ប្រាសាទកោះកេរ្តិ៍ ស្ថិតនៅក្នុងខេត្តព្រះវិហារ ត្រូវបានបញ្ចូលទៅក្នុងបញ្ជីបេតិកភណ្ឌពិភពលោករបស់អង្គការយូណេស្កូ នៅថ្ងៃទី១៧ ខែកញ្ញា ឆ្នាំ២០២៣។ UNESCO
ភ្នំពេញ៖ លោកនាយករដ្ឋមន្ត្រី ហ៊ុន ម៉ាណែត អំពាវនាវឱ្យពង្រឹងកិច្ចខិតខំប្រឹងប្រែងការពារ និងលើកស្ទួយប្រាសាទបុរាណក្នុងឱកាសប្រារឰខួបមួយឆ្នាំនៃការដាក់បញ្ចូលប្រាសាទកោះកេរ ក្នុងបញ្ជីបេតិកភណ្ឌពិភពលោករបស់អង្គការយូណេស្កូ នៅថ្ងៃទី១៧ ខែកញ្ញា។
នៅក្នុងសារលិខិតដែលចេញផ្សាយនៅថ្ងៃទី១៥ ខែកញ្ញា លោកបានលើកឡើងពីសារៈសំខាន់នៃការអភិរក្សសារៈសំខាន់នៃវប្បធម៌ និងប្រវត្តិសាស្ត្ររបស់កោះកែរ ដោយជំរុញឱ្យមានកិច្ចសហប្រតិបត្តិការបន្ថែមទៀតពីដៃគូអន្តរជាតិ។
លោកបានថ្លែងថា៖ «ជាមួយនឹងការអបអរសាទរនេះ ខ្ញុំសូមស្នើដល់សហប្រធានចិន និងឥណ្ឌា នៃគណៈកម្មាធិការសម្របសម្រួលអន្តរជាតិដើម្បីការពារនិងលើកតម្លៃរមណីយដ្ឋានវប្បធម៌ធម្មជាតិ នៃប្រាសាទព្រះវិហារ (ICC-Preah Vihear) ព្រមទាំងប្រទេសជាសមាជិកទាំងអស់ ពង្រីកសកម្មភាពរបស់ខ្លួន បន្ថែមទៀត ដើម្បីជួយអភិរក្សនិងលើកតម្លៃរមណីយដ្ឋានប្រាសាទកោះកេរ ដែលជាសម្បត្តិរបស់មនុស្សជាតិ ទាំងមូល ដោយផ្អែកលើគំរូនៃកិច្ចសហការដ៏សកម្មដែលមានស្រាប់ជាមួយរាជរដ្ឋាភិបាលកម្ពុជា»។
លោកនាយករដ្ឋមន្ត្រី បានកោតសរសើរថ្នាក់ដឹកនាំក្រសួងវប្បធម៌ និងវិចិត្រសិល្បៈ អាជ្ញាធរជាតិព្រះវិហារ និងអ្នកជំនាញជាតិ និងអន្តរជាតិ ដែលបានលះបង់កម្លាំងកាយចិត្ត ដើម្បីសម្រេចបាននូវការទទួលស្គាល់ដ៏មហិមានេះ។
លោកបានបន្ដថា៖ «ពួកគេបានខិតខំប្រឹងប្រែង ប្រកបដោយភាពប៉ិនប្រសប់ និងវិជ្ជាជីវៈខ្ពស់ ពុះពារ ជម្នះគ្រប់ការលំបាករហូតសម្រេចបាននូវសមិទ្ធផលដ៏ធំធេងនេះ»។
លោកបានថ្លែងអំណរគុណដល់ចំពោះមិត្តភក្តិអន្តរជាតិនៃព្រះរាជាណាចក្រកម្ពុជានិងឥស្សរជន ទាំងឡាយ ដែលបានទទួលស្គាល់នូវតម្លៃដ៏មហស្ចារ្យជាសកលនៃ «រមណីយដ្ឋានប្រាសាទកោះកេរ»ដែលជាអតីត រាជធានីខ្មែរក្នុងសម័យអង្គរដ៏រុងរឿង កសាងដោយព្រះបាទជ័យវរ្ម័នទី៤។
