ភ្ញៀវទេសចរមកកម្សាន្ត ងូតទឹកលេងនៅឆ្នេរក្នុងខេត្តព្រះសីហនុ នាពេលកន្លងមក។ រូបថត យូសុះ អាប់ឌុល រ៉ាហ៊ីម
រាជរដ្ឋាភិបាលបង្កើតក្រុងថ្មីនៅខេត្តព្រះសីហនុ ដែលមានឈ្មោះថា «ក្រុងកំពង់សោម» ដោយកាត់យកឃុំចំនួន ៥ ចេញពីស្រុកព្រៃនប់ គឺឃុំរាម ឃុំបិតត្រាំង ឃុំអូរឧកញ៉ាហេង ឃុំបឹងតាព្រហ្ម និងឃុំអូរជ្រៅ។ ការបង្កើតក្រុងថ្មីនេះ ធ្វើឲ្យខេត្តនេះមានទាំងក្រុងកំពង់សោម និងក្រុងព្រះសីហនុ ដែលគេតែងហៅជាសាមញ្ញថា ក្រុងកំពង់សោម។
យោងតាមអនុក្រឹត្យចុះថ្ងៃទី២៨ ខែសីហា ម្សិលមិញ ដែលមានហត្ថលេខាលោកនាយករដ្ឋមន្ត្រី ហ៊ុន ម៉ាណែត ក្រុងកំពង់សោមនឹងមានទីតាំងរដ្ឋបាលនៅក្នុងសង្កាត់រាម។ ការគ្រប់គ្រងឃុំទាំង៥ ដែលត្រូវបានប្ដូរទៅជាសង្កាត់បន្តស្ថិតនៅក្រោមរដ្ឋបាលចាស់រហូតដល់មានក្រុមប្រឹក្សា និងគណៈអភិបាលក្រុងកំពង់សោមមកជំនួស។
លោក ឡុង ឌីម៉ង់ អភិបាលរងខេត្តព្រះសីហនុ បានឲ្យដឹងថា មុនពេលបង្កើតក្រុងកំពង់សោម ខេត្តព្រះសីហនុ មានក្រុង ២ ស្រាប់ហើយ គឺក្រុងព្រះសីហនុ និងក្រុងកោះរ៉ុង និងមានស្រុកចំនួន ៣ គឺស្រុកព្រៃនប់ ស្រុកកំពង់សីលា និងស្រុកស្ទឹងហាវ។
លោកពន្យល់ថា ការកាត់យកឃុំ ៥ នេះពីស្រុកព្រៃនប់ ដោយសារតែស្រុកនេះមានវិសាលភាពធំ ហើយការបង្កើតក្រុងថ្មីនេះឡើងគឺដើម្បីបង្ខិតសេវាឲ្យកាន់តែកៀកទៅដល់ប្រជាពលរដ្ឋ អ្នកវិនិយោគ ភ្ញៀវទេសចរ និងផ្នែកសន្តិសុខ។
លោកបន្តថា នាពេលអនាគត តំបន់រាមនេះត្រូវបានអ្នកជំនាញសេដ្ឋកិច្ច និងអ្នកជំនាញនគរូបនីយកម្មតម្រង់ទិសថា នឹងក្លាយជាទីក្រុងថ្មីមួយដែលទាក់ទាញប្រជាពលរដ្ឋមករស់នៅកាន់តែច្រើន ដោយផ្អែកលើសេចក្ដីព្រាងនៃប្លង់គោលសម្រាប់ការអភិវឌ្ឍខេត្តព្រះសីហនុឲ្យទៅជាតំបន់សេដ្ឋកិច្ចពិសេសពហុបំណង។ ដូច្នេះ ការបង្កើតក្រុងថ្មីនេះគឺដើម្បីត្រៀមផ្ដល់សេវាដល់ប្រជាពលរដ្ឋ និងអ្នកវិនិយោគ។
យោងតាមឯកសារស្រាវជ្រាវរបស់របស់រដ្ឋបាលខេត្តព្រះសីហនុចេញផ្សាយកាលពីឆ្នាំ២០១៧ នៅឆ្នាំ១៩៥៧ ហ្លួងសុរាម្រឹត្យ បានបង្កើតកុ្រងកំពង់សោម ដោយពេលនោះស្ថិតនៅឃុំរាម ស្រុកកំពត ខេត្តកំពត។ នៅឆ្នាំ១៩៥៩ សម្ដេចព្រះបាទ នរោត្តមសុរាម្រឹត្យ បានបង្កើតក្រុងមឿង (ក្រុងតូច) ដែលដាក់ឈ្មោះថា ក្រុងព្រះសីហនុ ស្ថិតនៅឃុំរាម ក្នុងតំបន់ផែកំពង់សោម ហើយក្រុងកំពង់សោមក៏ត្រូវបានប្ដូរទៅជាក្រុងព្រះសីហនុវិញ។ នៅក្នុងសម័យសង្គមរាស្ត្រនិយម ក្រុងនេះក៏មានឈ្មោះ ក្រុងព្រះសីហនុ។
យ៉ាងណាក៏ដោយ ក្រុងព្រះសីហនុ ត្រូវបានប្ដូរទៅជាក្រុងកំពង់សោមវិញនៅក្រោយរដ្ឋប្រហារទម្លាក់សម្ដេចព្រះនរោត្តម សីហនុ នៅថ្ងៃទី១៨ ខែមីនា ឆ្នាំ១៩៧០។ នៅឆ្នាំ១៩៩៣ ក្រុងកំពង់សោមត្រូវបានប្ដូរឈ្មោះទៅជាក្រុងព្រះសីហនុវិញ។ ចំណែកខេត្តព្រះសីហនុ ត្រូវបានបង្កើតឡើងនៅឆ្នាំ២០០៨ ដោយបានកាត់ដីពីស្រុកកំពង់សីលាខេត្តកោះកុង។ នេះបើតាមឯកសារដដែល៕
.jpg)
