មន្ត្រីឧទ្យានុរក្សនៃមន្ទីរបរិស្ថានខេត្តមណ្ឌលគិរី កំពុងចុះល្បាតព្រៃ។ មន្ទីរបរិស្ថានខេត្តមណ្ឌលគិរី
ភ្នំពេញៈ ក្រសួងបរិស្ថាន និងអង្គការអភិរក្សអំពាវនាវដល់សាធារណជនឱ្យផ្តល់គុណតម្លៃ និងការដឹងគុណដល់មន្រ្តីឧទ្យានុរក្សដែលបានតស៊ូលះបង់ និងខិតខំបំពេញបេសកកម្មក្នុងការការពារបរិស្ថាន និងធនធានធម្មជាតិ ដើម្បីប្រយោជន៍រួម។
ការអំពាវនាវនេះត្រូវបានធ្វើឡើងនៅក្នុងទិវាឧទ្យានុរក្សពិភពលោក ៣១ កក្កដា ដើម្បីរំលឹកវីរភាពមន្ត្រីឧទ្យានុរក្សក្នុងកិច្ចការពារធនធានធម្មជាតិ បរិស្ថានកម្ពុជានិងពិភពលោក ក៏ដូចជាគោរពដល់វិញ្ញាណក្ខន្ធឧទ្យានុរក្សដែលបានពលីក្នុងបេសកកម្មការពារអភិរក្សជីវចម្រុះនៅទូទាំងពិភពលោក។
នៅក្នុងពិធីជួបសំណេះសំណាលជាមួយនឹងមន្រ្តី នៃមន្ទីរបរិស្ថានខេត្តរតនគិរីនាថ្ងៃទី៣១ ខែកក្កដានេះ លោកអ៊ាង សុផល្លែត រដ្ឋមន្រ្តីក្រសួងបរិស្ថានមានប្រសាសន៍ថា៖ «មន្រ្តីឧទ្យានុរក្សបានតស៊ូលះបង់ និងហ៊ានពលីជីវិតក្នុងការបំពេញកាតព្វកិច្ចក្នុងការការពារសម្បត្តិធនធានធម្មជាតិបរិស្ថាន និងបេតិកភណ្ឌវប្បធម៌ធម្មជាតិកម្ពុជា»។
កម្ពុជាមានតំបន់ការពារធម្មជាតិចំនួន ៧៣កន្លែង ដែលមានផ្ទៃដីជាង ៧លានហិកតាស្មើរនឹងជាង ៤០ភាគរយ នៃផ្ទៃប្រទេស។ នាពេលបច្ចុបប្បនេះ ក្រសួងបរិស្ថានមានមន្ត្រីឧទ្យានុរក្សសរុបមានចំនួន ១ ១២០នាក់ ដែលក្នុងនោះមន្ត្រីឧទ្យានុរក្សជាស្រ្តីមានចំនួន ៣៨នាក់ផងដែរ។
ក្រៅពីនោះលោក អ៊ាង សុផល្លែត ក៏បានលើកទឹកចិត្ដដល់សាធារណជនឱ្យចូលរួមជាមួយនឹងមន្រ្តីឧទ្យានុរក្ស ដើម្បីការពារធនធានធម្មជាតិនិងបរិស្ថានប្រកបដោយនិរន្តរភាព។ ក្រសួងបរិស្ថានបានដាក់ចេញនូវវិធានការយ៉ាងម៉ឺងម៉ាត់បំផុតក្នុងការទប់ស្កាត់បទល្មើសធនធានធម្មជាតិដោយបញ្ចប់រាល់វប្បធម៌ចុះកិច្ចសន្យាដោះលែងអ្នកប្រព្រឹត្តបទល្មើសធនធានធម្មជាតិ និងជំរុញការអនុវត្តច្បាប់ឱ្យបាន ១០០ភាគរយផងដែរ។
ដោយអបអរសាទរ «ទិវាឧទ្យានុរក្សពិភពលោក»នេះ អង្គការសមាគមអភិរក្សសត្វព្រៃ (WCS Cambodia)បាន ថ្លែងអំណរគុណនិងសម្តែងនូវការកោតសរសើរចំពោះមន្ត្រីឧទ្យានុរក្សទាំងអស់ដែលបានបំពេញការងារទាំងយប់ ទាំងថ្ងៃដោយមិនខ្លាចនឿយហត់ ដើម្បីកិច្ចការពារធនធានធម្មជាតិដ៏មានតម្លៃ។
អង្គការបានលើកឡើងថា តាមរយៈការគាំទ្រពីអង្គការសមាគមអភិរក្សសត្វព្រៃដោយសហការជាមួយក្រសួងបរិស្ថាន មន្ត្រីឧទ្យានុរក្សចំនួន ២៩នាក់ក្នុងដែនជម្រកសត្វព្រៃកែវសីមា បាននឹងកំពុងបំពេញការងារយ៉ាងសកម្មនៅលើផ្ទៃដីចំនួន ៣១៧ ៤៥៦ហិកតា ក្នុងការប្រយុទ្ធប្រឆាំងបទល្មើសព្រៃឈើ និងការជួញដូរសត្វព្រៃខុសច្បាប់។
អង្គការសមាគមអភិរក្សសត្វព្រៃបានសរសេរនៅលើបណ្តាញសង្គមរបស់ខ្លួនថា៖ «ការលះបង់របស់មន្ត្រីឧទ្យានុរក្សពិតជាមានសារៈសំខាន់ណាស់ក្នុងការថែរក្សាជីវចម្រុះ និងធ្វើឲ្យប្រសើរឡើងនូវសុខភាពរបស់ប្រព័ន្ធអេកូឡូស៊ីនៅលើពិភពលោក»។
លោក បេន ដាវីស ដែលបានបង្កើតគម្រោងអភិរក្ស និងតំបន់អេកូទេសចរណ៍ BeTreed Adventures នៅត្នោតដែនជម្រកសត្វព្រៃភ្នំត្នោត-ភ្នំពកបានឱ្យដឹងថា ពេលចុះល្បាតម្តងៗជាមួយនឹងមន្រ្តីឧទ្យានុរក្ស ឬអាវុធហត្ថលើផ្ទៃប្រទេសនោះមានការលំបាកច្រើន។ ជាពិសេសគឺការប្រឈមមុខទៅនឹងគ្រោះថ្នាក់ ដែលបង្កឡើដោយក្រុមជនល្មើស ដែលមានកាំភ្លើងកែច្នៃ។
លោកបាននិយាយថា៖« ពិបាកខ្លាំង គឺល្បាតពេលយប់ ពេលមានភ្លៀង។ ពេលភ្លៀងពេលយប់ មានជនល្មើសច្រើនដើរបាញ់សត្វ ព្រោះពេលហ្នឹង វាងាយស្រួលបាញ់សត្វ។ ជនល្មើសមានកំភ្លើងកៃច្នៃច្រើន តែខាងយើងមានកាំភ្លើងតិច»។
ដោយឡែក អង្គការ WWF កម្ពុជាក៏បានលើកឡើងដែរថា មន្ត្រីឧទ្សានុរក្ស គឺត្រូវបានចាត់ទុកជាវីរបុរស ដែលបំពេញការងារ ដែលមានការលះបង់ខ្ពស់ និងរួមចំណែកយ៉ាងសំខាន់ដើម្បីសម្រេចឱ្យបាននូវគោលដៅក្របខណ្ឌជីវចម្រុះសកលចំនួន ៣០ភាគារយ៕