រមណីយដ្ឋាននេះ បានបន្សល់ទុកនូវប្រាង្គ ប្រាសាទ រូបបដិមា សិលាចារឹក ចំណេះដឹងផ្នែករៀបចំក្រុងនិងប្រព័ន្ធធារាសាស្ត្របុរាណ ដែលចាំបាច់ត្រូវការពារ អភិរក្ស សិក្សាស្រាវជ្រាវ និងលើកតម្លៃឡើងវិញ។
លោកនាយករដ្ឋមន្ត្រីក៏បានឆ្លៀតឱកាសចេញក្រើនរំឭកដល់អាជ្ញាធរមូលដ្ឋាន ដោយបានជំរុញឱ្យអាជ្ញាធរខេត្តព្រះវិហារ និងអាជ្ញាធរជាតិព្រះវិហារ រក្សាការប្រុងប្រយ័ត្នចំពោះការគំរាមកំហែងដល់ទីតាំង រួមមានការទន្ទ្រានយកដីខុសច្បាប់ ការកាប់បំផ្លាញព្រៃឈើ ការបរបាញ់សត្វព្រៃ និងការជីកកកាយដោយគ្មានការអនុញ្ញាត។
លោកបានបញ្ជាក់ជាថ្មីថា៖ «យើងត្រូវតែលើកកម្ពស់ និងអភិរក្សកោះកេរ ដើម្បីជាប្រយោជន៍ដល់ការអភិវឌ្ឍ និងជីវភាពរស់នៅរបស់ប្រជាពលរដ្ឋក្នុងមូលដ្ឋាន»។
ដើម្បីអបអរសាទរឱកាសដ៏មានសារៈសំខាន់នេះ លោកនាយករដ្ឋមន្ត្រីបានអំពាវនាវដល់បណ្តាញសារព័ត៌មានទូទាំងប្រទេសកម្ពុជា ផ្សព្វផ្សាយខួបនេះឱ្យបានទូលំទូលាយ។
លោកបានលើកទឹកចិត្តប្រទេសជាតិឱ្យចូលរួមក្នុងព្រឹត្តិការណ៍នេះ ដោយប្រារឰខួបមួយឆ្នាំចាប់តាំងពីការបញ្ចូលប្រាសាទទៅក្នុងបញ្ជីរបស់អង្គការយូណេស្កូ និងបន្តជំរុញទេសចរណ៍ក្នុងស្រុកជុំវិញតំបន់នោះ។
ប្រាសាទកោះកេរ្តិ៍ ស្ថិតនៅក្នុងខេត្តព្រះវិហារ ត្រូវបានបញ្ចូលទៅក្នុងបញ្ជីបេតិកភណ្ឌពិភពលោករបស់អង្គការយូណេស្កូ នៅថ្ងៃទី១៧ ខែកញ្ញា ឆ្នាំ២០២៣ ក្នុងសម័យប្រជុំលើកទី៤៥ នៃគណៈកម្មាធិការបេតិកភណ្ឌពិភពលោក នៅទីក្រុងរីយ៉ាដ ប្រទេសអារ៉ាប៊ីសាអូឌីត។
បរិវេណប្រាសាទបង្ហាញពីការចម្រុះនៃប្រាសាទបុរាណ រូបចម្លាក់ និងប្រព័ន្ធធារាសាស្ត្របុរាណ ដែលឆ្លុះបញ្ចាំងពីភាពរីកចម្រើនផ្នែកបច្ចេកវិទ្យានៃសម័យអង្គរ។
ការដាក់បញ្ចូលដ៏ជោគជ័យរបស់រដ្ឋាភិបាលកម្ពុជាសម្រាប់ការទទួលស្គាល់របស់អង្គការយូណេស្កូ គឺជាសក្ខីភាពមួយចំពោះបេតិកភណ្ឌវប្បធម៌ដ៏សម្បូរបែបរបស់ប្រទេស ហើយបាននាំយកការចាប់អារម្មណ៍ពីជាតិ និងអន្តរជាតិមកកាន់តំបន់ប្រវត្ដិសាស្ដ្រនេះ៕
