លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានបញ្ជាក់យ៉ាងច្បាស់ថា ប្រទេសចិនគ្មានតួនាទីអ្វីនៅលើការសម្រេចចិត្តរបស់កម្ពុជាក្នុងការផ្តួចផ្តើមសាងសង់គម្រោង«ព្រែកជីកហ្វូណនតេជោ»នោះទេ។
គម្រោងព្រែកជីកនេះត្រូវបានវៀតណាមដែលស្ថិតនៅដងទន្លេមេគង្គផ្នែកខាងក្រោម សម្តែងការព្រួយបារម្ភដោយលើកឡើងថា វាអាចមានផលប៉ះពាល់ដល់បរិស្ថាន។ ក្រៅពីនេះ ក៏មានអ្នករិះគន់មួយចំនួនបានភ្ជាប់គម្រោងនេះទៅនឹងបញ្ហាភូមិសាស្ត្រនយោបាយ ដូចជាការពង្រីកឥទ្ធិពលរបស់ចិនជាដើម។
នៅក្នុងបទបង្ហាញអំពីគម្រោងព្រែកជីកនេះទៅកាន់អ្នកសារព័ត៌មាននៅព្រឹកថ្ងៃទី៣ ខែឧសភាកន្លងទៅ លោក ស៊ុន ចាន់ថុល ពន្យល់ថា ក្រុមហ៊ុនចិនមួយនឹងវិនិយោគទៅលើការសាងសង់ ហើយពិធីបើកការដ្ឋានសាងសង់គ្រោងនឹងធ្វើឡើងនៅខែធ្នូ ឬដើមឆ្នាំក្រោយ។
លោកថ្លែងដូច្នេះថា៖ «ការសិក្សាលទ្ធភាពមានរយៈពេល២៦ ខែ។ យើងមិនចេះតែនឹកឃើញ ក្រោយក្រោកពីដំណេក ឬតាមការបញ្ជារបស់ចិននោះទេ។ ខ្ញុំបញ្ជាក់ថា គ្មានចិនឯណាបានដឹងមុនអំពីគម្រោងនេះទេ»។
លោកបញ្ជាក់ទៀតថា៖ «គម្រោងនេះផ្ដួចផ្ដើមផ្ទាល់ដោយអតីតនាយករដ្ឋមន្ត្រី សម្ដេចតេជោ ហ៊ុន សែន ដែលបានណែនាំយើងឲ្យសិក្សាគម្រោងនេះ។ ដូច្នេះគ្មានអ្នកណាមកបញ្ជាយើងឲ្យធ្វើទេ ក្រៅពីសម្ដេចតេជោ ដែលបានប្រាប់យើងឲ្យធ្វើការជាមួយក្រសួងធនធានទឹក មិនមែនជាមួយបរទេសណាទេ»។
គម្រោងព្រែកជីកប្រវែង ១៨០ គីឡូម៉ែត្រនេះនឹងចំណាយពេលសាងសង់ ៤ ឆ្នាំដោយគ្រោងចំណាយថវិកាប្រមាណ ១,៧ ពាន់លានដុល្លារ។ ការសាងសង់នឹងផ្តល់ការងារដល់កម្មកររហូតដល់ ១ម៉ឺននាក់ ដែលភាគច្រើនជាជនជាតិខ្មែរ រួមជាមួយនឹងវិស្វករចិន។
លោកពន្យល់ថា គម្រោងនេះនឹងធ្វើទៅតាមគន្លងព្រែកជីកបុរាណមួយដែលគេបោះបង់ចោលជាងមួយពាន់ឆ្នាំមុនក្នុងសម័យហ្វូណន។
បើតាមលោក ស៊ុន ចាន់ថុល ការសិក្សាលទ្ធភាពបង្ហាញថា ព្រែកជីកនេះនឹងប្រើប្រាស់ត្រឹមតែ ០,០៥៣ភាគរយនៃទឹកទន្លេមេគង្គ ដោយប្រើប្រាស់ទឹកនៃដៃទន្លបាសាក់ ដែលជាដៃមួយនៃដងទន្លមេគង្គ។ សព្វថ្ងៃនេះ ទឹក ៨០០០ម៉ែត្រគូបក្នុងមួយវិនាទីហូរចូលទៅសមុទ្រតាមទន្លេមេគង្គនៅវៀតណាម ខណៈទន្លេបាសាក់ដែលជាដៃទន្លេមេគង្គ មានកម្រឹតលំហូរទឹកតែ ១៤០០ម៉ែត្រគូបក្នុងមួយវិនាទី។
គម្រោងនេះស្ថិតក្នុងភាពជាដៃគូរវាងរដ្ឋនិងវិស័យឯកជន តាមរយៈការវិនិយោគ សាងសង់ ប្រតិបត្តិការ និងផ្ទេរ (BOT) ដែលការចំណាយទាំងអស់គឺជាការទទួលខុសត្រូវរបស់ក្រុមហ៊ុន។ ដូច្នេះវាមិនតម្រូវឲ្យរដ្ឋត្រូវខ្ចីប្រាក់ដើម្បីយកមកសាងសង់ព្រែកជីកនេះ ដែលធ្វើឲ្យកម្ពុជាមានបំណុលវន្តករ ដូចការលើកឡើងរបស់អ្នករិះគន់មួយចំនួននោះទេ។ នេះជាការបញ្ជាក់របស់លោក ស៊ុន ចាន់ថុល។
បើតាមលោកឧបនាយករដ្ឋមន្ត្រី ក្រៅពីប្រទេសវៀតណាម គ្មានប្រទេសណាមួយបានសម្ដែងការព្រួយបារម្ភចំពោះគម្រោងនេះទេ។
លោកថា ផ្ទុយទៅវិញប្រទេសក្នុងតំបន់អាស៊ានមួយចំនួនអាចនឹងគាំទ្រគម្រោងនេះ ព្រោះវានឹងបង្កភាពងាយស្រួលក្នុងការពង្រីកពាណិជ្ជកម្មក្នុងចំណោមប្រទេសទាំងអស់នៅក្នុងតំបន់ ដូចជាការកាត់បន្ថយពេលវេលា និងតម្លៃនៃការដឹកជញ្ជូនទំនិញជាដើម៕