មន្ទីរប្រឆាំងគ្រឿងញៀនបង្ក្រាបករណីជួញដូរគ្រឿងញៀន ឃាត់ខ្លួនជនជាតិចិនម្នាក់ និងថ្នាំញៀនជាង ១៨គីឡូក្រាមនៅភូមិសាស្ត្ររាជធានីភ្នំពេញ។ រូបថត មន្ទីរប្រឆាំងគ្រឿងញៀន
ភ្នំពេញៈ បុរសជាជនជាតិចិនម្នាក់ត្រូវបានឃាត់ខ្លួនបញ្ជូនទៅកាន់តុលាការ ក្រោមការសង្ស័យជួញដូរគ្រឿងញៀនជាង១៨គីឡូក្រាម ខណៈពេលដែលក្នុងសប្តាហ៍ទី១ នៃខែសីហានេះ មានជនសង្ស័យជិត ២០០នាក់ត្រូវបានចាប់ខ្លួនក្នុងបទល្មើសគ្រឿងញៀន។
ជនសង្ស័យរូបនេះឈ្មោះឆឹង ជីហ្សាំង (TSENG CHIH HSIANG) អាយុ ៣១ឆ្នាំ ជាជនជាតិចិនតៃវ៉ាន់។ វត្ថុតាងដែលត្រូវបានរកឃើញ និងរឹបអូសរួមមានគ្រឿងញៀនប្រភេទ កេតាមីន (KETAMINE) ទម្ងន់ជាង ១៨១០៦ ក្រាម និងសារធាតុគីមីផ្សំទម្ងន់សរុប ៩៥២ក្រាម។ នេះបើយោងតាមមន្ទីរប្រឆាំងគ្រឿងញៀននាថ្ងៃទី៧ ខែសីហានេះ។
បន្ទាប់ពីទទួលបានព័ត៌មាន កម្លាំងជំនាញបានចុះស្រាវជ្រាវស៊ើបអង្កេតរហូតឈានទៅបង្ក្រាបករណីរក្សាទុក ដឹកជញ្ជូន និងជួញដូរសារធាតុញៀននៅ ២គោលដៅ។ គោលដៅទី១ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញនិងគោលដៅទី២ នៅសង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។
ជនល្មើស និងវត្ថុតាងត្រូវបានកម្លាំងជំនាញកសាងសំណុំរឿងបញ្ជូនខ្លួនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី។ កម្លាំងជំនាញបានកំពុងតែបន្តសហការជាមួយសមត្ថកិច្ចពាក់ព័ន្ធ ដើម្បីស្រាវជ្រាវតាមចាប់ខ្លួនមុខសញ្ញាពាក់ព័ន្ធ ព្រមទាំងស៊ើបអង្កេតស្វែងរកទ្រព្យសម្បត្តិទាំងឡាយ ដែលជាផលនៃបទល្មើស។
ក្នុងរយៈពេល១សប្ដាហ៍ គិតចាប់ពីថ្ងៃទី១ ដល់ថ្ងៃទី៧ ខែសីហានេះ សាលាដំបូងរាជធានីខេត្ត បានទទួលចាត់ការលើសំណុំរឿងពាក់ព័ន្ធនឹងគ្រឿងញៀនសរុបចំនួន ៩២ ករណី។ សំណុំរឿងទាំងនោះមានជនសង្ស័យចំនួន ២៤៩ នាក់។ ក្នុងនោះជនសង្ស័យដែលត្រូវបានឃាត់ខ្លួនមាន ១៩៩នាក់។ នេះបើយោងតាមក្រសួងយុត្តិធម៌។
ក្នុងចំណោមជនសង្ស័យទាំងនោះក៏មានជនជាតិវៀតណាម ៧នាក់ (ស្រី៣នាក់)ផងដែរ ដែលត្រូវបានចាប់ខ្លួន និងចោទប្រកាន់ពាក់ព័ន្ធទៅនឹងបទល្មើសគ្រឿងញៀនទម្ងន់ប្រមាណជា ២គីឡូក្រាម។
តំណាងអយ្យការនៃតុលាការរាជធានីភ្នំពេញបានសម្រេចចោទប្រកាន់លើជនសង្ស័យទាំង ៧នាក់ និងបក្ខពួក ពីបទ ជួញដូរដោយខុសច្បាប់នូវសារធាតុញៀន ជាបទល្មើសព្រហ្មទណ្ឌ និងត្រូវផ្តន្ទាទោស តាមបញ្ញត្តិមាត្រា៤០ និងមាត្រា៤៨ នៃច្បាប់ស្តីពីការត្រួតពិនិត្យគ្រឿងញៀន។
លោក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណ: នៃអាជ្ញាធរជាតិប្រយុទ្ធប្រឆាំងគ្រឿងញៀនបានឱ្យដឹងថា ក្នុងកិច្ចខិតខំទប់ស្កាត់ការប្រើប្រាស់គ្រឿងញៀននៅកម្ពុជា អាជ្ញាធរជាតិប្រយុទ្ធប្រឆាំងគ្រឿងញៀនបានបង្កើត App Nodrug ដើម្បីធ្វើឱ្យទំនើបឱ្យទាន់សម័យ និងមានប្រសិទ្ធភាព។ លើសពីនោះ នាពេលថ្មីៗនេះ ក៏មានការចុះអនុស្សរណៈយោគយល់គ្នារវាងអាជ្ញាធរជាតិប្រយុទ្ធប្រឆាំងគ្រឿងញៀន និងសមាគមសិល្បករខ្មែរ ដើម្បីសហការពង្រឹងនិងលើកកម្ពស់ប្រសិទ្ធភាពការងារផ្សព្វផ្សាយអប់រំអំពីផលប៉ះពាល់និងគ្រោះថ្នាក់នៃគ្រឿងញៀនផងដែរ។
លោក លឹម តុងហួត បញ្ជាក់ថា៖ «ការចុះអនុស្សរណៈយោគយល់ជាមួយនឹងតារាល្បីៗ ដោយសារតែមើលឃើញថា ការផ្ញើសារអប់រំតាមរយៈសិល្បៈមានអ្នកទស្សនាច្រើន និងចូលបញ្ចេញមតិយោបល់ច្រើន។ យើងប្រើប្រាស់ឱ្យអស់លទ្ធភាពធ្វើយ៉ាងណាឱ្យការងារផ្សព្វផ្សាយអប់រំហ្នឹងត្រូវបានពង្រឹងប្រសិទ្ធភាព និងធ្វើទំនើបកម្មដើម្បីបានបញ្ជូនសារពាក់ព័ន្ធនឹងគ្រោះថ្នាក់នៃគ្រឿងញៀនហ្នឹងទៅដល់ពលរដ្ឋឱ្យបានលឿន»៕
