អង្គភាពស៊ីម៉ាក់ផ្ដល់ការហ្វឹកហ្វឺនដល់មន្រ្តីជំនាញអ៊ុយក្រែន ១៤នាក់ លើជំនាញមូលដ្ឋានគ្រឹះលើការប្រើប្រាស់ និងថែទាំគ្រឿងចក្រវាយកម្ទេចមីន បោសសម្អាតមីន នៅទីលានហ្វឹកហ្វឺនរបស់អង្គភាពស៊ីម៉ាក់ ក្នុងខេត្ដសៀមរាប។ រូបថត មន្ទីរព័ត៌មានខេត្តសៀមរាប
សៀមរាបៈ កម្ពុជាតាមរយៈអង្គភាពស៊ីម៉ាក់បានចាប់ផ្តើមបើកវគ្គបណ្តុះបណ្តាលរយៈពេល ៣ សប្តាហ៍ដល់មន្រ្តីជំនាញអ៊ុយក្រែនចំនួន ១៤រូបកាលពីថ្ងៃពុធម្សិលមិញ ដើម្បីផ្តល់ការហ្វឹកហ្វឺនមូលដ្ឋានគ្រឹះនៃការប្រើប្រាស់គ្រឿងចក្រវាយកម្ទេចមីនក្នុងកិច្ចប្រតិបត្តិការបោសសម្អាតមីនមនុស្សធម៌។
ស៊ីម៉ាក់បានបញ្ជាក់ថា៖ «វគ្គបណ្តុះបណ្តាលនេះ មានគោលបំណង ក្នុងការកសាងសមត្ថភាពជំនាញលើការប្រើប្រាស់គ្រឿងចក្រកម្ទេចមីន ដើម្បីបង្កើនសុវត្ថិភាព ប្រសិទ្ធភាព និងប្រសិទ្ធផលក្នុងការរំដោះផ្ទៃដីដែលទទួលរងការគំរាមកំហែងដោយសារគ្រាប់មីននិងសំណល់យុទ្ធភណ្ឌសង្គ្រាម»។
ពិធីបើកវគ្គបណ្តុះបណ្តាលនេះត្រូវបានធ្វើឡើងក្រោមអធិបតីយភាពរបស់លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ និងលោក សានុអិ កាហ្ស៊ូម៉ាសា (Sanui Kazumasa) ប្រធានទីភ្នាក់ងារសហប្រតិបត្តិការអន្តរជាតិជប៉ុន (JICA) ប្រចាំកម្ពុជា។
មន្រ្តីជំនាញអ៊ុយក្រែនទាំង ១៤រូបនោះគឺមកពីអង្គភាពផ្តល់សេវាកម្មរដ្ឋក្នុងគ្រាអាសន្នសម្រាប់ប្រទេសអ៊ុយក្រែន (SESU)។ វគ្គបណ្តុះបណ្តាលនេះបាននឹងកំពុងតែប្រព្រឹត្តទៅនៅទីលានហ្វឹកហ្វឺនរបស់អង្គភាពស៊ីម៉ាក់ ក្នុងឃុំពពេល ស្រុកសូទ្រនិគម ខេត្តសៀមរាប។
អង្គភាពស៊ីម៉ាក់ (CMAC) បានទទួលការគាំទ្រនិងការអនុញ្ញាតពីរាជរដ្ឋាភិបាលកម្ពុជាក្រោមកិច្ចសហការជាមួយរដ្ឋាភិបាលជប៉ុន លើការហ្វឹកហ្វឺនជំនាញបោសសម្អាតមីនមនុស្សធម៌ជូនអ្នកជំនាញអ៊ុយក្រែន ផ្តល់សុវត្ថិភាពជូនប្រជាជនដែលទទួលរងការគំរាមកំហែងដោយសារគ្រាប់មីន និងសំណល់យុទ្ធភណ្ឌសង្គ្រាមនៅប្រទេស អ៊ុយក្រែន។
លោក ហេង រតនា បានលើកឡើងថា អង្គភាពស៊ីម៉ាក់បានផ្ដល់ការហ្វឹកហ្វឺនបច្ចេកវិទ្យាឧបករណ៍បោសសម្អាតមីន ដល់មន្រ្ដីជំនាញអ៊ុយក្រែនបានចំនួន ២លើករួចមកហើយ។ ក្នុងនោះរួមមានកាលពីខែមករា ឆ្នាំ២០២៣ នៅប្រទេសកម្ពុជា និងលើកទី២ កាលពីខែកក្កដា ឆ្នាំ២០២៣ នៅប្រទេស ប៉ូឡូញ ក្រោមកិច្ចសហប្រតិបត្តិការជាមួយមូលនិធិសាមគ្គីភាពប៉ូឡូញ ដោយទទួលបានលទ្ធផលប្រកបដោយជោគជ័យគួរជាទីមោទនៈសម្រាប់ហ្វឹកហ្វឺនដល់ប្រទេសអ៊ុយក្រែននេះ។ នេះបើយោងតាមមន្ទីរព័ត៌មានខេត្តសៀមរាប។
