
លោក លី ធុជ អនុប្រធានទី១ អាជ្ញាធរមីន និងជាប្រធានអនុសញ្ញាអូតាវ៉ាឆ្នាំ២០២៤ បើកកិច្ចប្រជុំពាក់កណ្តាលអាណត្តិ នៃកិច្ចប្រជុំកំពូល សៀមរាប-អង្គរ ស្តីពីពិភពលោកមួយដែលគ្មានមីន កាលពីថ្ងៃទី១៨ ខែមិថុនា នៅទីក្រុងហ្សឺណែវ ប្រទេសស្វីស។ រូបថត CMAA
ផែនការសកម្មភាព សៀមរាប-អង្គរ និងសេចក្តីថ្លែងការណ៍នយោបាយដែលនឹងធ្វើឡើងនៅខេត្តសៀមរាបនាខែវិច្ឆិកាខាងមុខនេះ នឹងក្លាយជាប្លង់មេនៃកិច្ចខិតខំប្រឹងប្រែងនាពេលអនាគតក្នុងការបង្កើតផ្លូវឆ្ពោះទៅមុខប្រកបដោយមហិច្ឆតា និងអាចសម្រេចបាន។ នេះជាការលើកឡើងរបស់លោក លី ធុជ ប្រធានអនុសញ្ញាអូតាវ៉ាឆ្នាំ២០២៤ ក្នុងកិច្ចប្រជុំនៅទីក្រុងហ្សឺណែវ ប្រទេសស្វ៊ីស កាលពីថ្ងៃទី១៨ ខែមិថុនា។
លោក លី ធុជ កំពុងមានវត្តមាននៅប្រទេសស្វ៊ីសរហូតដល់ថ្ងៃទី២០ ខែមិថុនា ក្នុងកិច្ចប្រជុំពាក់កណ្តាលអាណត្តិ និងដើម្បីត្រៀមរៀបចំកិច្ចប្រជុំត្រួតពិនិត្យឡើងវិញលើកទី៥ ឬកិច្ចប្រជុំកំពូលសៀមរាប-អង្គរស្តីពីពិភពលោកមួយដែលគ្មានមីន នៃអនុសញ្ញាអូតាវ៉ា។
ថ្លែងទៅកាន់អ្នកចូលរួមក្នុងកិច្ចប្រជុំកាលពីថ្ងៃទី១៨ លោក លី ធុជ និយាយថា អនុសញ្ញាហាមការប្រើប្រាស់មីនប្រឆាំងមនុស្ស ឬ អនុសញ្ញាអូតាវ៉ា គឺលើសពីឯកសារច្បាប់ទៅទៀត ពោលគឺវាជាពន្លឺនៃក្តីសង្ឃឹមនិងសេចក្តីថ្លៃថ្នូររបស់មនុស្សលោក តំណាងឱ្យការខិតខំប្រឹងប្រែងឥតឈប់ឈរ ក្នុងការកម្ចាត់ពិភពឃាតករលាក់មុខដែលនាំមកនូវការឈឺចាប់មិនអាចនឹកស្មានដល់ជីវិតរាប់មិនអស់។
លោកថ្លែងថា៖ «អនុសញ្ញាអូតាវ៉ា បានបង្ហាញឱ្យឃើញពីមនុស្សជាតិតែមួយ និងការយកចិត្តទុកដាក់រួមក្នុងការបង្កើតពិភពលោកមួយដែលមានសុវត្ថិភាព និងប្រកបដោយក្តីមេត្តា។ គ្រប់ជំហាននីមួយៗដែលយើងធ្វើ គ្រាប់មីនដែលយើងបោសសម្អាត អ្នករស់រានមានជីវិតដែលយើងជួយ គឺជាសក្ខីភាពមួយចំពោះការប្តេជ្ញាចិត្តរួមរបស់យើង»។
និយាយដល់កិច្ចប្រជុំកំពូលសៀមរាប-អង្គរ លោក លី ធុជ បញ្ជាក់ថា កិច្ចប្រជុំកំពូលនេះ មិនគ្រាន់តែជាការប្រមូលផ្តុំតាមនីតិវិធីប៉ុណ្ណោះទេ វាជាឱកាសក្នុងការចែករំលែកប្រាជ្ញា បង្កើតដំណោះស្រាយ និងពង្រឹងការប្តេជ្ញាចិត្តក្នុងការទប់ស្កាត់ និងបោសសម្អាតមីនប្រឆាំងមនុស្ស។
លោកថា៖ «ផែនការសកម្មភាពសៀមរាប-អង្គរ និងសេចក្តីថ្លែងការណ៍នយោបាយ នឹងក្លាយជាប្លង់មេនៃកិច្ចខិតខំប្រឹងប្រែងនាពេលអនាគត តាមរយៈការរួបរួម និងការសហការគ្នា ក្នុងការបង្កើតផ្លូវឆ្ពោះទៅមុខប្រកបដោយមហិច្ឆតា និងអាចសម្រេចបាន»។
លោកថា ការរៀបចំកិច្ចប្រជុំកំពូលនៅទីក្រុងសៀមរាបដែលជាកន្លែងប្រកាសគ្មានមីន គឺជាសក្ខីភាពនៃជ័យជម្នះចំពោះការប្តេជ្ញាចិត្ត និងការតស៊ូរួមគ្នាក្នុងការលប់បំបាត់ចោលគ្រាប់មីន៕