឺនេះបានរាតត្បាត កាលឆ្នាំ ២០១២ និងក្រោយមកក្នុងឆ្នាំ ២០១៨ ហើយឆ្នាំ ២០២៤នេះ គឺជាឆ្នាំដែលត្រូវដល់វដ្តនៃការរាតត្បាតធំម្តងទៀត។
ក្នុងរយៈពេល ៥ខែ ក្នុងឆ្នាំ ២០២៤នេះ ជំងឺគ្រុនឈាមក្នុងខេត្តព្រះវិហារកើតមានរៀងរាល់ខែ ដែលសរុបមានចំនួន ៧៧ករណី ដែលមិនមានករណីផ្ទុះជំងឺនេះនោះទេ។ នេះបើយោងតាមលោក គួង ឡូ។
លោកថ្លែងថា៖ «សម្រាប់មន្ទីរសុខាភិបាលខេត្តបានធ្វើសកម្មភាពបានច្រើនហើយ គឺយើងបានធ្វើការអប់រំសុខភាព ដល់ពលរដ្ឋ សិស្សានុសិស្សក្នុងសាលា ដើរដាក់ថ្នាំអាល់បែតមួយចំនួនរួចហើយ។ អត់ទាន់មានករណីផ្ទុះគ្រុនឈាមទេ តែមានការបាញ់ថ្នាំនៅកន្លែងដែលមានមូសច្រើន»។
ដើម្បីបង្ការជំងឺគ្រុនឈាម ក្រសួងសុខាភិបាលបានអំពាវនាវឱ្យកំចាត់ដង្កូវទឹក និងមូសខ្លាតាមរយៈកំទេចចោល និងលុបបំបាត់ចោលនូវរាល់វត្ថុដក់ទឹក ដែលមិនប្រើប្រាស់ដូចជា៖ សំបកង់ឡាន កង់ម៉ូតូ សំបកកំប៉ុង ធុង សំបកដប សំបកដូង និងវត្ថុដ៏ទៃទៀតដែលនៅជុំវិញបរិវេណផ្ទះ និង ត្រូវលាងសំអាតសំភារៈឬវត្ថុប្រើប្រាស់ផ្សេងៗសម្រាប់ស្តុកទឹកឱ្យបាន ២ដងក្នុង ១សប្តាហ៍ ឬដាក់ថ្នាំអាបែត ឬដាក់ត្រី ៧ ពណ៌ ឬគ្របឱ្យបានត្រឹមត្រូវនូវពាង អាងទឹក ធុងក្រឡ ថូផ្កា ចានទ្រជើងទូ។
លើសពីនោះ ត្រូវកំចាត់សត្វមូសខ្លាតាមរយៈការរៀបចំទុកសម្ភារៈក្នុងផ្ទះសម្បែងឱ្យមានសណ្តាប់ធ្នាប់ ធ្វើយ៉ាងណាឱ្យមានពន្លឺចាំងចូលក្នុងផ្ទះបានល្អ លុបបំបាត់កំប៉ូតព្រៃជុំវិញផ្ទះ និង ចូលរួមសហការជាមួយភ្នាក់ងារសុខាភិបាលក្នុងករណីមានការបាញ់ថ្នាំសម្លាប់មូស។
ក្រៅពីនោះ ត្រូវការពារខ្លួនពីការខាំចម្លងរបស់មូសខ្លាញីតាមរយៈ ការដេកក្នុងមុងទាំងថ្ងៃ និងយប់ ស្លៀកពាក់ខោអាវវែង និងមិនត្រូវស្ថិតនៅកន្លែងដែលមិនមានពន្លឺគ្រប់គ្រាន់។ល។ ហើយត្រូវរួសរាន់ស្វែងរកសេវាថែទាំសុខភាពដែលនៅជិតបំផុតដូចជា មណ្ឌលសុខភាព និងមន្ទីរពេទ្យក្នុងករណីក្រុមគ្រួសារណាម្នាក់របស់អ្នកមានសញ្ញា ឬសញ្ញាជំងឺ ដូចជា ក្តៅខ្លួន (ក្តៅខ្លួនខ្លាំងភ្លាមៗ) និងសញ្ញាបន្ទាប់បន្សំផ្សេងទៀត។
ក្រសួងបានណែនាំថា គ្រប់ករណីសង្ស័យជំងឺគ្រុនឈាមមិនត្រូវសាកល្បងព្យាបាលដោយខ្លួនឯង ឬការប្រើប្រាស់ថ្នាំប្រភេទអាស្ពីរីនជាដាច់ខាត និង មិនត្រូវស្វែងរកសេវាថែទាំសុខភាពណាដែលមិនមានជំនាញវិជ្ជាជីវៈពិនិត្យព្យាបាលជំងឺគ្រុនឈាមដាច់ខាត៕