ក្នុងឱកាសនោះ លោកក៏បានរំលឹកពីប្រវត្តិសង្រ្គាមនៅកម្ពុជា និង បុព្វហេតុដែលបង្កឱ្យមានបញ្ហាគ្រាប់មីន និងសំណល់យុទ្ធភ័ណ្ឌសង្រ្គាមនៅកម្ពុជាផងដែរ។ ក្នុងនោះរួមមាន ការទម្លាក់គ្រាប់បែកចំនួន ៤.០៣លានតោន គ្រាប់បែកចង្កោមចំនួន ២៨លានតោន និងគ្រាប់បែកគីមីចំនួន ២០០ទីតាំង។ ក្រៅពីនោះក៏មានគ្រាប់មីនប្រឆាំងមនុស្ស និង គ្រាប់មីនប្រឆាំងរថក្រោះនៅទីតាំងរាយប៉ាយដែលមិនមាននៅក្នុងទិន្នន័យថ្នាក់ជាតិ និងគ្រាប់មីនដែលនៅសេសសល់ប្រមាណ ៤ ទៅ ៦លានតោនទៀត។
លោក សានុអិ កាហ្ស៊ូម៉ាសា (Sanui Kazumasa) បានឱ្យដឹងថា ចំពោះកិច្ចសហប្រតិបត្តិការជាមួយប្រទេសអ៊ុយក្រែន ទស្សនៈវិស័យរបស់ JICA គឺអនុវត្តគំរូ ដែល JICA បានអភិវឌ្ឍប្រកបដោយជោគជ័យនៅប្រទេសកម្ពុជា ដើម្បីផ្តល់ទៅកាន់ប្រទេសអ៊ុយក្រែន។
JICA បានសម្តែងការរីករាយដែលមន្រ្តីជំនាញបោសសម្អាតមីនអ៊ុយក្រែន មកទទួលការបណ្តុះបណ្តាលដោយផ្ទាល់នៅក្នុងប្រទេសកម្ពុជា ស្តីពីប្រតិបត្តិការគ្រឿងចក្រវាយកម្ទេចមីន ទាំងទ្រឹស្តីនិងប្រតិបត្តិការដោយផ្ទាល់នៅចម្ការមីន។
ទាក់ទងទៅនឹងការងារប្រតិបត្តិការរំដោះផ្ទៃដីនេះផងដែរ ក្នុងរយ:ពេល ៦ខែ (មករា-មិថុនា) ឆ្នាំ២០២៤នេះ អង្គភាពស៊ីម៉ាក់បានបោសសម្អាតផ្ទៃដីចម្ការមីនបានចំនួន ៧៤៤ លើទំហំផ្ទៃដីសម្រេចបានចំនួន ១១៤ ៣៦៤ ១៣០ម៉ែត្រក្រឡា។ លើសពីនោះបាន រុករកឃើញ និងកម្ទេចចោលគ្រាប់មីននិងយុទ្ធភណ្ឌមិនទាន់ផ្ទុះគ្រប់ប្រភេទសរុបចំនួន ៦៤ ៧៨២ គ្រាប់។ ក្នុងនោះមានគ្រាប់មីនប្រឆាំងមនុស្សចំនួន ៨ ០៩២គ្រាប់ មីនប្រឆាំងរថក្រោះចំនួន ១២៦គ្រាប់ មីនច្នៃចំនួន ៤គ្រាប់ គ្រាប់បែកទម្លាក់ពីយន្ដហោះ និងគ្រាប់បែកចង្កោមចំនួន ២៨គ្រាប់ គ្រាប់យុទ្ធភណ្ឌមិនទាន់ផ្ទុះចំនួន ៥២ ៤៤៥គ្រាប់ និងកាំភ្លើងធន់តូចចំនួន៣ ២៧៦គីឡូក្រាម។
បន្ថែមពីនោះ ប្រតិបត្តិការក្រោមទឹកសម្រេចបានលើផ្ទៃទឹកចំនួន ៨០២ ០០០ម៉ែត្រក្រឡា ដោយរុករកឃើញគ្រាប់មីនប្រឆាំងមនុស្សចំនួនយុទ្ធភណ្ឌមិនទាន់ផ្ទុះ បំណែកនាវា និងអំបែង សរុបបានចំនួន ២៣៥តោន។
ដោយឡែក ចំពោះសកម្មភាពការងារអប់រំយល់ដឹងពីគ្រាប់មីន និងយុទ្ធភណ្ឌមិនទាន់ផ្ទុះវិញ មន្រ្តីអង្គភាពស៊ីម៉ាក់ និងបណ្តាញមីនស្ម័គ្រចិត្តបានចុះធ្វើការផ្សព្វផ្សាយអប់រំការយល់ដឹងពីគ្រោះថ្នាក់ដោយសារគ្រាប់មីន និងសំណល់ជាតិផ្ទុះពីសង្គ្រាមដល់ក្រុមគោលដៅបានចំនួន ១៣ ៦៨៤លើក ស្មើនឹង៦៧៤ ៨១៦ខ្នងផ្ទះ ដែលមានពលរដ្ឋចូលរួមជាង១លាននាក់៕
